អង្គការសិទ្ធិមនុស្ស Human Right Watch បានជំរុញដល់តុលាការខេត្តរតនគិរីឱ្យទម្លាក់ចោលការចោទប្រកាន់ទាំងស្រុងលើអតីតអ្នកយកព័ត៌មានការសែត The Cambodia Daily ដោយថា ការបន្តនីតិវិធីតុលាការលើអ្នកកាសែតទាំងពីរ គឺជាការបំភិតបំភ័យដល់អ្នកសារព័ត៌មានទាំងអស់នៅកម្ពុជា។
អ្នកកាសែត The Cambodia Daily ពីររូប គឺលោក អូន ភាព និងលោក Peter Zsombor ត្រូវបានចោទប្រកាន់ពីបទញុះញង់ជុំវិញការធ្វើសេចក្ដីរាយការណ៍នៅក្នុងខេត្តរតនគិរី នៅមុនការបោះឆ្នោតឃុំ-សង្កាត់ ឆ្នាំ២០១៧។ សំណុំរឿងអ្នកទាំងពីរ នឹងត្រូវបានតុលាការខេត្តរតនគិរីធ្វើការជំនុំជម្រះនាថ្ងៃ២៥ ខែធ្នូ ខាងមុខ។
ក្នុងសេចក្ដីប្រកាសព័ត៌មានចុះថ្ងៃទី២៣ ខែធ្នូនេះ អង្គការ Human Right Watch បានជំរុញដល់តុលាការខេត្តរតនគិរីឱ្យទម្លាក់ចោលការចោទប្រកាន់ទាំងស្រុងលើអ្នកទាំងពីរ ជាពិសេសរដ្ឋាភិបាលកម្ពុជាគួរតែឈប់ធ្វើការធ្វើទុក្ខបុកម្នេញដល់សារព័ត៌មានវិជ្ជាជីវៈ និងឯករាជ្យនៅកម្ពុជាផងដែរ។
ប្រធានប្រចាំតំបន់អាស៊ីនៃអង្គការ Human Rights Watch លោក Phil Robertson បានលើកឡើងក្នុងសេចក្ដីប្រកាសនោះថា៖ «ការសម្រេចយករឿងក្ដីរបស់លោក ភាព និង Peter ទៅជំនុំជម្រះ ហាក់ដូចមានបំណងបំភិតបំភ័យអ្នកសារព័ត៌មានកម្ពុជាទាំងអស់។ ព្រះរាជអាជ្ញាគួរតែទម្លាក់ការចោទប្រកាន់ក្លែងបន្លំទាំងនេះ ហើយរដ្ឋាភិបាលគួរតែបញ្ឈប់ការរឹតត្បិតសេរីភាពសារព័ត៌មានឯករាជ្យ តាមរយៈការចោទប្រកាន់ព្រហ្មទណ្ឌទាំងនេះ»។
កាលពីម្សិលមិញ បណ្ដាញការពារអ្នកសារព័ត៌មាន និងអង្គការសិទ្ធិមនុស្សនៅកម្ពុជា ក៏បានជំរុញទៅរដ្ឋាភិបាលកម្ពុជា ឱ្យចាត់វិធានការជាក់លាក់ដើម្បីបញ្ចប់នូវអ្វីដែលពួកគេចាត់ទុកជាការយាយីទៅលើអ្នកសារព័ត៌មានឯករាជ្យផងដែរ។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ម៉ៃ ទិត្យថារ៉ា បាននិយាយក្នុងសេចក្ដីថ្លែងការណ៍នោះថា រាល់សកម្មភាពយាយីអ្នកសារព័ត៌មាន គួរត្រូវបានបញ្ឈប់ជាបន្ទាន់ ដើម្បីធ្វើឱ្យស្ថានភាពសេរីភាពសារព័ត៌មាននៅកម្ពុជា ឈានទៅរកភាពល្អប្រសើរឡើងវិញ។
លោក ម៉ៃ ទិត្យថារ៉ា និយាយថា៖ «ដើម្បីធ្វើឱ្យស្ថានភាពសេរីភាពសារព័ត៌មានឈានទៅរកភាពល្អប្រសើរឡើងវិញ ពាក្យបណ្ដឹងទាំងឡាយ និងសកម្មភាពធ្វើទុក្ខបុកម្នេញលើអ្នកសារព័ត៌មាន គួរត្រូវបានបញ្ឈប់ជាបន្ទាន់»។
បើតាមសេចក្ដីប្រកាសនោះ អ្នកកាសែត៦នាក់ដែលពួកគេទាមទារឱ្យទម្លាក់ចោទបទប្រកាន់ប្រកាន់រួមមាន អតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា អតីតអ្នកសារព័ត៌មានរបស់កាសែត ឌឹ ខេមបូឌា ដេលី មានលោក អូន ភាព និងលោក Peter Zsombor អ្នកបកប្រែឱ្យទូរទស្សន៍រុស្ស៊ី Russia Today (RT) លោក រ៉ាត់ រត្នមុនី និងភ្នាក់ងារកាសែតរស្មីកម្ពុជា និងទូរទស្សន៍អប្សរាប្រចាំខេត្តមណ្ឌលគិរី លោក សាត ចាន់បុត្រ៕
