ពលរដ្ឋមួយចំនួនរស់នៅតាមមាត់ទន្លបាសាក់ ស្ថិតក្នុងឃុំព្រែកជ្រៃ ស្រុកកោះធំ ខេត្តកណ្ដាលជាប់ព្រំប្រទល់វៀតណាម បារម្ភពីការបាត់ទឹកដី បើច្រាំងទន្លេនៅបន្តបាក់ ខណៈដែនទឹកតំបន់នោះ ភាគីទាំងពីរចែកគ្នាគ្រប់គ្រងពាក់កណ្ដាលម្នាក់។
អ្នកស្រី ឡុង គឹមលាង រស់នៅភូមិខ្នាតាំងយូ ឃុំព្រែកជ្រៃ ឱ្យVODដឹងថា ៣ឆ្នាំជាប់ៗគ្នាមកនេះ ដីមាត់ច្រាំងប្រមាណជា៣០ ទៅ៥០ម៉ែត្រ បានបាក់ចូលទន្លេជាបន្តបន្ទាប់ ធ្វើឱ្យពួកគាត់រាប់សិបគ្រួសារបង្ខំចិត្តរុះរើផ្ទះទៅសាងសង់នៅកន្លែងមានសុវត្ថិភាព ។
ស្ដ្រីអាយុ៧០រូបនេះបន្តថា ពេលពួកគាត់ដកថយទៅរកទីតាំងថ្មីដើម្បីគេចចេញពីការបាក់ច្រាំង ផ្ទះបណ្ដែតទឹកវៀតណាមដែលនៅតំបន់នោះ រំកិលមកមុខ ។
អ្នកស្រីថា៖ «បើតាមដែលយើងធ្វើ វាមិនបាក់ដល់ថ្នាក់ហ្នឹងទេ បើធ្វើពីដំបូងមក អត់ទប់ ទើបនឹងឆ្នាំហ្នឹងចាក់ខ្សាច់នៅមុខមន្ទីរឃុំបន្តិច។ ខ្ញុំឃើញនៅវៀតណាម គេចាស់ដីហើយគេបុកគ្រឹះទៀតចាស៎! ដល់គេធ្វើមានបាក់ឯណា បាក់ៗទាំងផ្ទះថ្មអីដែរ តែគេធ្វើរបស់គេអ៊ែមម៉ង»។
ស្ដ្រីម្នាក់ទៀត គឺអ្នកស្រី ជា សែម អះអាងថា ច្រាំងទន្លេរបស់កម្ពុជាទើបនឹងបាក់គំហុក ក្រោយភាគីវៀតណាមចាក់ដីមាត់ទន្លេខាងដីគេ ធ្វើផ្សារ និងមានផ្ទះបណ្ដែតទឹករបស់ពលរដ្ឋវៀតណាមច្រើនឡើងៗ មករស់នៅមុខទឹក ធ្វើផែចិញ្ចឹមត្រី។ ស្ដ្រីអាយុ៥០រូបនេះ បារម្ភថា ផ្ទះគាត់អាចនឹងរុះរើ គេចពីការបាក់ច្រាំងម្ដងទៀត បើអាជ្ញាធរគ្មានវិធានការទប់ស្កាត់ការបាក់ច្រាំងនេះឱ្យមានប្រសិទ្ធភាពបានទេនោះ។
អ្នកស្រីថា៖ «ច្រាំងយើងនៅដល់ជិតផែ [ខាងវៀតណាម] ប្រហែលពីនេះទៅជិត៥០ ទៅ៦០ម៉ែត្រ ប៉ុនកាលហ្នឹងវាតិចៗទេ តែទើបនឹងខ្លាំងចាប់ពីឆ្នាំ២០១០នេះ បាក់ខ្លាំងពេលវា [វៀតណាម] ធ្វើផ្សារ»។
បុរសជាប្ដីអ្នកស្រី ជា សែម អះអាងដែរថា ការបាក់ច្រាំងនេះ ផ្ទះពីរជួរ និងផ្លូវលំមួយខ្សែទទឹង៤ម៉ែត្រ នៅពីមុខផ្ទះតាមដងទន្លេ ក្នុងភូមិខ្នាតាំងយូនេះ បានបាត់រូបរាង ជំនួសមកវិញដោយផ្ទៃទឹកជាង៣ឆ្នាំមកហើយ។
បុរសរូបនេះបង្ហាញក្ដីបារម្ភថា បើច្រាំងនៅតែបន្តបាក់ ផ្ទះអ្នកភូមិដែលនៅសេសសល់ អាចនឹងត្រូវបន្តបំលាស់ទី ហើយថា ផ្ទះបណ្ដែតទឹករបស់ពលរដ្ឋវៀតណាមអាចនឹងរំកិលមកទីតាំងដែលគាត់ចាកចេញ ។
មេឃុំព្រែកជ្រៃ លោក ចាប ស៊ុយ អះអាងថា ផ្ទះបណ្ដែតទឹកពលរដ្ឋវៀតណាម ពិតជាបានរំកិលចូលខាងដែនគ្រប់គ្រងរបស់កម្ពុជានៅរដូវទឹកឡើងមែន ប៉ុន្តែ លោកថា នៅរដូវទឹកស្រក ផ្ទះបណ្ដែតទឹកទាំងនោះ បានត្រឡប់ចូលទឹកដីរបស់វៀតណាមវិញ។
ម្យ៉ាងវិញទៀត មេឃុំរូបនេះ អះអាងទៀតថា បញ្ហាបាក់ច្រាំងទន្លេ រដ្ឋាភិបាលមានវិធានការទប់ស្កាត់ហើយ ដើម្បីឆ្លើយតបទៅនឹងការព្រួយបារម្ភរបស់ពលរដ្ឋ។
លោកថា៖ «រាជរដ្ឋាភិបាលមានគម្រោងធ្វើ១០០ម៉ែត្រ ពីកន្លែងចាក់ខ្សាច់ និងមក៥០០ម៉ែត្រ ហើយទៅខាងនោះ៥០០ម៉ែត្រទៀត អាហ្នឹងដាក់បាវខ្សាច់ដល់បាតទន្លេ។ អ៊ីចឹងឃើញថា ចំនុចត្រង់ហ្នឹងខ្សែទឹកជះត្រឡប់ទៅវិញជាងរាល់ឆ្នាំ បាទ! ហើយរាជរដ្ឋាភិបាលនឹងមានគម្រោងធ្វើបន្ត»។
បើតាមពលរដ្ឋ ច្រាំងទន្លេដែលគ្រប់គ្រងដោយភាគីវៀតណាម វៀតណាមបុកគ្រឹះចាក់ដីធ្វើផ្សារ ធ្វើផែ និងមានពលរដ្ឋវៀតណាមជាច្រើនធ្វើផ្ទះបណ្ដែតទឹក ធ្វើអាជីវកម្មដូចជាចិញ្ចឹមត្រីជាដើម ដើម្បីទប់ស្កាត់ការបាក់ច្រាំងទន្លេ។
ប៉ុន្តែ ច្រាំងខាងភាគីកម្ពុជា គ្មានផ្សារ គ្មានផែ និងគ្មានផ្ទះបណ្ដែតទឹកទេ តែគេឃើញ មានបាវខ្សាច់មួយចំនួនត្រូវបានគេទម្លាក់នៅកន្លែងច្រាំងបាក់ទប់ស្កាត់ចរន្តទឹក។
អ្នកវិភាគនយោបាយ លោក ឯម សុវណ្ណរ៉ា ពន្យល់ថា ព្រំដែនទឹកមិនអាចបំលាស់ទីបានទេទោះច្រាំងបាក់ក៏ដោយ បើរដ្ឋាភិបាលប្រើបច្ចេកវិទ្យាកំណត់ខ្សែបន្ទាត់ព្រំដែន តាមខ្នាត UTM ឬ GPS ជាដើម។
ប៉ុន្តែ អ្នកឃ្លាំមើលរូបនេះ អះអាងថា កន្លងទៅ កម្ពុជាចាញ់ប្រៀបវៀតណាម ដោយភាគីវៀតណាមអាចប្រើប្រាស់ទឹកនៅតំបន់គ្រប់គ្រងរួមគ្នា ធ្វើជាមធ្យោបាយប្រើប្រាស់បាន តែកម្ពុជាគ្មានលទ្ធភាព។
លោកថា៖ «កន្លងមកខាងវៀតណាមគេអាចបូមស្ដារ ដល់អ៊ីចឹងទៅ រដូវប្រាំងគេមានទឹកប្រើ កម្ពុជាអត់មានទឹកទេ ដល់ទឹកឡើងខ្លាំង វាបាក់ខាងយើង ខាងវៀតណាមគេអត់បាក់ទេ អាហ្នឹងទី១។ ទី២ វៀតណាមគេធ្វើបាន កម្ពុជាយើងធ្វើមិនដែលបានទេ យើងស្ដារក៏មិនបាន យើងធ្វើតូប ធ្វើអីក៏មិនបានដែរ វៀតណាមគេធ្វើបានរហូត អាហ្នឹងមូលហេតុអី យើងត្រូវសិក្សាមើល ព្រោះអាហ្នឹងជាបញ្ហារសើបណាស់»។
ទោះជាយ៉ាងណា ការបោះបង្គោលព្រំដែនជាមួយវៀតណាមបាន៨៤ភាគរយរួចមកនេះ ត្រូវបានរដ្ឋាភិបាល ប្រកាសឱ្យប្រើប្រាស់ជាផ្លូវការហើយ។
ប៉ុន្តែ អតីតគណបក្សប្រឆាំង និងអ្នកឃ្លាំមើលមួយចំនួន អះអាងថា ការប្រកាសនេះបានទទួលស្គាល់ការបាត់បង់ទឹកដីមួយផ្នែកទៀតទៅប្រទេសវៀតណាមជាផ្លូវការ ដោយសំអាងថា សន្ធិសញ្ញាព្រំដែនធ្វើឡើងក្រោមការគ្រប់គ្រងរបស់វៀតណាមនៅឆ្នាំ១៩៨៥នេះ ត្រូវបានកិច្ចព្រមព្រៀងសន្តិភាពទីក្រុងប៉ារីស ធ្វើមោឃភាពរួចហើយ តែថា រដ្ឋាភិបាលធ្វើឱ្យសន្ធិសញ្ញានេះមានសុពលភាពឡើងវិញ៕
