តុលាការខេត្តរតនគិរីបានពន្យារពេលសវនាការលើសំណុំរឿងចោទប្រកាន់អតីតអ្នកសារព័ត៌មាន ឌឹ ខេមបូឌា ដេលី គឺលោក អូន ភាព និងលោក ហ្សំប័រ ភីធើ កាលពីថ្ងៃពុធមិនកំណត់ពេល ដោយលើកឡើងពីអវត្តមានរបស់ចៅក្រមម្នាក់។
តុលាការខេត្តរតនគិរីបានបើកសវនាការលើបណ្ដឹងចោទប្រកាន់អ្នកកាសែតទាំងពីរនាក់ ដែលអ្នកឃ្លាំមើលមួយចំនួនចាត់ទុកថា ជាការបំភិតបំភ័យលលើអ្នកកាសែត។
អ្នកទាំងពីរត្រូវបានចោទប្រកាន់ពីបទ «ញុះញង់ឱ្យប្រព្រឹត្តបទល្មើសជាអាទិ៍» បន្ទាប់ពីអ្នកទាំងពីរបានសម្ភាសអ្នកភូមិអំពីការសម្រេចចិត្តរបស់ពួកគាត់ក្នុងការបោះឆ្នោតនៅមុនការបោះឆ្នោតឃុំ-សង្កាត់ ឆ្នាំ២០១៧។ ឃុំប៉ាតេ ធ្លាប់ជាឃុំតែមួយគត់ក្នុងខេត្តនេះ ដែលបេក្ខភាពមកពីគណបក្សសង្គ្រោះជាតិ (CNRP) បានជាប់ឆ្នោត អំឡុងការបោះឆ្នោតឃុំ-សង្កាត់ ឆ្នាំ២០១២។
ប្រធានក្រុមប្រឹក្សាជំនុំជម្រះ លោក គង់ តាំងម៉េង បាននិយាយថា សវនាការនេះនឹងត្រូវពន្យារពេលដោយគ្មានពេលកំណត់។
លោកបាននិយាយថា៖ «ចៅក្រមប្រឹក្សា លោក ចាន់ សីហា មានបេសកកម្មពិសេសទៅប្រទេសឥណ្ឌាតាមការស្នើសុំរបស់ក្រសួងយុត្តិធម៌»។
លោក ហ្សំប័រ ភីធើ បានបដិសេធមិនធ្វើអត្ថាធិប្បាយ ចំណែកលោក អូន ភាព មិនអាចទាក់ទងដើម្បីសុំការឆ្លើយតបបានទេកាលពីថ្ងៃពុធ។ អ្នកកាសែតទាំងពីរនាក់នេះបានចាកចេញពីប្រទេសកម្ពុជា បន្ទាប់ពីមានពាក្យបណ្ដឹង ហើយកំពុងរស់នៅក្រៅប្រទេស។ កាសែតឌឹ ខេមបូឌា ដេលី បានបិទការផ្សាយរបស់ខ្លួន បន្ទាប់ពីត្រូវបង្ខំឱ្យបង់ពន្ធរាប់លានដុល្លារដ៏ចម្រូងចម្រាស។
អំឡុងសវនាការនោះ ព្រះរាជអាជ្ញារង លោក រ៉ា ប៊ូរ៉ានី បានស្នើឱ្យពន្យារសវនាការនេះ រហូតដល់មានវត្តមានរបស់ចៅក្រមប្រឹក្សា លោក ចាន់ សីហា។
លោកបាននិយាយថា៖ «ខ្ញុំសូមជម្រាបលោកប្រធានក្រុមប្រឹក្សាថា សវនាការនេះមិនអាចបន្តបានទេ ដោយសារតែអវត្តមានសមាជិកម្នាក់នៃក្រុមប្រឹក្សាជំនុំជម្រះ»។
លោក សេក សុភ័ណ្ឌ ជាមេធាវីការពារក្ដីឱ្យអ្នកកាសែតទាំងពីរ បានស្នើឱ្យតុលាការបន្តសវនាការ ប៉ុន្តែ ចៅក្រម តាំងម៉េង បានជំទាស់ ហើយយល់ព្រមតាមសំណើរបស់លោកព្រះរាជអាជ្ញារង។
លោក សុភ័ណ្ឌ បានប្រាប់ VOD នៅក្រៅតុលាការថា លោកនឹងជូនដំណឹងទៅកូនក្ដីរបស់លោកឱ្យចូលរួមសវនាការលើកក្រោយ ប៉ុន្តែ ថាការចូលរួម ឬមិនចូលរួមសវនាការគឺជាសិទ្ធិរបស់កូនក្ដីរបស់លោក។
លោកនិយាយថា៖ «ខ្ញុំគ្រាន់តែមានតួនាទីមួយជូនដំណឹង និងទំនាក់ទំនងតាមលទ្ធភាពដែលខ្ញុំអាចធ្វើបានក្នុងនាមជាមេធាវីការពារសិទ្ធិ។ ត្រង់ថា មកឬមិនមក ឬចូលរួមនិងមិនចូលរួម វាជាសិទ្ធិរបស់ពួកគាត់»។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បានអំពាវនាវឱ្យទម្លាក់បទចោទលើអ្នកកាសែតទាំងពីរ។
លោកស្រីបានប្រាប់ VOD តាមសារអេឡិចត្រូនិចថា៖ «វិជ្ជាជីវៈសារព័ត៌មានមិនមែនជាបទឧក្រិដ្ឋនោះទេ ហើយក៏មិនគួរត្រូវបានចោទប្រកាន់តាមរបៀបនេះដែរ។ អ្នកកាសែតគួរត្រូវបានអនុញ្ញាតឱ្យបំពេញការងារក្នុងបរិយាកាសមួយប្រកបដោយសុវត្ថិភាព និងគ្មានការភ័យខ្លាចចំពោះប្រតិកម្មអវិជ្ជមាន។ ទោះបីជាយ៉ាងណា អ្នកកាសែតបន្តក្លាយជាកម្មវត្ថុនៃចំណាត់ការតាមផ្លូវច្បាប់ ដោយសារតែការបំពេញការងាររបស់ពួកគេ ដែលជារួមបានធ្វើឱ្យប៉ះពាល់ដល់សេរីភាពសារព័ត៌មានដ៏គួរឱ្យបារម្ភ»។
លោកស្រីបន្តថា៖ «ដូច្នេះ ខ្ញុំសូមអំពាវនាវឱ្យទម្លាក់ការចោទប្រកាន់ទាំងអស់លើពួកគាត់ ហើយក៏សូមអំពាវនាវផងដែរដល់រាជរដ្ឋាភិបាលកម្ពុជាឱ្យធានាថា អ្នកសារព័ត៌មានអាចធ្វើសកម្មភាពស្របច្បាប់របស់ខ្លួនដោយគ្មានការភ័យខ្លាច ឬការបង្អាក់ ការរារាំង ឬការយាយីតាមផ្លូវតុលាការ និងតាមទម្រង់នៃការយាយីផ្សេងៗទៀត»។
អង្គការឃ្លាំមើលសិទ្ធិមនុស្ស បានគាំទ្រការអំពាវនាវទាំងនេះតាមរយៈសេចក្ដីថ្លែងការណ៍មួយដែលចេញផ្សាយកាលពីថ្ងៃចន្ទ។
លោក ហ្វីល រ៉ូបឺតសិន នាយករងផ្នែកអាស៊ីនៃអង្គការឃ្លាំមើលសិទ្ធិមនុស្ស បាននិយាយថា៖ «ការសម្រេចបញ្ជូនសំណុំរឿងរបស់លោក ភាព និង ភីធើ មកជំនុំជម្រះហាក់មានចេតនាបំភិតបំភ័យដល់អ្នកសារព័ត៌មានកម្ពុជាទាំងអស់។ ព្រះរាជអាជ្ញាគួរទម្លាក់ការចោទប្រកាន់ក្លែងក្លាយទាំងនេះ ហើយរដ្ឋាភិបាលគួរបញ្ចប់ការប្រឹងប្រែងរឹតត្បិតសេរីភាពសារព័ត៌ តាមរយៈការធ្វើឱ្យសេចក្ដីរាយការណ៍ឯករាជ្យក្លាយជាបទ ល្មើសព្រហ្មទណ្ឌ»៕
រាយការណ៍៖ Leonie Kijewski
