ស្ថាបនិកក្រុមវប្បធម៌នយោបាយថ្មីលោក ព្រាប កុល ស្នើទៅមន្ត្រីជាន់ខ្ពស់រដ្ឋាភិបាល២រូប ឱ្យបង្ហាញឯកសារពាក់ព័ន្ធ និង រៀបចំវេទិកាសាធារណៈបើកការជជែកដេញដោល ដើម្បីជម្រះមន្ទិលសង្ស័យលើការបោះបង្គោលព្រំដែនកម្ពុជា-វៀតណាម។
សាររបស់លោក ព្រាប កុល ផ្សព្វផ្សាយនៅលើហ្វេសប៊ុករបស់លោកនៅថ្ងៃនេះ បានស្នើទៅ លោក វ៉ា គឹមហុងប្រធានគណៈកម្មការព្រំដែនកម្ពុជា និង លោក សុខ ទូច ប្រធានរាជបណ្ឌិត្យសភាកម្ពុជា។
ក្នុងសំណើនោះក្រៅពីស្នើឱ្យបង្ហាញផែនទីប្រើសម្រាប់បោះបង្គោលព្រំដែន លោកក៏បានស្នើឱ្យមានការរៀបចំវេទិកាសាធារណៈ។
លោក ព្រាប កុល៖«សូមសហការរៀបចំវេទកាសាធារណ: ដោយមានការចូលរួមពីសំណាក់ភាគីពាក់ព័ន្ធ និងពលរដ្ឋ ដែលចាប់អារម្មណ៍ពីបញ្ហាព្រំដែន ជាពិសេសពលរដ្ឋ ដែលរស់នៅក្នុងភូមិ ឃុំជុំវិញទីតាំងបង្គោលព្រំដែន និងអ្នកសារព័ត៌មានជាតិ/អន្តរជាតិ»។
កាលពីថ្ងៃទី៥ខែធ្នូឆ្នាំ២០១៩ព្រះមហាក្សត្រ បានឡាយព្រះហស្តលេខា ទទួលស្គាល់សន្និសញ្ញាបោះបង្គោលព្រំដែនកម្ពុជា-វៀតណាម ក្រោយមកមានប្រតិកម្មបន្តបន្ទាប់ពីក្រុមអ្នកនយោបាយ មន្ត្រីសង្គមស៊ីវិល និងប្រជាពលរដ្ឋនៅតាមបណ្តាញសង្គមហ្វេសប៊ុក។
