របាយការណ៍របស់សម្ព័ន្ធអង្គការស្ដ្រីមួយបង្ហាញថា ការរំលោភសេពសន្ថវៈលើស្ដ្រី និងកុមារីបានបន្តកើនឡើង ប៉ុន្តែ មន្ត្រីជាន់ខ្ពស់ក្រសួងកិច្ចការនារី បដិសេធការរកឃើញនេះ។
របាយការណ៍ចេញផ្សាយរួមគ្នាដោយសម្ព័ន្ធបងប្អូនស្រី ដែលបានស្រង់ទិន្នន័យពីបណ្ដាញសារព័ត៌មានចាប់ពីខែតុលា ឆ្នាំ២០១៧ ដល់ខែមីនា ឆ្នាំ២០១៨ និងចេញផ្សាយនៅចុងឆ្នាំ២០១៩ បង្ហាញថា ករណីរំលោភសេពសន្ថវៈលើស្ដរី និងកុមារី បានកើតឡើងជាមធ្យមចំនួន ១ករណីក្នុងមួយថ្ងៃ ដែលមានប្រមាណ៣១ករណីក្នុងមួយខែ កើនលើសរបាយការណ៍មុនដែលមានតែ២១ករណីក្នុងមួយខែ។ អង្គការនេះ បានលើកឡើងថា ភាគច្រើននៃជនរងគ្រោះជាអនីតិជនក្រោម១៥ឆ្នាំ ដែលមានចំនួនពាក់កណ្ដាលនៃជនរងគ្រោះទាំងអស់។
របាយការណ៍នោះលើកឡើងថា៖ «បញ្ហានេះបង្កក្ដីបារម្ភយ៉ាងខ្លាំងសម្រាប់ស្ដ្រី កុមារី និងសង្គម ពិសេសគឺផលប៉ះពាល់លើជនរងគ្រោះ ដូចជាការប៉ះពាល់ផ្លូវចិត្ត ផ្លូវកាយ ផ្លូវអារម្មណ៍ និងករណីខ្លះរហូតដល់ជីវិតរបស់គាត់»។
របាយការណ៍នោះក៏បានបង្ហាញផងដែរថា ស្ដ្រី និងកុមារី ប្រឈមនឹងភាពរងគ្រោះពីការរំលោភសេពសន្ថវៈគ្រប់ពេលវេលា ដោយថា ៣០ភាគរយនៃអំពើរំលោភផ្លូវភេទកើតឡើងនាពេលថ្ងៃ ហើយ៣៤ភាគរយទៀតគឺកើតឡើងនាពេលយប់។ លើសពីនោះទៀត ទិន្នន័យបង្ហាញថា ភាគច្រើននៃជនល្មើសគឺជាជនដែលមានទំនាក់ទំនងស្គាល់គ្នាជាមួយជនរងគ្រោះដែលមានប្រមាណ ៧៣,៣ភាគរយ ដែលជាឪពុកបង្កើត ឪពុកចុង ជីតា ពូ អ្នកជិតខាង មិត្តរួមការងារ និងសង្សារ ជាដើម។
អគ្គនាយករងនៃអគ្គនាយកដ្ឋានអភិវឌ្ឍន៍សង្គមនៃក្រសួងកិច្ចការនារី លោកស្រី ស ស៊ីណែត បានច្រានចោលការរកឃើញនេះ ដោយថា សម្រង់ទិន្នន័យដែលបានរកឃើញនេះមិនមានទម្ងន់ដែលអាចយកជាការបាននោះទេ។ ទោះជាយ៉ាងណា លោកស្រី ទទួលស្គាល់ថា បញ្ហារំលោភសេពសន្ថវៈនេះជាបញ្ហាដែលនៅតែកើតមាន ហើយរដ្ឋាភិបាលក៏កំពុងតែមានវិធានការជាបន្តបន្ទាប់ក្នុងការលុបបំបាត់អំពើអសីលធម៌នេះចេញពីសង្គមផងដែរ។
លោកស្រី ស ស៊ីណែត មានប្រសាសន៍ថា៖ «យើងទៅសួរអ្នកកាសែត ហើយអ្នកកាសែតខ្លួនឯង គាត់មិនដែលឆ្លើយថា ការរាយការណ៍របស់គាត់មានកំហុសទេ។ បើសិនការសង្កេតនេះយើងធ្វើឃើញអ៊ីចឹងហើយយើងចុះទៅសួរជនរងគ្រោះដែលយើងរកឃើញហ្នឹង ឧទាហរណ៍១៨០ករណី យើងចុះទៅសួរតែ១០ ទៅ២០អីទៅ យើងអាចទាញ Sample បានល្អហើយ។ តែនេះ យើងទៅសួរអ្នកកាសែត ដែលអ្វីជាការបារម្ភរបស់ខ្ញុំ គឺវាពាក់ព័ន្ធនឹងតួលេខដែលរៀងច្រើនណាស់»។
អ្នកសម្របសម្រួលសមាគមមណ្ឌលព័ត៌មានកម្មករ ដែលជាដៃគូរអង្គការមួយក្នុងការចេញរបាយការណ៍នេះ លោកស្រី ម៉ាក ច័ន្ទស៊ីថា មានប្រសាសន៍ថា មូលហេតុដែលបណ្ដាញអង្គការលោកស្រីជ្រើសយកសារព័ត៌មានជាទិន្នន័យសម្រាប់ធ្វើរបាយការណ៍នេះ ដោយថា មានការលំបាកក្នុងការប្រមូលព័ត៌មានពីករណីរំលោភដោយសម្ព័ន្ធអង្គការផ្ទាល់ ព្រោះពាក់ព័ន្ធនឹងសិទ្ធិមនុស្ស ទោះជាយ៉ាងណា លោកស្រីនៅតែការពារពីភាពត្រឹមត្រូវនៃរបាយការណ៍នេះ។
លោកស្រី ម៉ាក ច័ន្ទស៊ីថា៖ «បើយើងសិក្សាលើការរាយការណ៍របស់លីកាដូ ដែលគាត់បានសិក្សា៣ឆ្នាំពី២០១២ ដល់២០១៤ យើងឃើញថា ករណីដែលគាត់ធ្វើការសិក្សាលម្អិត និងសម្ភាសតាមដានលើករណីហ្នឹងមានដល់៧៦៨ករណី អ៊ីចឹងយើងឃើញថា ក្នុងរយៈពេល៣ឆ្នាំ ១ខែហ្នឹងក៏២១ករណីដែរហ្នឹងមិននិយាយអំពីការដែលរាយការណ៍។ តែក្នុងរបាយការណ៍ដែលយើងតាមដាននេះគឺតាមដានតែលើករណីដែលរាយការណ៍ ហើយហេតុអីដែលយើងតាមតែករណីដែលរាយការណ៍ព្រោះបទឧក្រិដ្ឋត្រូវតែរាយការណ៍ ព្រោះច្បាប់យើងថាអ៊ីចឹង»។
ក្នុងរបាយការណ៍ដែលមានកម្រាស់២២ទំព័រនេះក៏បានរកឃើញផងដែរថា ខេត្ត និងរាជធានីបី មានករណីរំលោភសេពសន្ថវៈច្រើនជាងគេ រួមមាន រាជធានីភ្នំពេញមាន ៤៨ករណី ខេត្តកណ្ដាលមាន ២២ករណី និងខេត្តរតនគិរីមាន ១៨ករណី ។
របាយការណ៍នោះបន្ថែមថា៖ «ករណីកើតឡើងនៅក្នុងខេត្តរតនគិរីភាគច្រើន គឺជាករណីរំលោភសេពសន្ថវៈ និងសម្លាប់។ ដោយឡែក នៅខេត្តមណ្ឌលគិរីវិញគឺមិនបានឃើញថា មានការរាយការណ៍អំពីករណីហិង្សាផ្លូវភេទនោះទេ»។
អ្នកនាំពាក្យសាលារាជធានីភ្នំពេញ លោក ម៉ែត មាសភក្ដី ថាលោកមិនអាចធ្វើការឆ្លើយតបបាននៅឡើយ ដោយសារលោកមិនទាន់បានទទួលរបាយការណ៍នេះ ទោះជាយ៉ាងណា លោកថា រដ្ឋបាលរាជធានីភ្នំពេញមានវិធានការអប់រំ និងផ្សព្វផ្សាយដល់ពលរដ្ឋពីបញ្ហាតាមវិធានការនានាដែលកំពុងអនុវត្តរួចទៅហើយ។
លោកថា៖ «យន្តការការងាររបស់យើង គណៈកម្មការសម្រាប់ការងារហ្នឹងក៏យើងមាន ការបញ្ជ្រៀបការផ្សព្វផ្សាយ រហូតដល់ការណែនាំដល់មូលដ្ឋានអីផ្សេងៗ ដើម្បីលើកកម្ពស់ទៅលើការងារហ្នឹងក៏យើងធ្វើការងារទៅលើរឿងហ្នឹងជាប់ដែរ។ អ៊ីចឹង ខ្ញុំគិតថា យើងដូចជាមិនមានយន្តការអីបន្ថែមដែលគួរតែមានអ្វីផ្សេងទៀតទេ! កិច្ចការទាំងអស់នេះគឺយើងកំពុងធ្វើហើយ»។
VOD មិនអាចទាក់ទងអ្នកនាំពាក្យរដ្ឋបាលខេត្តរតនគិរី លោក ម៉ឹង ស៊ីនាថ បាននៅឡើយទេ។
ទោះជាយ៉ាងណា ក្នុងរបាយការណ៍ស៊ើបអង្កេតរបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យចេញផ្សាយកាលពីចុងឆ្នាំ២០១៨កន្លងទៅ ដែលមានចំណងជើងថា « ករណីរំលោភសម្លាប់ក្លាយជាឧបសគ្គដល់ក្មេងស្រីជនជាតិដើមភាគតិចទៅសាលារៀននៅរតនគិរី » អនុប្រធានការិយាល័យមធ្យមសិក្សា និងប្រឡងនៃមន្ទីរអប់រំខេត្ត លោក អ៊ិន ណែមណូរិន្ទ បានទទួលស្គាល់ថា ការរំលោភ និងសម្លាប់បានបង្កការលំបាក និងភាពភ័យខ្លាចដល់កុមារីនៅក្នុងខេត្ត ដែលធ្វើឱ្យមានការបោះបង់ការសិក្សាពី ៨ ទៅ៩ភាគរយក្នុងមួយឆ្នាំ។ ទោះជាយ៉ាងណា លោកថា មន្ទីរអប់រំខេត្តកំពុងបង្កើតសាលាអនុវិទ្យាល័យនៅតាមតំបន់ដាច់ស្រយាល ដើម្បីជួយកាត់បន្ថយបញ្ហាប្រឈម និងគ្រោះថ្នាក់ទាំងនេះផងដែរ។
អ្នកស្រាវជ្រាវពីការអភិវឌ្ឍសង្គម លោកបណ្ឌិត ប៉ា ច័ន្ទរឿន មានប្រសាសន៍ថា មានមូលហេតុជាច្រើនដែលបង្កឱ្យមានអំពើរំលោភសេពសន្ថវៈនៅក្នុងបណ្ដាប្រទេសកំពុងអភិវឌ្ឍន៍ ក៏ដូចជាសង្គមខ្មែរ បណ្ដាលមកពីការខ្វះក្រមសីលធម៌របស់មនុស្ស បញ្ហាគ្រឿងញៀន គ្រឿងស្រវឹង សង្គមខ្វះប្រព័ន្ធការពារសុវត្ថិភាពដល់ស្ដ្រី មិនសូវយកចិត្តទុកដាក់ទាក់ទងនឹងការធានានូវតម្លៃភាពស្មើគ្នារវាងភេទក្នុងសង្គម បណ្ដាញផ្សព្វផ្សាយមិនបានកំណត់ពីប្រភេទរឿងដែលមនុស្សត្រូវមើល និងការចែករំលែកវីដេអូ ឬព័ត៌មានអាសអាភាសក្នុងបណ្ដាញទំនាក់ទំនងសង្គមជាដើម។
លោកបណ្ឌិត ប៉ា ច័ន្ទរឿន មានប្រសាសន៍ថា៖ «បើយើងនិយាយទៅ ការរំលោភសេពសន្ថវៈនេះ នៅក្នុងសង្គមណាក៏កើតមានដែរ តែគ្រាន់តែវាមានតិច ឬច្រើនទៅតាមសង្គមនីមួយៗ ជាពិសេសប្រទេសកំពុងអភិវឌ្ឍន៍ គឺមានការប្រឈមនឹងអំពើរំលោភសេពសន្ថវៈហ្នឹងច្រើន តាមការសិក្សាស្រាវជ្រាវផ្នែកអភិវឌ្ឍន៍សង្គម។ មូលហេតុគឺមានច្រើន ដែលកើតមកពីបុគ្គលខ្លួនឯង និងកត្តាសង្គមផ្ទាល់»។
បើតាមលោកបណ្ឌិត ប៉ា ច័ន្ទរឿន រដ្ឋាភិបាលកម្ពុជាគួរធ្វើការកំណត់ពីកត្តាដែលបង្កឱ្យមានការរំលោភសេពសន្ថវៈនេះ និងចាត់វិធានការផ្លូវច្បាប់ឱ្យតឹងរ៉ឹងទៅលើបញ្ហានេះ ជាងនេះទៅទៀត ត្រូវលើកកម្ពស់ការអប់រំ និងជំរុញពលរដ្ឋឱ្យលើកកម្ពស់ការយល់ដឹងពីពុទ្ធសាសនា ដើម្បីបញ្ចៀសការប្រព្រឹត្តិកាមដែលមិនត្រឹមត្រូវបែបនេះ៕