ចៅក្រមសាលាដំបូងរាជធានីភ្នំពេញនៅថ្ងៃនេះ បានចោទសួរលោក កឹម សុខា តែរឿងរ៉ាវកើតឡើងក្នុងរយៈពេលពីឆ្នាំ១៩៩៣ ដល់ឆ្នាំ២០០៧ ក្នុងពេលដែលលោកជាសមាជិកសភា និងជាប្រធានមជ្ឈមណ្ឌលសិទ្ធិមនុស្សកម្ពុជា។
មេធាវីការពារក្ដីឱ្យលោក កឹម សុខា គឺលោកស្រីមេធាវី ម៉េង សុភារី បានលើកឡើងថា ការលើកយករឿងដែលកើតឡើងពីឆ្នាំ១៩៩៣ ដល់២០០៧ មកដាក់បន្ទុកដល់កូនក្ដីរបស់លោកស្រី គឺជារឿងដែលផ្ទុយទៅនឹងច្បាប់។
លោកស្រី ម៉េង សុភារី៖ «បទល្មើស “សន្ទិដ្ឋិភាពជាមួយបរទេស” ហ្នឹង គឺទើបតែមានចែងក្នុងក្រមព្រហ្មទណ្ឌឆ្នាំ២០០៩ ហើយបទល្មើសហ្នឹងទើបតែយកមកអនុវត្ត ឆ្នាំ២០១០ទេ។ ហេតុដូច្នេះហើយ ការចោទប្រកាន់ទាំងឡាយណាដែលមានមុនឆ្នាំ២០១០ ដែលក្រមហ្នឹងចូលជាធរមាន ហើយដែលត្រូវបានយកបទបញ្ញត្តិផ្សេងៗយកមកអនុវត្តនៅក្នុងក្រមហ្នឹង គឺវាមិនមែនជាការចោទប្រកាន់មួយដែលត្រឹមត្រូវទៅតាមច្បាប់ទេ។ ព្រោះមុនច្បាប់ចែង គឺមិនមែនជាបទល្មើសទេ ហើយនេះមិនទាន់គិតដល់ថា អំពើដែលកូនក្ដីខ្ញុំធ្វើគឺសុទ្ធតែជាអំពើត្រឹមត្រូវ និងស្របច្បាប់»។
បន្ថែមពីលើនេះ មេធាវីការពារក្ដីលោក កឹម សុខា ម្នាក់ទៀតគឺលោកមេធាវី ចាន់ ចេន បានឱ្យដឹងថា ការសម្រេចនេះគឺគ្មានទម្ងន់អ្វីទៅលើកូនក្ដីរបស់លោកនោះទេ ដោយសារការងាររបស់កូនក្ដីលោកក្នុងរយៈពេលនោះគឺជាការងារស្របច្បាប់ និងមានការទទួលស្គាល់ត្រឹមត្រូវ។
លោក ចាន់ ចេង៖ «តាមរយៈនេះដែរ គឺគាត់បានបង្ហាញលិខិតរបស់ក្រសួងមហាផ្ទៃ ដែលអនុញ្ញាតទទួលស្គាល់មជ្ឈមណ្ឌលសិទ្ធិមនុស្សកម្ពុជា។ គាត់ក៏បានបង្ហាញពីលិខិតអនុញ្ញាតពីការបង្កើតគណបក្សសិទ្ធិមនុស្សទៅតុលាការផងដែរ។ គាត់បញ្ជាក់ថា រហូតមកដល់ពេលនេះ គាត់អត់មានបានប្រព្រឹត្តិដូចការចោទប្រកាន់ដែលមានភស្ភុតាងរយៈពេល២នាទី ក្នុងការដាក់បន្ទុកមកលើគាត់ទេ»។
បើតាមមេធាវីការពារក្ដីឱ្យលោក កឹម សុខា ចាប់ពីឆ្នាំ១៩៩៣ ដល់ឆ្នាំ១៩៩៨ លោកកឹម សុខា គឺជាសមាជិកសភា និងជាប្រធានគណៈកម្មការសិទ្ធិមនុស្សនៅសភាជាតិ ហើយពីឆ្នាំ១៩៩៩ ដល់ឆ្នាំ២០០២ មានតួនាទីសមាជិកព្រឹទ្ធសភា និងជាប្រធានគណៈកម្មាការទី១នៃព្រឹទ្ធសភា។ ក្រោយពីបញ្ចប់ការងារពីសមាជិកព្រឹទ្ធសភា លោកបានធ្វើជាប្រធានមជ្ឈមណ្ឌលសិទ្ធិមនុស្សកម្ពុជា មុននឹងលោកបង្កើតបក្សសិទ្ធិមនុស្សនៅឆ្នាំ២០០៧។
មេធាវីដើមបណ្ដឹងគឺលោក គី តិច យល់ថា ការកំណត់របស់តុលាការនេះជារឿងត្រឹមត្រូវ ដែលអាចឱ្យជនជាប់ចោទអាចគិតទាន់ និងឆ្លើយសំណួរបានច្បាស់លាស់។ ទោះជាយ៉ាងណា លោកបានវាយប្រហារទៅលើមេធាវីលោក កឹម សុខា ថាបានព្យាយាមរារាំងដំណើរនីតិវិធីនេះក្នុងសវនាការ។
លោកថា៖ «អ្វីដែលគាត់លើកនេះ ចំពោះខ្ញុំផ្ទាល់ ខ្ញុំយល់ឃើញថា ហាក់ដូចជាមានចេតនា (មេធាវីការពារក្ដី) ដាក់សំណួរទៅធ្វើឱ្យក្រុមប្រឹក្សាគាត់ឃាត់ ធ្វើឱ្យភាគីតំណាងអយ្យការ ភាគីមេធាវីដើមបណ្ដឹងរដ្ឋប្បវេណីជំទាស់។ អ៊ីចឹង គាត់ធ្វើឱ្យសាធារណជនដែលអង្គុយនៅក្នុងបន្ទប់សវនាការ ដែលមានគ្រប់សមាសភាពហ្នឹង វាយតម្លៃខុសទៅលើការផ្ដល់សិទ្ធិដែលរងនូវការចោទប្រកាន់ថា ខាងណោះនិយាយមិនបានទេ គឺឃាត់រហូត»។
សវនាការនៅថ្ងៃនេះ ត្រូវបានប្រធានក្រុមប្រឹក្សាជំនុំជម្រះ លោក កូយ សៅ សម្រេចលើកពេលទៅថ្ងៃពុធសប្ដាហ៍ក្រោយវិញ។ អ្នកឃ្លាំមើល និងអង្គការសមាគមចំនួន៨២ បានស្នើឱ្យតុលាការផ្សាយផ្ទាល់ក្នុងដំណើរការរឿងក្ដីនេះ ដើម្បីឱ្យសាធារណជនបានតាមដាន បង្ហាញពីតម្លាភាព និងមានទំនុកចិត្តពីសាធារណជន។
ប្រធានអតីតបក្សសង្គ្រោះជាតិ លោក កឹម សុខា ត្រូវបានរដ្ឋាភិបាលចោទថា «ក្បត់ជាតិ» និងឃុបឃិតជាមួយបរទេស បន្ទាប់ពីលោក និយាយក្នុងវីដេអូឃ្លីបនៅពេលជួបសំណេះសំណាលជាមួយអ្នកគាំទ្រនៅប្រទេសអូស្ត្រាលី តាំងពីឆ្នាំ២០១៣ កន្លងទៅ។ ប៉ុន្តែ នៅក្នុងសវនាការនៅសាលាដំបូងរាជធានីភ្នំពេញ ថ្ងៃម្សិលមិញ និងថ្ងៃនេះ លោក កឹម សុខា បានច្រានចោលការចោទប្រកាន់នេះ ដោយអះអាងថា វីឌីអូដែលយកមកចាក់ផ្សាយនោះ មានការកាត់តបំភ្លៃខ្លឹមសារការពិត៕