មន្ត្រីជាន់ខ្ពស់ក្រសួងសុខាភិបាលបានអះអាងថា មនុស្ស៤នាក់ ដែលប៉ះពាល់ផ្ទាល់ជាមួយបុរសជនជាតិជប៉ុន ដោយរកឃើញថាមានផ្ទុកជំងឺ Covid-19 ឬ ជំងឺកូរ៉ូណា គឺពួកគេមានសុខភាពធម្មតា មិនមានបញ្ហាអ្វីនោះទេ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន ប្រាប់វី.អូ.ឌី នៅល្ងាចថ្ងៃសុក្រនេះថា មនុស្ស៤នាក់ ដែលប៉ះពាល់ផ្ទាល់ជាមួយបុរសជនជាតិជប៉ុនកើតជំងឺកូរ៉ូណានោះ មានស្ត្រី២នាក់ និងប្រុស២នេះ។ ក្នុងចំណោមមនុស្សទាំង៤នាក់ គឺមានម្នាក់ជាជនជាតិជប៉ុន ភេទស្រី ដែលបានមករស់នៅស្រុកខ្មែរប្រមាណ៥ឆ្នាំមកហើយ ក្រៅពីនោះជាជនជាតិខ្មែរ ។
យ៉ាងនេះក្តី លោកស្រីបញ្ជាក់ថា ពួកគេទាំង៤នាក់ នៅមានសុខភាពធម្មតា គ្មានអ្វីប្រែប្រួលទេ ហើយក៏គ្មានការកើនកម្តៅក្នុងខ្លួនអ្វីនោះដែរ។
អ្នកស្រីបន្តថា៖ «អត់ទេ អត់មានអ្វីទាំងអស់ ខ្លួនគាត់កម្តៅក៏អត់មានឡើង។ អត់មានអ្វីទាំងអស់ ពួកគាត់ធម្មតាៗ»។
មន្ត្រីជាន់ខ្ពស់ក្រសួងសុខាភិបាលរូបនេះ ឱ្យដឹងទៀតថា ពួកគាត់ទាំង៤នាក់ ត្រូវបានដាក់ឱ្យនៅបន្ទប់ដាច់ដោយឡែកក្នុងមន្ទីរពេទ្យបង្អែកខេត្តសៀមរាប ដោយត្រូវបន្តតាមដានបន្ថែមទៀត។
នាយកដ្ឋានប្រយុទ្ធនឹងជំងឺឆ្លងនៅល្ងាចនេះ អះអាងថា កម្ពុជានៅមិនទាន់រកឃើញករណីថ្មីនៅឡើយទេ ដោយកម្ពុជានៅតែរក្សា ១ករណីដដែល ដែលកើតឡើងលើបុរសជាជនជាតិចិន ហើយគាត់បានព្យាបាលជាសះស្បើយ និងបានវិលត្រលប់ទៅប្រទេសចិនវិញ នៅថ្ងៃទី១០ ខែកុម្ភ: ហើយដែរ ។
មកទល់ថ្ងៃនេះ នាយកដ្ឋានមួយនេះបញ្ជាក់ថា កម្ពុជាបានធ្វើតេស្តលើពលរដ្ឋកើនឡើងដល់ ៤២៥ករណី តែមិនបានរកឃើញសញ្ញាវិជ្ជមាននៃមេរោគ COVID-19 នោះទេ ។
ដោយឡែក អ្នកប៉ះពាល់ផ្ទាល់ ៤នាក់ និង ៤០នាក់ប៉ះពាល់ប្រយោល ជាមួយអ្នកជំងឺជនជាតិជប៉ុន ក្រសួងបានតម្រូវឱ្យពួកគាត់នៅដាចក់ដោយឡែកពីគេចំនួន ១៤ថ្ងៃ និងតាមដានសុខភាពនោះ ប៉ុន្តែ មកទល់ពេលនេះ ពួកគាត់ពុំទាន់មានរោគសញ្ញានៅឡើយទេ។
យ៉ាងនេះក្តី ក្រសួងបន្តថា នឹងនៅតែបន្តតាមដានករណីនេះ ដោយសហការយ៉ាងជិតស្និទ្ធជាមួយអាជ្ញាធរដែនដី មន្រ្តីអង្គការសុខភាពពិភពលោក (WHO) មជ្ឈមណ្ឌលប្រយុទ្ធនឹងជំងឺឆ្លងសហរដ្ឋអាមេរិក (USCDC) និងវិទ្យាស្ថានប៉ាស្ទ័រកម្ពុជា (IPC)។
ឯកអគ្គរាជទូតកម្ពុជាប្រចាំប្រទេសជប៉ុន លោក អ៊ឹង រចនា បានផ្ញើលិខិតជូនរដ្ឋមន្ត្រីក្រសួងការបរទេសកាលពីថ្ងៃទី៥ ខែមីនា ម្សិលមិញ បានបញ្ជាក់ថា បុរសជនជាតិជប៉ុនអាយុជាង៤០ឆ្នាំមួយរូប បានធ្វើដំណើរចេញចូលកម្ពុជាចំនួន២លើក គឺលើកទីមួយនៅថ្ងៃទី១៦ ខែកុម្ភៈ និងលើកទីពីរនៅថ្ងៃទី២៨ ខែកុម្ភៈ។
បុរសជប៉ុននោះបានចេញរោគសញ្ញាដំបូងនៅប្រទេសភីលីពីននាថ្ងៃទី២១ និងរោគសញ្ញាលើកទីពីរនៅកម្ពុជានាថ្ងៃ៣ ខែមីនា មុនចាកចេញពីប្រទេសកម្ពុជាតាមជើងយន្តហោះខេត្តសៀមរាប ទៅកាន់ព្រលានយន្តហោះ Tan Son Nhat ក្រុងហូជីមីញ ប្រទេសវៀតណាម មុនពេលបន្តដំណើរទៅព្រលានយន្តហោះ Nagoya ប្រទេសជប៉ុននៅថ្ងៃទី៤ ខែមីនា។ បុរសជនជាតិជប៉ុនរូបនោះ ត្រូវបានរកឃើញថា គាត់ផ្ទុកជំងឺកូរ៉ូណានៅក្នុងប្រទេសរបស់ខ្លួន ក្រោយពេលគាត់មានអាការៈក្អក និងពិបាកដកដង្ហើម៕
