មន្ត្រីជាន់ខ្ពស់ក្រសួងការបទេស បានឲ្យដឹងថា ពលករកម្ពុជាចំនួន ៦៨នាក់ ដែលលួចឆ្លងដែនទៅប្រទេសថៃដោយខុសច្បាប់ ត្រូវបានអាជ្ញាធរថៃចាប់បញ្ជូនត្រឡប់មកកម្ពុជាវិញកាលពីថ្ងៃទី៨ ខែឧសភានេះ។
អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ប្រាប់វីអូឌីនៅថ្ងៃនេះថា អាជ្ញាធរថៃបានចាប់ពលករកម្ពុជាលួចឆ្លងដែនខុសច្បាប់ចំនួន ៦៨នាក់ ក្នុងនោះមានស្រី ២៥នាក់ និងកុមារ ៦នាក់ ស្ថិតនៅចំណុចណងព្រឺ ស្រុកអារ័ញ្ញប្រាថេត ខេត្តស្រះកែវ កាលពីថ្ងៃទី៨ ខែឧសភា ឆ្នាំ២០២០នេះ។
លោកបន្តថា ក្រោយពីឃាត់ខ្លួន ស្ថានអគ្គកុងស៊ុលកម្ពុជាប្រចាំនៅតំបន់នោះ បានទំនាក់ទំនងទៅអាជ្ញាធរថៃនៅវេលាម៉ោង ៦ល្ងាចក្នុងថ្ងៃដដែលនោះ។ នៅពេលនោះអាជ្ញាធរថៃបានសាកសួរ និងធ្វើកំណត់ហេតុរួច ក៏បញ្ជូនពួកគេឲ្យត្រឡប់មកកម្ពុជាវិញតាមច្រកគោកធ្យូង (អូរបីជាន់) ស្ថិតនៅស្រុកអូរជ្រៅ ខេត្តបន្ទាយមានជ័យ នៅថ្ងៃដដែលផងដែរ។
លោក កុយ គួង ឆ្លើយយ៉ាងខ្លីថា មិនច្បាស់នោះទេ នៅពេលត្រូវបានសាកសួរបន្ថែមថា តើពលករកម្ពុជាទាំងនោះ បានលួចឆ្លងដែនចូលទឹកដីថៃដោយខុសច្បាប់ ដើម្បីរកការងារធ្វើ ឬទៅធ្វើអ្វី?
