អតីតប្រធានគណបក្សសង្គ្រោះជាតិ លោក កឹម សុខា អះអាងថា ប្រកាសបើកជួបជាមួយនឹងឯកអគ្គរដ្ឋទូត-ឯកអគ្គរាជទូត នៃប្រទេសកាន់លទ្ធិប្រជាធិបតេយ្យសំខាន់ៗមួយចំនួនដែលមានស្ថានទូតនៅភ្នំពេញ ដោយផ្ទាល់ នៅគេហដ្ឋានរបស់លោកជាបន្តបន្ទាប់ក្នុងសប្តាហ៍នេះ។
សរសេរលើទំព័រហ្វេសប៊ុករបស់ខ្លួនកាលពីថ្ងៃម្សិលមិញ លោក កឹម សុខា លើកឡើងថា លោកនឹងជួបតំណាងប្រទេសប្រជាធិបតេយ្យដែលមានវត្តមាននៅភ្នំពេញ ហើយប្រទេសជាមិត្តនៅឆ្ងាយក៏បានទាក់ទងលោកតាមបណ្តាញសង្គមដើម្បីសួរសុខទុក្ខទៀតផង។
ហ្វេសប៊ុកលោក កឹម សុខា សរសេរបន្តថា៖ «ដោយឡែក ឯកអគ្គរដ្ឋទូត-ឯកអគ្គរាជទូត នៃប្រទេសជាមិត្តប្រចាំព្រះរាជាណាចក្រកម្ពុជាមួយចំនួនទៀត ដែលមិនមានទីតាំងស្ថានទូតនៅក្នុងទឹកដីកម្ពុជា ស្របពេលមានជំងឺកូវីដ១៩ មិនអាចមកជួបខ្ញុំផ្ទាល់បាន ក៏បានផ្ញើសារ និងទំនាក់ទំនងតាមបណ្តាញសង្គមមកសួរសុខទុក្ខខ្ញុំផងដែរ»។
កាលពីថ្ងៃម្សិលមិញផងដែរ ឯកអគ្គរដ្ឋទូតអាល្លឺម៉ង់ប្រចាំកម្ពុជា លោក គ្រីស្ទាន ប៊ឺហ្គ័រ (Christian Berger) នាពេលព្រឹក និងឯកអគ្គរដ្ឋទូតនៃគណៈប្រតិភូសហភាពអឺរ៉ុបប្រចាំប្រទេសកម្ពុជា លោកស្រី Carmen Moreno នាពេលរសៀល បានចូលជួបជាមួយលោក កឹម សុខា នៅគេហដ្ឋានរបស់លោកក្នុងខណ្ឌទួលគោក រាជធានីភ្នំពេញ។
អតីតនាយខុទ្ទកាល័យលោក កឹម សុខា គឺលោក មុត ចន្ថា បានលើកឡើងថា ក្នុងជំនួបរវាងអតីតមេបក្សប្រឆាំងរូបនេះ ជាមួយតំណាងសហគមន៍អន្តរជាតិលោកសេរីពីរដាច់ដោយឡែកពីគ្នានោះ ទាំងភាគីអាល្លឺម៉ង់ និងភាគីសហភាពអឺរ៉ុប បានសាទរចំពោះជំនួបរវាងលោកនាយករដ្ឋមន្ត្រី ហ៊ុន សែន និងអតីតប្រធានគណបក្សសង្រ្គោះជាតិ លោក កឹម សុខា កាលពីថ្ងៃទី៥ ខែឧសភា។
ប្រភពដដែលបន្តថា ភាគីអន្តរជាតិទាំងពីរ បានចាត់ទុកជំនួបរវាងលោក ហ៊ុន សែន និងលោក កឹម សុខា ពេលនោះ ថាជាជំហានវិជ្ជមានមួយសម្រាប់កម្ពុជា។
លោក មុត ចន្ថា បន្ថែមថា ក្រៅពីសាទរ ក្នុងជំនួបនោះ ទាំងតំណាងអាល្លឺម៉ង់ និងតំណាងអឺរ៉ុប ក៏បានពិភាក្សាជាមួយលោក កឹម សុខា អំពីសុខទុក្ខ និងជីវភាពរបស់ប្រជាពលរដ្ឋខ្មែរក្នុងស្ថានភាពជំងឺកូវីដ១៩ ក្នុងស្ថានភាពកូវីដ-១៩ និងអំពីស្ថានភាពទៅថ្ងៃអនាគតផងដែរ។
កាលពីរសៀលថ្ងៃទី០៥ ខែឧសភា ឆ្នាំ២០២០ លោក កឹម សុខា បានដឹកនាំប្រតិភូរបស់ខ្លួនជាច្រើនរូប ចូលគោរពវិញ្ញាណក្ខន្ធសពអ្នកឧកញ៉ា ព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី មាតាក្មេកលោក ហ៊ុន សែន និងជាមាតាបង្កើតលោកស្រី ប៊ុន រ៉ានី ហ៊ុនសែន។
នាឱកាសនោះហើយ ដែលធ្វើឱ្យលោក ហ៊ុន សែន និងលោក កឹម សុខា បានជួបជជែកគ្នារយៈពេលប្រមាណ ៥០នាទី ក្រោយពេលអ្នកទាំងពីរខានបានជួបគ្នាអស់រយៈពេលប្រមាណ ៤ឆ្នាំ៕