មន្ត្រីជាន់ខ្ពស់ក្រសួងការបរទេសកម្ពុជា អះអាងថា កម្ពុជានៅតែប្រកាន់ជំហរទាមទារឱ្យភាគីវៀតណាមរុះរើតង់ដែលបោះដោយឯកតោភាគីនៅតំបន់មិនទាន់ឯកភាពគ្នាចេញឱ្យអស់ ដោយថា អាជ្ញាធរខេត្ត និងអាជ្ញាធរមូលដ្ឋាន ត្រូវបន្តតាមដានបញ្ហានេះឱ្យបានជាប់ជាប្រចាំ។
ការប្រកាសជំហរនេះ ក្រោយពេលភាគីវៀតណាមបានបោះតង់ ២៥៦កន្លែងនៅតាមបណ្តោយព្រំដែនកម្ពុជា-វៀតណាមដោយឯកតោភាគី ក្រោមហេតុផលដើម្បីបង្ការការឆ្លងរីករាលដាលជំងឺកូរ៉ូណា ឬកូវីដ១៩។
ថ្លែងប្រាប់អ្នកសារព័ត៌មាននៅព្រឹកថ្ងៃទី២៣ ខែមិថុនា អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា ការបោះតង់ជាបណ្តោះអាសន្នដើម្បីការពារជំងឺកូវីដ១៩ ពីសំណាក់ភាគីវៀតណាម អាចធ្វើទៅបាន គឺបោះក្នុងទឹកដីរបស់ខ្លួននៅតំបន់ដែលឯកភាពគ្នារួចប៉ុណ្ណោះ មិនអាចបោះតង់នៅតំបន់មិនទាន់ឯកភាពគ្នានោះឡើយ។
ជាមួយគ្នានេះ លោកបញ្ជាក់ថា កម្ពុជានៅតែប្រកាន់ជំហរទាមទារឱ្យភាគីវៀតណាមរុះរើតង់ដែលបោះនៅតំបន់មិនទាន់ឯកភាពគ្នាឱ្យអស់ និងឱ្យបានឆាប់។
លោក កុយ គួង មានប្រសាសន៍ថា៖ «យើង! ជំហររបស់យើងគឺ ស្នើឱ្យវៀតណាមត្រូវតែរុះរើតង់ចេញពីតំបន់ដែលមិនទាន់មានការកំណត់ព្រំដែនច្បាស់លាស់ហ្នឹង។ យើងមិនទាន់បានកំណត់ពេលទេ ប៉ុន្តែ យើងស្នើឱ្យភាគីវៀតណាមរើចេញឱ្យបានឆាប់»។
កាលពីថ្ងៃទី១១ ខែមិថុនា ប្រធានគណៈកម្មាធិការទទួលបន្ទុកកិច្ចការព្រំដែនកម្ពុជា លោក វ៉ា គឹមហុង បានអះអាងប្រាប់វី.អូ.ឌីថា ចាប់តាំងពីវិបត្តិជំងឺកូរ៉ូណាផ្ទុះឡើង ភាគីវៀតណាមបានបោះតង់នៅតាមបណ្តោយព្រំដែនកម្ពុជា-វៀតណាម ទាំងតំបន់មិនទាន់ឯកភាព និងតំបន់ឯកភាពគ្នារួច មានចំនួន ២៥៦ទីតាំង។
កាលពីថ្ងៃទី២២ ខែឧសភាកន្លងមកនេះ ស្ថានទូតវៀតណាមប្រចាំកម្ពុជា បានលើកឡើងនៅលើទំព័រហ្វេសប៊ុកផ្លូវការរបស់ខ្លួនថា ករណីវៀតណាមបោះតង់ ៣១ទីតាំងជាប់ព្រំដែនកម្ពុជា-វៀតណាម ស្ថិតក្នុងខេត្តកណ្តាលកាលពីខែមីនានោះ គឺភាគីវៀតណាមបានរុះរើតង់ទាំងនោះចេញតាំងពីមុនថ្ងៃទី១៣ ខែឧសភា ហើយការបោះតង់ផ្សេងទៀតធ្វើឡើងក្នុងទឹកដីក្រោមការគ្រប់គ្រងរបស់វៀតណាមប៉ុណ្ណោះ។
យ៉ាងនេះក្តី អភិបាលខេត្តកណ្តាល លោក គង់ សោភ័ណ្ឌ មានប្រសាសន៍ថា មកទល់ពេលបច្ចុប្បន្ននេះ ភាគីវៀតណាមបានរុះរើតង់ចំនួន ៧ទីតាំងប៉ុណ្ណោះ ដោយឡែកតង់ចំនួន ២៤ទីតាំងទៀត នៅមិនទាន់រុះរើចេញពីតំបន់មិនទាន់ឯកភាពគ្នានោះឡើយ។
បញ្ហានេះ លោកថា ខាងអាជ្ញាធរខេត្ត និងកងកម្លាំងព្រំដែនកម្ពុជា នៅតែជំរុញឱ្យភាគីវៀតណាមរុះរើតង់ចេញពីតំបន់មិនទាន់ឯកភាពគ្នាឱ្យអស់ ហើយការងារនេះធ្វើឡើងដោយយកចិត្តទុកដាក់ និងត្រួតពិនិត្យជាប្រចាំ ដោយលោកសង្ឃឹមថា ភាគីវៀតណាមនឹងព្រមរុះរើតង់ទាំងនោះក្នុងពេលឆាប់ៗខាងមុខនេះផងដែរ។
លោក គង់ សោភ័ណ្ឌ មានប្រសាសន៍បន្ថែមថា៖ «ការដែលយើងខិតខំហ្នឹង ទីមួយគឺយើងដើរល្បាតមើលកងកម្លាំងរបស់យើងដូចខ្ញុំនិយាយមិញ ដោយយកចិត្តទុកដាក់បំផុត មិនឱ្យមានអ្វីដែលមកបំពារបំពានថែមទៀតទេ។ ទីពីរ យើងតវ៉ាលើផ្លូវច្បាប់ ដែលខាងរដ្ឋបាលខេត្តអាងយ៉ាងហ្នឹង ក៏គាត់បានប្រាប់មកខេត្តកណ្តាលដែរ ថាគាត់ព្រមរុះរើ។ ប៉ុន្តែ ដោយសារករណីគាត់ដាក់តង់នេះ ដោយសារកន្លងមកពាក់ព័ន្ធការទប់ស្កាត់ជំងឺកូវីដ»។
ប្រធានចលនានិស្សិតដើម្បីលទ្ធិប្រជាធិបតេយ្យ និងជាអ្នកតាមដែនបញ្ហាព្រំដែនកម្ពុជា លោក ទូច វិបុល សាទរចំពោះការប្រកាសជំហរបែបនេះរបស់រដ្ឋាភិបាលកម្ពុជា ក្នុងការទាមទារឱ្យវៀតណាមដកតង់ចេញពីតំបន់មិនទាន់ឯកភាពគ្នានេះ។
ប៉ុន្តែ លោកចង់ឃើញជំហររដ្ឋាភិបាលច្បាស់លាស់បន្ថែមទៀត តាមរយៈយន្តការអន្តរជាតិ យន្តការកិច្ចព្រមព្រៀងសន្តិភាពក្រុងប៉ារីសជាដើម ចំពោះការព្យាយាមរំលោភលើអធិបតេយ្យភាពកម្ពុជារហូតមក ពីសំណាក់វៀតណាម និងជំហរនៃការទាមទារឱ្យលុបចោលរាល់សន្ធិសញ្ញា ឬកិច្ចព្រមព្រៀងជាមួយវៀតណាមដែលខុសច្បាប់ពាក់ព័ន្ធបញ្ហាព្រំដែននេះទៀតផង។
លោក ទូច វិបុល មានប្រសាសន៍ថា៖ «អ្វីដែលកម្ពុជាត្រូវធ្វើបន្ត គឺត្រូវជម្រាបរាយការណ៍ទៅដល់សមាគមអាស៊ាន ដោយគេមានគោលការណ៍ជាក់ច្បាស់ថា ប្រទេសមួយមិនអាចរំលោភទៅលើអធិបតេយ្យភាពរបស់ប្រទេសមួយបានទេ ដែលផ្ទុយពីគោលការណ៍របស់អាស៊ាន។ នេះជាអ្វីដែលរដ្ឋាភិបាលត្រូវធ្វើបន្ត ហើយត្រូវរាយការណ៍ជូនទៅដល់អង្គការសហប្រជាជាតិ ជុំវិញបញ្ហាប្រទេសវៀតណាមតែងតែមករំលោភលើដែនដីកម្ពុជា ដែលផ្ទុយទាំងស្រុងពីសន្ធិសញ្ញានានា របស់អង្គការសហប្រជាជាតិ មិនឱ្យប្រទេសមួយទៅរំលោភលើប្រទេសមួយទៀត»។
កម្ពុជាមានព្រំដែនគោកជាប់ប្រទេសវៀតណាមប្រវែង ១២៧០គីឡូម៉ែត្រ ហើយរដ្ឋាភិបាលប្រទេសទាំងពីរសម្រេចលើកិច្ចការបោះបង្គោលខណ្ឌសីមាបានចំនួន ៨៤ភាគរយហើយ។
ប្រធានគណៈកម្មាធិការព្រំដែនកម្ពុជា លោក វ៉ា គឹមហុង ឱ្យដឹងថា ការបោះបង្គោលព្រំដែនជាផ្លូវការនៅសល់ ១៦ភាគរយទៀត ជាបញ្ហាវែងឆ្ងាយ ប៉ុន្តែ រដ្ឋាភិបាលកំពុងធ្វើការចរចាដើម្បីដោះស្រាយឈានទៅបញ្ចប់នៅពេលខាងមុខ៕
