រដ្ឋមន្ត្រីការបរទេសជប៉ុន លោក ម៉ូតេហ្គី តូស៊ីមីត្សឹ និយាយថា ជប៉ុនបន្តគាំទ្រកម្ពុជាដើរលើមាគ៌ាទៅរកទិសដៅអភិវឌ្ឍន៍តាមបែបប្រជាធិបតេយ្យ ខណៈសហភាពអឺរ៉ុបកំពុងដាក់សម្ពាធឱ្យរដ្ឋាភិបាលកម្ពុជា ស្តារស្ថានភាពសិទ្ធិមនុស្សនិងប្រជាធិបតេយ្យ។
លោក ម៉ូតេហ្គី តូស៊ីមីត្សឹ លើកឡើងបែបនេះក្នុងសារមួយដែលបង្ហោះលើទំព័រហ្វេសប៊ុករបស់ស្ថានទូតជប៉ុនប្រចាំកម្ពុជាអំឡុងពេលលោកមកបំពេញទស្សកិច្ចកម្ពុជានៅថ្ងៃនេះ។
រដ្ឋមន្ត្រីការបរទេសជប៉ុនរូបនេះ និយាយទៀតថា ក្រោយសង្គ្រាមស៊ីវិលនៅកម្ពុជា ប្រទេសជប៉ុនបានរួមដំណើរជួយគាំទ្រដល់ដំណើរការស្វែងរកសន្តិភាព។
លោកបន្តថា ការស្តារឡើងវិញ ក៏ដូចជាការអភិវឌ្ឍជាបន្តបន្ទាប់របស់ប្រទេសកម្ពុជា ជាមូលដ្ឋានគ្រឹះនៃចំណងមិត្តភាពនៃប្រទេសទាំងពីរ។ លោកថា ទំនាក់ទំនងនេះមានភាពស៊ីជម្រៅថែមទៀតក្នុងវិស័យនយោបាយ សន្តិសុខ សេដ្ឋកិច្ច វប្បធម៌ និងការផ្លាស់ប្តូរធនធានមនុស្សជាដើម។
លោក ម៉ូតេហ្គី តូស៊ីមីត្សឹ បន្តថា កាលពីខែមករាឆ្នាំនេះ លោកបានជួបយុវជនកម្ពុជាដែលមានចំណាប់អារម្មណ៍លើនយោបាយចំនួន១០រូប ដែលបានមកធ្វើទស្សនាកិច្ចនៅប្រទេសជប៉ុន លោកថា ពួកគាត់ទាំងអស់គ្នាបានសម្តែងចេញនូវស្មារតីចង់អភិវិឌ្ឍប្រទេសរបស់ពួកគេខ្លាំងណាស់។
លោក ម៉ូតេហ្គី តូស៊ីមីត្សឹ និយាយទៀតថា ម្យាងវិញទៀត ដូចគ្នានឹងយុគសម័យអង្គរដែលបានរីកចម្រើនលូតលាស់ដោយការរួមរស់ជាមួយគ្នា និងការលាយបញ្ចូលគ្នារវាងសាសនាហិណ្ឌូ និងព្រះពុទ្ធសាសនា ប្រទេសកម្ពុជាមានប្រវត្តិ និងប្រពៃណីទទួលយកវប្បធម៌ គំនិតខុសៗគ្នា និងធនធានមនុស្សផ្សេងៗគ្នាផងដែរ។
លោក ម៉ូតេហ្គី តូស៊ីមីត្សឹ និយាយថា៖ «ប្រទេសជប៉ុននឹងបន្តផ្តល់ការគាំទ្រដើម្បីឱ្យប្រទេសកម្ពុជាអាចដើរលើមាគ៌ាសំដៅទៅរកទិសដៅនៃការអភិវឌ្ឍតាមបែបប្រជាធិបតេយ្យរបស់ខ្លួន ដោយបញ្ចូលកម្លាំងយុវជនជាសសរទ្រូង»។
សហភាពអឺរ៉ុបកាលពីថ្ងៃទី១២ខែសីហា បានប្រកាសថា ផលិតផលមួយចំនួនក្នុងចំណោមផលិតផលរបស់កម្ពុជា ដូចជា សម្លៀកបំពាក់ ផលិតផលស្បែកជើង និងផលិតផលសម្រាប់ការធ្វើដំណើរ នឹងត្រូវជាប់កាតព្វកិច្ចបង់ពន្ធសម្រាប់ការនាំចូលទៅកាន់ទីផ្សារសហគមន៍អឺរ៉ុប។
ប៉ុន្តែ ប្លុកលោកសេរីមួយនេះ នៅតែដាក់លក្ខខណ្ឌឱ្យបក្សកាន់អំណាច បើកការសន្ទនានយោបាយឱ្យអតីតបក្សប្រឆាំងបានដំណើរការឡើងវិញ ដោយឈរលើយន្តការប្រជាធិបតេយ្យ បើទោះបីប្រកាសពីការចាប់ផ្ដើមអនុវត្តការដកផ្នែកខ្លះនៃប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ឬ EBA ពីកម្ពុជាជាផ្លូវការ។
សហភាពអឺរ៉ុប បញ្ជាក់ថា ប្រព័ន្ធអនុគ្រោះពន្ធ EBA ដែលកម្ពុជាទទួលបាននេះ ត្រូវបានដកជាបណ្តោះអាសន្នដោយសារក្ដីកង្វល់យ៉ាងធ្ងន់ធ្ងរទាក់ទិននឹងបញ្ហាសិទ្ធិមនុស្ស ដែលកើតមាននៅក្នុងប្រទេសកម្ពុជា។
សហភាពអឺរ៉ុប ក៏និយាយផងដែរថា៖ «អាជ្ញាធរកម្ពុជាគួរចាត់វិធានការដើម្បីស្តារសេរីភាពនយោបាយនៅក្នុងប្រទេសនេះ បង្កើតឡើងវិញនូវលក្ខខណ្ឌចាំបាច់សម្រាប់បក្សប្រឆាំងដែលអាចជឿទុកចិត្តបាននិងតាមបែបប្រជាធិបតេយ្យ និងដើម្បីចាប់ផ្តើមដំណើរការផ្សះផ្សារជាតិតាមរយៈការសន្ទនារួមនិងពិតប្រាកដ»៕