មន្ត្រីជាន់ខ្ពស់ក្រសួងអប់រំបានអះអាងកាលពីថ្ងៃព្រហស្បតិ៍ថា គ្រឹះស្ថានសិក្សាឯកជនប្រមាណ៤០០ បានបើកដំណើរការឡើងវិញជាបណ្តើរៗហើយកាលពីខែមុន ក្នុងចំណោមគ្រឹះស្ថានសិក្សា៦០០កន្លែងដែលបានដាក់ពាក្យស្នើសុំបើកដំណើរការឡើងវិញនៅ «ដំណាក់កាលទី២» នេះ។
សាសា Bamboo International School និង Home of English International School ក្នុងរាជធានីភ្នំពេញ ស្ថិតក្នុងចំណោមគ្រឹះស្ថានសិក្សាដែលចាប់ផ្តើមបើកទ្វារទទួលសិស្សចូលរៀនជាលើកដំបូងកាលពីថ្ងៃព្រហស្បតិ៍ ជាថ្ងៃទី១នៃខែថ្មីនេះ ចាប់តាំងពីបិទទ្វារអស់រយៈពេល៦ខែកន្លងមកដោយសារតែជំងឺកូវីដ១៩។
ប្រធានរដ្ឋបាលនៅសាលា Bamboo International School កញ្ញា សុក ងីម បាននិយាយថា៖ «នេះគឺជាអ្វីដែលយើងបានរង់ចាំ ហើយខាងសាលារំពឹងយូរហើយថា យើងអាចបើកបាន»។
គ្រឹះស្ថានសិក្សាក្នុងប្រទេសកម្ពុជាត្រូវបានបិទទ្វារទូទាំងប្រទេសកាលពីថ្ងៃទី១៦ ខែមីនា ចំពេលមានការរីករាលដាលនៃវីរុសកូរ៉ូណា។ គ្រឹះស្ថានសិក្សាឯកជនចំនួន២០ ត្រូវបានអនុញ្ញាតឱ្យសាកល្បងបើកដំណើរការឡើងវិញកាលពីថ្ងៃទី១ ខែសីហា ហើយបន្តបើកដំណើរការបែបសម្រិតសម្រាំងនៅដំណាក់កាលបន្ទាប់កាលពីខែកញ្ញា។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់វីអូឌីកាលពីថ្ងៃព្រហស្បតិ៍ថា ការបើកដំណើរការឡើងវិញនៅដំណាក់កាលទី២នេះ បានចាប់ផ្តើមកាលពីថ្ងៃទី៨ ខែកញ្ញា ហើយនឹងបន្តរហូតដល់ខែវិច្ឆិកា។
លោកបានមានប្រសាសន៍ថា គ្រឹះស្ថានសិក្សាឯកជន៦០០បានដាក់ពាក្យស្នើសុំបើកដំណើរការឡើងវិញ ហើយក្នុងនោះ មានគ្រឹះស្ថាន៤០០បានបើកដំណើរការបន្តបន្ទាប់រួចហើយ ក្រោយពីការត្រួតពិនិត្យពីក្រុមការងារក្រសួង។
លោក រស់ សុវាចា បានមានប្រសាសន៍ថា៖ «ប្រសិនបើគ្រឹះស្ថានសិក្សានោះឆ្លើយតបទៅតាមគោលការណ៍ស្តង់ដារសុវត្ថិភាពដែលមានចែងក្នុង SOP របស់ក្រសួងអប់រំ យុវជន និងកីឡា នោះនឹងទទួលបានការអនុញ្ញាតឱ្យបើកឡើងវិញក្នុងដំណាក់កាលទី២»។
គោលការណ៍ប្រតិបត្តិស្តង់ដារ (SOP) របស់ក្រសួងអប់រំ រួមមាន ការតម្រូវឱ្យគ្រឹះស្ថានសិក្សារក្សាសីតុណ្ហភាពថ្នាក់រៀនមិនឱ្យក្រោម២៤អង្សាសេ ពាក់ម៉ាស់និងស្រោមដៃ សម្អាតបន្ទប់រៀន និងបែងចែកចំនួនសិស្សដើម្បីរក្សាគម្លាតសង្គមផងដែរ។
ក្នុងគោលការណ៍ប្រតិបត្តិស្តង់ដារនេះ ក្រសួងក៏ព្រមានផងដែរថា ក្នុងករណីគណៈគ្រប់គ្រងគ្រឹះស្ថានសិក្សាទាំងនោះ ពុំបានអនុវត្តតាមដោយយកចិត្តទុកដាក់និងបណ្តាលឱ្យមានការផ្ទុះឆ្លងរាលដាលជំងឺកូវីដ១៩នៅគ្រឹះស្ថានសិក្សាជាយថាហេតុ គណៈគ្រប់គ្រងគ្រឹះស្ថានសិក្សានោះ ត្រូវប្រឈមនឹងវិធានការច្បាប់និងវិធានការរដ្ឋបាលតាមលិខិតបទដ្ឋានគតិយុត្តិជាធរមាន។
លោក រស់ សុវាចា បានមានប្រសាសន៍ថា៖ «ក្រសួងអប់រំ យុវជន និងកីឡា នឹងបន្តយកចិត្តទុកដាក់យ៉ាងខ្ជាប់ខ្ជួនតាមដានស្ថានការណ៍វិវត្តរបស់ជំងឺកូវីដ១៩»។
លោកបានបន្ថែមថា ក្រសួងសង្ឃឹមថា នឹងចាប់ផ្តើមការបើកដំណើរឡើងវិញនៅដំណាក់កាលទី៣ នៅខែវិច្ឆកា។
ត្រឹមថ្ងៃសុក្រនេះ ប្រទេសកម្ពុជារកឃើញអ្នកវិជ្ជមានកូវីដ១៩ សរុប២៧៨ករណី ចាប់តាំងពីខែមករា ខណៈអ្នកជាសះស្បើយមាន២៧៥ករណី ហើយ៣ករណីកំពុងសម្រាកព្យាបាល។ ជាមួយគ្នានោះដែរ លោកស្រី ឱ វណ្ណឌីន បានប្រាប់វីអូឌី កាលពីល្ងាចថ្ងៃព្រហស្បតិ៍ថា ក្រុមឆ្លើយតបបន្ទាន់របស់ក្រសួង បានស្រាវជ្រាវរកឃើញថា អ្នកប៉ះពាល់ដោយផ្ទាល់និងដោយប្រយោលជាមួយបុរសជនជាតិហុងគ្រីដែលតេស្តរកឃើញវិជ្ជមានវីរុសកូវីដ១៩កាលពីមួយសប្តាហ៍មុននោះ គឺមានសរុប៣៦នាក់ ក្នុងខេត្តសៀមរាប។
ដោយឡែកនៅភ្នំពេញ ក្រុមការងារឆ្លើយតបបន្ទាន់របស់ក្រសួង ក៏បានស្រាវជ្រាវរកអ្នករួមដំណើរជាមួយបុរសហុងគ្រីរូបនេះផងដែរ ដែលមួយចំនួនតូចបានចាកចេញពីប្រទេសកម្ពុជារួចហើយ។
លោកស្រី ឱ វណ្ណឌីន មានប្រសាសន៍ថា មកដល់ត្រឹមថ្ងៃពុធ លទ្ធផលវិភាគសំណាករបស់អ្នកទាំងអស់នោះ គឺអវិជ្ជមាន។
លោកស្រីមានប្រសាសន៍ថា៖ «មិនមាននរណាដែលមានឆ្លងនូវវីរុសកូវីដ១៩នោះទេ»។
មានមនុស្សជាង១លាននាក់បានស្លាប់ដោយសារវីរុសកូវីដ១៩ នៅក្នុងចំណោមករណីឆ្លងសរុប៣៣,៧លានករណីនៅទូទាំងពិភពលោក។
កញ្ញា សុក ងីម មកពីសាលា Bamboo International School បាននិយាយថា សាលារបស់កញ្ញាទទួលបានការអនុញ្ញាតឱ្យបើកដំណើរការឡើងវិញកាលពីថ្ងៃអង្គារ ហើយថា សាលានេះបានរៀបចំកន្លែងលាងដៃ ព្រមទាំងដាក់អាល់កុលនិងជែលសម្អាតដៃ បង្កើនការសម្អាត និងបន្ថយចំនួនសិស្សតាមបន្ទប់រៀនជាដើម។
សុក ងីម បានបន្ថែមថា ការបិទសាលាកន្លងមកនេះ បង្កផលប៉ះពាល់ច្រើនមកលើសាលា ឪពុកម្តាយ និងក្មេងៗផងដែរ។ កញ្ញាបានបន្ថែមថា ប្រសិនបើសាលាបន្តបិទយូរ ខណៈសាលាផ្សេងបើកនោះ វានឹងមានហានិភ័យខ្ពស់ក្នុងការបាត់បង់អតិថិជន។
សុក ងីម បាននិយាយថា៖ «យើងមានហានិភ័យខ្ពស់ដែរមួយរយៈនេះ។ អ៊ីចឹងបានជាយើងព្យាយាមធ្វើម៉េចឱ្យបានបើកលឿន»។
អ្នកស្រី ថាន ស្រីមុំ អាយុ៣៣ឆ្នាំ ដែលមានកូនរៀននៅសាលា ប៊ែលធីអន្តរជាតិ បាននិយាយថា សាលាកូនប្រុសរបស់អ្នកស្រីបានបើកឡើងវិញកាលពីសប្តាហ៍មុន។ អ្នកស្រីបាននិយាយថា អ្នកស្រីសប្បាយចិត្តដែលកូនប្រុសរបស់អ្នកស្រីវិលត្រឡប់ចូលរៀនតាមថ្នាក់វិញ។
អ្នកស្រី ថាន ស្រីមុំ បាននិយាយថា៖ «រៀនតាមអនឡាញមានការលំបាកដែរ ហើយវាមិនសូវចេះដូចជា [រៀន] នៅសាលាទេ។ ជួនកាល ក្មេងខ្លះវាខ្ជិល […] ជួនកាលឪពុកម្តាយរវល់ ហើយអត់បានប្រាប់ អ៊ីចឹងវាអត់មើល [សៀវភៅ] ខ្លួនឯងដែរ»។
ទាក់ទិននឹងសុវត្ថិភាពពីជំងឺកូវីដ១៩ អ្នកស្រីបាននិយាយថា អ្នកស្រីមិនសូវបារម្ភពេកទេ ដោយសារតែសាលាឯកជនមានសិស្សតិចបើធៀបនឹងសាលារដ្ឋ ហើយអ្នកស្រីមានទំនុកចិត្តថា ពួកគេនឹងអនុវត្តតាមគោលការណ៍ណែនាំរបស់ក្រសួង។
គ្រឹះស្ថានសិក្សាសាធារណៈបានបើកឡើងវិញសម្រាប់ថ្នាក់ទី៩និងទី១២ ដែលសិស្សានុសិស្សត្រូវត្រៀមសម្រាប់ការប្រឡង។
សាលាមួយចំនួនទៀតក៏បានបើកដំណើរការឡើងវិញផងដែរ ប៉ុន្តែមានការឆ្លាស់វេននិងកាត់បន្ថយចំនួនសិស្សក្នុងថ្នាក់រៀន ចំណែកគ្រឹះស្ថានសិក្សាសាធារណៈនៅទីរួមខេត្តក្រចេះ មណ្ឌលគិរី រតនគិរី និងខេត្តស្ទឹងត្រែង ដែលស្ថិតនៅដាច់ស្រយាលនិងមិនសូវមានលទ្ធភាពសិក្សាតាមប្រព័ន្ធឌីជីថលនោះ ក៏ត្រូវបានអនុញ្ញាតឱ្យបើកឡើងវិញដែរ។
អ្នកស្រី ថាន ស្រីមុំ បាននិយាយថា កូនប្រុសរបស់អ្នកស្រីសប្បាយចិត្តដែលបានចូលរៀនឡើងវិញ។
អ្នកស្រីនិយាយថា៖ «គាត់សប្បាយចិត្ត ហើយព្រលឹមឡើងរៀបចំខ្លួនឯង ចង់ទៅមុនគេ។ គាត់ចង់ទៅរៀន»៕
ប្រែសម្រួលពីអត្ថបទដើមជាភាសាអង់គ្លេស ដោយ អ៊ូច សូនី