អាជ្ញាធរខេត្តបន្ទាយមានជ័យ នៅថ្ងៃចន្ទនេះ បានប្រកាសផ្អាកចរាចរណ៍បណ្តោះអាសន្នចំពោះរថយន្តធុនធំ មិនឱ្យធ្វើដំណើរអំឡុងពេលទឹកជន់លិចលើកំណាត់ផ្លូវជាតិ៥ និងផ្លូវនានាទៀតក្នុងភូមិសាស្ត្រក្រុងប៉ោយប៉ែត។
ក្នុងសេចក្តីជូនដំណឹងនៅថ្ងៃនេះ រដ្ឋបាលក្រុងប៉ោយប៉ែតប្រាប់ដល់សាធារណជន ជាពិសេសម្ចាស់ក្រុមហ៊ុនដឹកជញ្ជូនធុនធំទាំងអស់ដែលធ្វើចរាចរណ៍ឆ្លងកាត់ផ្លូវជាតិលេខ៥ ត្រង់ចំណុចអាស្រមលោកយាយម៉ៅ រហូតដល់ផ្លូវបំបែកកូនដំរីទៅស្រុកម៉ាឡៃ និងផ្លូវនានាក្នុងភូមិសាស្រ្តក្រុងប៉ោយប៉ែត ត្រូវផ្អាកចរាចរណ៍បណ្តោះអាសន្ន ចាប់ពីថ្ងៃជូនដំណឹងនេះរហូតដល់ទឹកស្រកអស់វិញ។
រដ្ឋបាលក្រុងប៉ោយប៉ែត បញ្ជាក់ថា ដោយសារឥទ្ធិពលជំនន់ទឹកធ្លាក់ពីប្រទេសថៃកើនឡើងខ្ពស់ បានបណ្តាលឱ្យជន់លិចលំនៅឋានប្រជាជនមួយចំនួនដែលរស់នៅតាមបណ្តោយអូរព្រំដែនកម្ពុជា-ថៃ និងច្រាលមកលិចផ្លូវជាតិលេខ៥ និងភូមិសាស្ត្រក្រុងប៉ោយប៉ែតផងដែរ។
រដ្ឋបាលខេត្តបន្ទាយមានជ័យក៏បានជូនដំណឹងមួយផងដែរនៅព្រឹកមិញនេះ ឱ្យប្រជាជនយកចិត្តទុកដាក់និងមានការប្រុងប្រយ័ត្នខ្ពស់ចំពោះការជន់លិចដោយទឹកជំនន់។
រដ្ឋបាលខេត្តនេះបញ្ជាក់ថា នៅវេលាម៉ោងជាង៥ព្រឹកនេះ ទំនប់ទឹកអាងខៃដនត្រូវបានបាក់១៥ម៉ែត្រនៃប៉ែកខាងជើងទំនប់អាង ហើយទឹកបានហូរកាត់ថ្នល់ជាតិ៥ ប្រវែង៥៦០ម៉ែត្រ និងមានជម្រៅ២តឹក។
របាយការណ៍របស់រដ្ឋបាលខេត្តបន្ទាយមានជ័យ ឱ្យដឹងថា គិតត្រឹមម៉ោង៥ល្ងាច ថ្ងៃទី១៩ ខែតុលា ជំនន់ទឹកភ្លៀងនិងទឹកហូរពីប្រទេសថៃ បានធ្វើឱ្យប៉ះពាល់ស្រុកទាំង៩របស់ខេត្តនេះ និងធ្វើឱ្យប៉ះពាល់ប្រជាពលរដ្ឋ២៦ ៧៥៣គ្រួសារ ជម្លៀសចេញពីភូមិ៤ ២២២គ្រួសារ ប៉ះពាល់មនុស្ស១០៧ ១៨៤នាក់ ជម្លៀសចេញ១៦ ៥២០នាក់ ខណៈមនុស្ស១៧នាក់បានស្លាប់។
របាយការណ៍ឱ្យដឹងទៀតថា ប៉ះពាល់ដំណាំស្រូវ៦២ ៣៣៤ហិកតា ដំឡូងមី៩ ៨៨០ហិកតា និងដំណាំរួមផ្សំ៥៤៣ហិកតា។ ចំពោះហេដ្ឋារចនាសម្ព័ន្ធវិញ គឺប៉ះពាល់សាលារៀន១៣៤កន្លែង វត្តអារាម៦០កន្លែង និងទឹកហូរកាត់ផ្លូវ៧៤១កន្លែង ស្មើនឹង៤៩២ ៥៣៣ម៉ែត្រ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា គិតចាប់ពីថ្ងៃទី១ ខែកញ្ញា ដល់ព្រឹកថ្ងៃទី១៩ ខែតុលា ជំនន់ទឹកភ្លៀងបានប៉ះពាល់ដល់១៩រាជធានី-ខេត្ត និងប៉ះពាល់ប្រជាជន៧៨ ០៥៦គ្រួសារ ស្មើប្រមាណជាង៣១ម៉ឺននាក់ ខណៈនៅទូទាំងប្រទេសមានមនុស្សស្លាប់កើនឡើងដល់២៥នាក់ ផ្ទះជាង៧ម៉ឺន៣ពាន់ខ្នង បានរងផលប៉ះពាល់ និងខូចខាត៥៦ខ្នង។ ក្រៅពីនោះ សាលារៀនប្រមាណ៥៦៨កន្លែង ស្រូវប្រមាណជាង២១ម៉ឺនហិកតា និងដំណាំរួមផ្សំជិត៨ម៉ឺនហិកតា ក៏ត្រូវបានទឹកជន់លិចផងដែរ៕