ស្ថាប័នប្រព័ន្ធផ្សព្វផ្សាយនិងអ្នកសិក្សានៅប្រទេសថៃ បានអំពាវនាវដល់រដ្ឋាភិបាលប្រទេសនេះ បញ្ឈប់ការរំលោភលើសេរីភាពសារព័ត៌មាន បន្ទាប់ពីរបាយការណ៍មួយបញ្ជាក់ថា មានប្រព័ន្ធផ្សព្វផ្សាយតាមអនឡាញចំនួន៥ ប្រឈមនឹងផ្លូវច្បាប់។
សារព័ត៌មាន Bangkok post បានរាយការណ៍នៅថ្ងៃអង្គារនេះថា រដ្ឋាភិបាលថៃក៏មានគម្រោងបិទឬប្លុកការផ្ញើសារតាមតេឡេក្រាម (Telegram) ស្របពេលក្រុមអ្នកតវ៉ាប្រឆាំងរដ្ឋាភិបាលបានប្រើប្រាស់កម្មវិធីនោះសម្រាប់ទាក់ទងគ្នា ក្រោយពីប៉ូលិសបានបិទគណនីហ្វេសប៊ុករបស់ពួកគេ។
ប្រភពសារព័ត៌មានដដែលបន្តថា ការអំពាវនាវរបស់ក្រុមស្ថាប័នប្រព័ន្ធផ្សព្វផ្សាយមួយចំនួន រួមមាន ក្រុមប្រឹក្សាសារព័ត៌មានជាតិ ក្រុមប្រឹក្សាសន្តិសុខសារព័ត៌មានជាតិ សមាគមអ្នកសារព័ត៌មានថៃ សមាគមអ្នកសារព័ត៌មានវិទ្យុថៃ សមាគមអ្នកផ្តល់ព័ត៌មានតាមអនឡាញ និងសហព័ន្ធអ្នកសារព័ត៌មានថៃ ជាដើម បានធ្វើឡើងក្រោយពីមានការបែកធ្លាយបទបញ្ជាមួយដែលចេញដោយមជ្ឈមណ្ឌលរួមគ្នារបស់រដ្ឋាភិបាលសម្រាប់ដំណោះស្រាយស្ថានភាពបន្ទាន់ (CRES) កាលពីថ្ងៃចន្ទ។
នៅក្នុងសេចក្តីថ្លែងការណ៍រួមរបស់ស្ថាប័នប្រព័ន្ធផ្សព្វផ្សាយក្នុងស្រុក បាននិយាយថា ពួកគេប្រឆាំងនឹងការគាបសង្កត់លើសេរីភាពសារព័ត៌មានពីសំណាក់ភាគីណាមួយ ហើយបានជំរុញរដ្ឋាភិបាលកុំឱ្យមានការរំលោភបំពានច្បាប់ ដោយបំបិទសិទ្ធិប្រព័ន្ធផ្សព្វផ្សាយ។
សេចក្តីថ្លែងការណ៍នោះ បន្តដោយព្រមានថា ការរឹតត្បិតសិទ្ធិទទួលព័ត៌មានរបស់ប្រជាជន អាចជំរុញឱ្យប្រជាជនចូលរួមក្នុងការតវ៉ានិងធ្វើឱ្យស្ថានការណ៍នយោបាយកាន់តែងាយនឹងមានអំពើហិង្សា។ ក្រៅពីនេះ ពួកគេបានថ្កោលទោសរាល់ការប្រើប្រាស់ប្រព័ន្ធផ្សព្វផ្សាយក្នុងការបំភ្លៃការពិតនិងបង្កឱ្យមានអំពើហិង្សា។
ក្លឹបអ្នកឆ្លើយឆ្លងព័ត៌មានបរទេសប្រចាំនៅប្រទេសថៃ ក៏បានចូលរួមជាមួយក្រុមប្រឆាំងផងដែរ ដោយនិយាយថា ខ្លួនមានការព្រួយបារម្ភយ៉ាងខ្លាំងពីការគំរាមកំហែង ដែលមើលទៅរដ្ឋាភិបាលហាក់ដូចជាប្រកាន់ខ្ជាប់ខ្លាំងនិងមិនមានការឆ្លើយតបលើការរិះគន់ ហើយអាចធ្វើឱ្យសាធារណជនកាន់តែផ្ទុះកំហឹងថែមទៀត។
គួរបញ្ជាក់ថា ក្នុងរយៈពេល៣ខែចុងក្រោយនេះ សិស្ស-និស្សិតថៃរាប់ម៉ឺនរាប់សែននាក់ បាននាំគ្នាតវ៉ានៅក្នុងទីក្រុងបាងកកជាបន្តបន្ទាប់ ដោយទាមទារ៣ចំណុច រួមមាន ទាមទារឱ្យលោក ប្រាយុទ្ធ ចាន់អូចា ចុះចេញពីតំណែងជានាយករដ្ឋមន្ត្រី, ទាមទារឱ្យសរសេររដ្ឋធម្មនុញ្ញឡើងវិញ និងទាមទារឱ្យធ្វើកំណែទម្រង់អំណាចព្រះមហាក្សត្រ។
មូលហេតុមួយក្នុងចំណោម៣ចំណុច ដែលយុវជនថៃទាមទារឱ្យលោក ប្រាយុទ្ធ ចុះចេញពីតំណែងនោះ គឺយុវជនចោទលោក ប្រាយុទ្ធ ថាឡើងកាន់តំណែងដោយមិនត្រឹមត្រូវនិងមិនមានសមត្ថភាពក្នុងការដោះស្រាយបញ្ហា។
តែយ៉ាងណា លោក ប្រាយុទ្ធ ចាន់អូចា បញ្ជាក់ជំហរកាលពីថ្ងៃទី១៦ ខែតុលា ឆ្នាំ២០២០ ថា លោកមិនចុះចេញពីតំណែងតាមការទាមទាររបស់ក្រុមយុវជនទាំងនោះទេ ព្រោះលោកមិនបានធ្វើអ្វីខុស។ លោកបញ្ជាក់ថា ចំពោះអ្នកដែលនៅតែទាមទារបំពានច្បាប់ទៀត លោកនឹងប្រើច្បាប់ដើម្បីដោះស្រាយ៕