តួលេខរបស់អាជ្ញាធរខេត្តបន្ទាយមានជ័យ ឱ្យដឹងថា ចំនួនមនុស្សស្លាប់ដោយសារទឹកជំនន់នៅខេត្តមួយនេះបានឡើងដល់ទៅ១៨នាក់ហើយគិតត្រឹមថ្ងៃនេះ ខណៈពលរដ្ឋដល់ទៅជាង៤ ៥០០គ្រួសារទៀត ត្រូវបានជម្លៀសពីផ្ទះសម្បែងទៅកាន់ទីទួលសុវត្ថិភាព។
ក្នុងរបាយការណ៍របស់ខ្លួនចេញនៅថ្ងៃនេះ រដ្ឋបាលខេត្តបន្ទាយមានជ័យបានរាយការណ៍ថា ទឹកជំនន់បានជន់លិចក្រុង-ស្រុកទាំង៩របស់ខេត្តនេះ ឬស្មើនឹង៦០ឃុំ-សង្កាត់ ដោយប៉ះពាល់ប្រជាពលរដ្ឋជិត៣ម៉ឺនគ្រួសារ ឬស្មើនឹងជាង១១ម៉ឺន៦ពាន់នាក់។
អាជ្ញាធរខេត្តនេះនិយាយថា មនុស្សដល់ទៅ១៨នាក់ហើយបានស្លាប់ទាក់ទងនឹងទឹកជំនន់ចាប់ពីដើមខែតុលាមក ក្នុងនោះមានកុមារ៣នាក់ផងដែរ ហើយប្រជាពលរដ្ឋ៤ ៥៦៧គ្រួសារទៀត ត្រូវបានជម្លៀសចេញទៅកាន់ទីទួលសុវត្ថិភាព។
ទន្ទឹមគ្នានេះ អាជ្ញាធរខេត្តបន្ទាយមានជ័យនិយាយថា ស្រូវស្រែទំហំជាង៦ម៉ឺន៤ពាន់ហិកតា ដំឡូងមីជាង១ម៉ឺនហិកតា និងដំណាំរួមផ្សំជិត១ពាន់ហិកតាទៀត ត្រូវបានទឹកជន់លិចលង់ផងដែរ ខណៈសាលារៀន១៨៦កន្លែងត្រូវទឹកជន់លិច បណ្ដាលឱ្យការសិក្សារៀនសូត្រត្រូវបានផ្អាកជាបណ្ដោះអាសន្ន។
ខេត្តបន្ទាយមានជ័យបានរងទឹកជន់លិចទាំងស្រុងចាប់ពីថ្ងៃម្សិលមិញនេះ ក្រោយពីទំនប់អាងស្តុកទឹកអូរខៃដន ស្ថិតនៅសង្កាត់និម្មិត ក្នុងក្រុងប៉ោយប៉ែត បាក់កាលពីព្រឹកព្រលឹមថ្ងៃម្សិលមិញនេះ បន្ទាប់ពីទទួលទឹកយ៉ាងច្រើនហូរធ្លាក់ពីប្រទេសថៃ។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន បានចុះទៅជួបនិងចែកអំណោយសង្គ្រោះបន្ទាន់ដល់ប្រជាពលរដ្ឋនៅក្នុងខេត្តបន្ទាយមានជ័យផងដែរនៅថ្ងៃនេះ៕