មន្ត្រីជាន់ខ្ពស់អគ្គនាយកដ្ឋានពន្ធនាគារ ឱ្យដឹងថា គិតត្រឹមថ្ងៃសុក្រនេះ អាជ្ញាធរទើបតែបានបញ្ជូនអ្នកជាប់ឃុំទៅកាន់ពន្ធនាគារខេត្តបន្ទាយមានជ័យវិញបានចំនួន៥០នាក់ប៉ុណ្ណោះ ខណៈអ្នកជាប់ឃុំជាង១ ០០០នាក់ទៀត គ្រោងនឹងបញ្ជូនទៅវិញនៅសប្ដាហ៍ក្រោយ។
កាលពីថ្ងៃទី១៤ ខែតុលា ឆ្នាំ២០២០ កម្លាំងសមត្ថកិច្ចចម្រុះ បានបញ្ជូនអ្នកជាប់ឃុំចំនួន១ ៦១០នាក់ ចេញពីពន្ធនាគារខេត្តបន្ទាយមានជ័យ ទៅកាន់ពន្ធនាគារនៅខេត្តចំនួន៤ ដោយសារជំនន់ទឹកភ្លៀងបានជន់លិច។ ពន្ធនាគារដែលត្រូវបានបញ្ជូនអ្នកជាប់ឃុំទៅនោះ រួមមាន ខេត្តសៀមរាប ចំនួន៨១១នាក់, កំពង់ធំ ២០០នាក់, ឧត្ដរមានជ័យ ២០០នាក់ និងត្បូងឃ្មុំជាង៤០០នាក់។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ប្រាប់វីអូឌីនៅថ្ងៃនេះថា ក្នុងចំណោមអ្នកជាប់ឃុំចំនួន១ ៦១០នាក់ ដែលអាជ្ញាធរជម្លៀសចេញពីពន្ធនាគារខេត្តបន្ទាយមានជ័យនោះ ត្រូវបានអាជ្ញាធរបញ្ជូនទៅវិញបានតែចំនួន៥០នាក់ប៉ុណ្ណោះ ដើម្បីឱ្យពួកគេសម្អាតទីតាំងពន្ធនាគារ ស្របពេលដែលទឹកក៏នៅមិនទាន់ស្រកអស់។
លោកបន្តថា ចំពោះអ្នកជាប់ឃុំជាង១ ០០០នាក់ទៀត នឹងបញ្ជូនទៅពន្ធនាគារខេត្តបន្ទាយមានជ័យវិញជាបន្តទៀត នៅសប្តាហ៍ក្រោយ។ ប៉ុន្តែលោកថា អ្នកជាប់ឃុំជាង២០០នាក់ ក្នុងចំណោមជាង១ ០០០នាក់នោះ នឹងត្រូវទុកឱ្យនៅពន្ធនាគារខេត្តត្បូងឃ្មុំ ដើម្បីបញ្ចៀសភាពចង្អៀតណែនក្នុងពន្ធនាគារខេត្តបន្ទាយមានជ័យ។
លោក នុត សវនា បញ្ជាក់ថា៖ «មួយសប្ដាហ៍ទៀត យើងនឹងបញ្ជូនពីគោលដៅដទៃយកទៅបន្ទាយមានជ័យវិញ ប៉ុន្តែយើងមិនបញ្ជូនទាំងអស់ទេ យើងដកទុកប្រហែលជាង២០០នាក់ ដើម្បីឱ្យធូរកន្លែង។ អ្នកដែលកាត់ទោសហើយ គឺទុកកន្លែងដែលយើងផ្ទេរ ការជម្លៀសនេះ ដើម្បីឱ្យកន្លែង [ពន្ធនាគារ] នៅបន្ទាយមានជ័យ ធូរ កុំឱ្យចង្អៀតពេក»។
លោកបន្ថែមថា៖ «ចង្អៀត ជាង១ ៦០០នាក់ អគារយើងដាក់បានយ៉ាងច្រើន៨០០នាក់ ដល់អត្រាបទល្មើសច្រើន ជាពិសេសគ្រឿងញៀន អ៊ីចឹងចំនួនហ្នឹង វាកើនជាង១ ៦០០នាក់។ យើងទុកនៅត្រពាំងផ្លុង នៅមណ្ឌលអប់រំកែប្រែទី៣ ខ្លះ»។
ដោយឡែក ចំពោះអ្នកជាប់ឃុំជាស្ត្រីនិងអនីតិជនជាង១ ៤០០នាក់ ដែលបានជម្លៀសចេញពីមណ្ឌលអប់រំកែប្រែ«ម២» នៃពន្ធនាគារព្រៃស ក្នុងខណ្ឌដង្កោ រាជធានីភ្នំពេញ អំឡុងពេលជំនន់ទឹកភ្លៀង កាលពីថ្ងៃទី២១ ខែតុលា កន្លងមកនោះ លោក នុត សវនា បញ្ជាក់ថា សមត្ថកិច្ចបានបញ្ជូនទៅមណ្ឌលកែប្រែ«ម២»វិញអស់ហើយ។
បើតាមមន្ត្រីរូបនេះ ជំនន់ទឹកភ្លៀងកាលពីខែតុលាកន្លងមក មានពន្ធនាគារចំនួន២ដែលត្រូវទឹកជន់លិច និងតម្រូវឱ្យអាជ្ញាធរជម្លៀសអ្នកជាប់ឃុំពីពន្ធនាគារទាំងនោះ គឺមានពន្ធនាគារខេត្តបន្ទាយមានជ័យ និងមណ្ឌលអប់រំកែប្រែ«ម២» នៃពន្ធនាគារព្រៃស ក្នុងរាជធានីភ្នំពេញ៕