ប្រធានមន្ទីរសុខាភិបាលខេត្តកំពង់ឆ្នាំង លោក ប្រាក់ វ៉ុន បានឱ្យដឹងថា អ្នកភូមិស្លាប់ពាក់ព័ន្ធនឹងការផឹកស្រាស នៅឯស្រុកទឹកផុស មានចំនួនដល់ទៅ១៥នាក់ បន្ទាប់ពីមន្ត្រីសុខាភិបាលបានចុះទៅស្រាវជ្រាវនៅតាមភូមិនានា។
មន្ត្រីសុខាភិបាលរូបនេះ បានប្រាប់វីអូឌីនៅថ្ងៃនេះថា ក្រោយពីចុះសាកសួរពលរដ្ឋនៅភូមិនានា មន្ត្រីសុខាភិបាលបានរកឃើញថា ពលរដ្ឋដល់ទៅ១៦៤នាក់នៅស្រុកទឹកផុស បានធ្លាក់ខ្លួនឈឺពាក់ព័ន្ធនឹងការផឹកស្រាស ចាប់ពីថ្ងៃទី២៦ ខែវិច្ឆិកាមក។
បើតាមមន្ត្រីសុខាភិបាលរូបនេះ អ្នកភូមិសរុបដល់ទៅ១៥នាក់ បានស្លាប់ដោយជាប់ពាក់ព័ន្ធនឹងការផឹកស្រា ក្នុងនោះរួមបញ្ចូលទាំងអ្នកភូមិ២នាក់ នៅឃុំជៀប ដែលត្រូវបានរាយការណ៍កាលពីដំបូងថា ស្លាប់ដោយសារផឹកទឹកអណ្ដូងនៅឯចម្ការឪឡឹក។
លោក ប្រាក់ វ៉ុន ប្រាប់ថា៖ «ប្រសិនបើយើងបូកការស្រាវជ្រាវនៅភូមិហ្នឹងទៀត វាមានអ្នកឈឺដែរដោយសារហូបស្រាដែរ ហើយឈឺតិចតួចហ្នឹង ទិន្នន័យខាងក្រុមការងារបានបូកថែម៣៣នាក់ទៀត។ អ៊ីចឹង ទិន្នន័យចុងក្រោយ ១៦៤»។
លោក ប្រាក់ វ៉ុន បានប្រាប់ថា អ្នកភូមិស្ទើរតែទាំងអស់ហើយបានវិលត្រឡប់ទៅផ្ទះសម្បែងរបស់ពួកគេនៅឯស្រុកទឹកផុស បន្ទាប់ពីត្រូវបានព្យាបាលជាសះស្បើយពីអាការពុលចំណីអាហារ ប៉ុន្តែលោកថា លើកលែងតែបុរសម្នាក់កំពុងស្ថិតក្រោមការព្យាបាលបន្តនៅឡើយ ដោយសារតែគាត់មានអាការញៀនស្រា។
លោក ប្រាក់ វ៉ុន ប្រាប់ថា៖ «បញ្ហាពុល គាត់ធូរស្រាលអស់ហើយ នៅសល់តែម្នាក់ដែលគាត់មានបញ្ហា គេហៅថា ជំងឺញៀនស្រា។ [ពលរដ្ឋ] ចេញចុងក្រោយបំផុតតាំងពីថ្ងៃទី២ [ខែវិច្ឆិកា]»។
ប្រធានមន្ទីរសុខាភិបាលរូបនេះ បានឱ្យដឹងទៀតថា មូលហេតុដែលបណ្ដាលឱ្យអ្នកភូមិស្លាប់និងធ្លាក់ខ្លួនឈឺដ៏ច្រើនបែបនេះ គឺបណ្ដាលមកពីការផឹកស្រាសដែលត្រូវបានពិនិត្យឃើញមានសារធាតុមេតាណុលខ្ពស់លើស។
លោក ប្រាក់ វ៉ុន បានឱ្យដឹងថា អ្នកភូមិ៨នាក់បានស្លាប់អំឡុងពេលសង្គ្រោះនៅតាមមន្ទីរពេទ្យនានានៅខេត្តកំពង់ឆ្នាំង និងនៅរាជធានីភ្នំពេញ នៅក្នុងចំណោមអ្នកភូមិធ្លាក់ខ្លួនឈឺសរុប១៣១នាក់។
មន្ត្រីសុខាភិបាលរូបនេះបានឱ្យដឹងផងដែរថា ទីតាំងផលិតនិងលក់ស្រាសទាំងអស់នៅក្នុងស្រុកទឹកផុស ត្រូវបានសមត្ថកិច្ចបិទនិងដកហូត ហើយលោកថា មន្ត្រីសុខាភិបាលក៏បានចុះទៅត្រួតពិនិត្យនៅតាមភូមិនានាស្ថិតក្នុងស្រុកនោះផងដែរ៕