អាជ្ញាធរខេត្តព្រះសីហនុ បានជម្លៀសអ្នកជាប់ឃុំជាស្ត្រីចំនួន១៤៦នាក់ចេញពីពន្ធនាគារខេត្តព្រះសីហនុ ទៅឃុំខ្លួននៅឯពន្ធនាគារខេត្តកំពតវិញ ខណៈអាជ្ញាធរពាក់ព័ន្ធក៏បានត្រៀមដោះលែងអ្នកទោសស្រាលៗប្រមាណ៨០នាក់ផងដែរ ក្រោយពីផ្ទុះជំងឺកូវីដ-១៩ នៅក្នុងពន្ធនាគារខេត្តព្រះសីហនុ។
អ្នកនាំពាក្យអគ្គនាយកដ្ឋានពន្ធនាគារ លោក នុត សាវនា បានប្រាប់ វីអូឌី នៅរសៀលថ្ងៃអង្គារនេះថា ការជម្លៀសអ្នកជាប់ឃុំជាស្ត្រីទាំង១៤៦នាក់នេះបានធ្វើឡើងកាលពីថ្ងៃម្សិលមិញ ហើយអ្នកជាប់ឃុំចាស់ៗនិងមានជំងឺត្រូវបានយកទៅកាន់អគាររបស់អ្នកជាប់ឃុំជាស្ត្រីវិញ។ លោកបន្តថា ចំណាត់ការនេះបានធ្វើឡើងបន្ទាប់ពីមានកិច្ចប្រជុំមួយកាលពីថ្ងៃទី១០ ខែឧសភា ដើម្បីដោះស្រាយបញ្ហាបន្ទាន់នៅក្នុងពន្ធនាគារខេត្តព្រះសីហនុ ។
លោកមានប្រសាសន៍យ៉ាងដូច្នេះថា៖ «ការជម្លៀសហ្នឹង ជនជាប់ឃុំដែលងាយរងគ្រោះ ដូចជាស្ត្រីហើយនិងមនុស្សចាស់ជរា យើងយកចាស់ៗពីអាគារដែលនៅជាមួយក្មេងៗពីមុន យកទៅដាក់នៅកន្លែងស្រីៗវិញ ព្រោះឥលូវហ្នឹងអត់មានស្រីៗទេនៅក្នុងពន្ធនាគារខេត្ត ព្រោះខ្លាចមានការអ្វីទៅ គាត់ក្លាយទៅជាជនងាយរងគ្រោះ»។
លោកបន្ថែមថា តាមគម្រោងពន្ធនាគារខេត្ត ក៏នឹងដោះលែងអ្នកជាប់ឃុំដែលមានបទល្មើសស្រាលចំនួន៨០នាក់ផងដែរ ក្នុងនោះ កាលពីថ្ងៃម្សិលមិញ ពន្ធនាគារបានសម្រេចដោះលែងអ្នកជាប់ឃុំបានចំនួន៦៩នាក់ ហើយថ្ងៃនេះនិងថ្ងៃស្អែក នឹងបន្តដោះលែងថែមទៀតផ្អែកតាមសំណុំរឿង។
ពន្ធនាគារខេត្តព្រះសីហនុ គឺជាពន្ធនាគារទី១នៅក្នុងប្រទេសកម្ពុជា ដែលត្រូវបានគេរាយការណ៍ថា មានឆ្លងជំងឺកូវីដ-១៩ នៅក្នុងចំណោមអ្នកជាប់ឃុំ។ តាមសេចក្តីរាយការណ៍កន្លងមក ឱ្យដឹងថា មានអ្នកជាប់ឃុំចំនួន៣៤នាក់បានឆ្លងជំងឺកូវីដ-១៩ ហើយក្នុងនោះក៏មានជនបរទេសផងដែរ។
ទាក់ទងនឹងបញ្ហានេះ លោក នុត សាវនា អំពាវនាវកុំឱ្យមានការព្រួយបារម្ភខ្លាំងពេក។
លោកបានគូសបញ្ជាក់ថា៖ «យើងបានណែនាំមន្រ្តីគោលដៅរបស់យើងច្បាស់លាស់ហើយ ថាត្រូវធ្វើអីៗ តែគ្រាន់ថា កុំឱ្យមានការព្រួយបារម្ភចំពោះបញ្ហានេះ ព្រោះនៅលើពិភពលោកវាកើតមានសឹងតែពេញពិភពលោកហើយជំងឺនេះ ដែលអាចឆ្លងចូលទៅក្នុងពន្ធនាគារ។ អ៊ីចឹងយើងទប់បានរហូតដល់ថ្ងៃនេះ ដែលជាបច្ច័យមួយបញ្ជាក់ថា អាជ្ញាធរពន្ធនាគារយើងខិតខំណាស់ ដែលលទ្ធផលទោះបីវាមិនទាន់បាន Perfect [ល្អឥតខ្ចោះ] ១០០%។ ប៉ុន្តែយើងបានលទ្ធផលល្អដែរ បើយើងប្រៀបទៅនឹងប្រទេសជិតខាងនិងប្រទេសជឿនលឿនដទៃទៀត ដោយយើងក៏បានកំពុងសហការជាមួយរដ្ឋបាលខេត្ត ក៏ដូចជាខាងតុលាការដែរ ដើម្បីពិនិត្យមើលលទ្ធភាពក្នុងការដោះលែងជនជាប់ឃុំមួយចំនួនឱ្យគេចផុតទុក្ខហ្នឹង។ យើងព្រលែងគាត់ឱ្យផុតពីកន្លែងហ្នឹង ដែលយើងធ្វើប្រតិបត្តិការហ្នឹងបន្តជាហូរហែកន្លងមកដែរ»។
អ្នកសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជាប សុធារី បានស្វាគមន៍ចំពោះចំណាត់ការរបស់អាជ្ញាធរខេត្តព្រះសីហនុ។
អ្នកស្រីថា នេះគឺជាអ្វីដែលក្រុមគ្រួសាររបស់អ្នកជាប់ឃុំនៅក្នុងពន្ធនាគារខេត្តព្រះសីហនុចង់បាន ខណៈពួកគេបានបាត់ដំណឹងសូន្យឈឹង ដោយសារតែវិធានការរបស់ពន្ធនាគារហាមមិនឱ្យក្រុមគ្រួសារទៅសួរសុខទុក្ខកន្លងមក។
អ្នកស្រីមានប្រសាសន៍ថា៖ «ហ្នឹងជាអ្វីដែលខ្ញុំចង់បានដែរ ខ្ញុំត្រេកអរនៅពេលដែលលោកបានគិតពិចារណាទៅលើរឿងហ្នឹង ប៉ុន្តែខ្ញុំក៏គ្រាន់តែចង់និយាយថា វាមិនដឹងថាយ៉ាងម៉េចនៅឡើយទេ ព្រោះថាពួកគាត់ទាំងអស់ហ្នឹងអត់ទាន់បានដំណឹងទៅដល់ក្រុមគ្រួសារទេ»។
បច្ចុប្បន្ននេះ កម្ពុជាមានអ្នកជាប់ឃុំសរុបតាមពន្ធនាគារនៅទូទាំងប្រទេសប្រមាណ៤០ ០០០នាក់។ សង្គមស៊ីវិលផ្នែកសិទ្ធិមនុស្ស ធ្លាប់លើកឡើងថា ចំនួនអ្នកជាប់ឃុំនេះធ្វើឱ្យពន្ធនាគារនិងមណ្ឌលអប់រំកែប្រែទាំងអស់ចង្អៀតណែនខ្លាំងនិងលើសចំណុះ។ ចំណុចនេះហើយដែលធ្វើឱ្យសាច់ញាតិនិងក្រុមគ្រួសាររបស់អ្នកជាប់ឃុំភាគច្រើនព្រួយបារម្ភពីការឆ្លងជំងឺកូវីដ-១៩ លឿននៅក្នុងពន្ធនាគារ៕