បុរស២នាក់បានស្លាប់ភ្លាមៗនៅកន្លែងកើតហេតុ និងមនុស្ស៤នាក់ទៀតបានរងរបួស ដោយសារហេតុការណ៍គ្រោះធម្មជាតិរន្ទះបាញ់ នៅចំណុចភូមិសានស ឃុំអន្សាចំបក់ ស្រុកក្រគរ ខេត្តពោធិ៍សាត់។
មេភូមិសានសរ លោក ចំ ឡត បានប្រាប់ វីអូឌី នៅថ្ងៃទី០៤ ខែមិថុនា ថាហេតុការណ៍រន្ទះបាញ់នេះបានកើតឡើងកាលពីថ្ងៃព្រហស្បតិ៍ម្សិលមិញ បណ្តាលឱ្យបុរស២នាក់ ឈ្មោះ ពេជ្រ ប៊ុនធឿន អាយុ៣២ឆ្នាំ និងឈ្មោះ ខ សាមឿន អាយុ៣៣ឆ្នាំ បានស្លាប់ និង៤នាក់ផ្សេងទៀតបានរងរបួសនិងត្រូវបានបញ្ជូនទៅសង្គ្រោះនៅមន្ទីរពេទ្យ។
លោកបានបន្ថែមថា៖ «ឧបទ្ទវហេតុនោះបានកើតឡើងនៅអំឡុងម៉ោងប្រហែលជាង៣រសៀលកាលពីម្សិលមិញ នៅពេលដែលមេឃមានភ្លៀងតិចៗ ហើយពួកគេកំពុងសង់រោងសម្រាប់ចាំស្រែ»។
ចាប់តាំងពីឆ្នាំ១៩៩៦ រហូតដល់ឆ្នាំ២០២០ បាតុភូតរន្ទះបាញ់បានសម្លាប់មនុស្សសរុប១ ១៩១នាក់។ ដោយឡែក គិតត្រឹមត្រីមាសទី១ នៃឆ្នាំ២០២១នេះ គ្រោះរន្ទះបាញ់បានបណ្តាលឱ្យមនុស្ស២នាក់ស្លាប់នៅក្នុងខេត្តបាត់ដំបង និងងាប់គោក្របីអស់ចំនួន៦ក្បាល។ នេះបើយោងតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ៕
