ពលរដ្ឋនិងអ្នកធ្វើដំណើរមួយចំនួនឆ្លងកាត់លើកំណាត់ផ្លូវជាតិលេខ២ ក្នុងភូមិសាស្ត្រពីខេត្តកណ្តាលទៅខេត្តតាកែវ សម្តែងការព្រួយបារម្ភពីសុវត្ថិភាពក្នុងការធ្វើដំណើរ ត្បិតផ្លូវមានការលំបាកនិងហុយខ្លាំង ខណៈពួកគាត់ថា ការសាងសង់ផ្លូវនេះទំនងមិនស្របតាមស្តង់ដារ និងអាចអូសបន្លាយពេលយូរផងដែរ។
ប្រជាពលរដ្ឋរស់នៅជាប់ដងផ្លូវជាតិលេខ២ ក្នុងស្រុកសំរោង ខេត្តតាកែវ លោក សំ ស៊ុន បានប្រាប់ វីអូឌី ថាផ្លូវជាតិមួយនេះ ឃើញដំណើរការសាងសង់មានភាពយឺតយ៉ាវ ហើយចំណាយពេលប្រហែលជិត២ឆ្នាំមកហើយ។ លោកបន្តថា ឯការសាងសង់វិញ មើលទៅទំនងជាមិនជាប់បានយូរអង្វែងទេ ដោយហេតុថា ការសាងសង់មិនបានកាយយកដីស្អុយចេញ និងមិនមានកម្មករច្រើនសម្រាប់សាងសង់ ដែលធ្វើឱ្យមានការអូសបន្លាយពេលវេលាកាន់តែយូរ។
ពលរដ្ឋដដែលនេះ ក៏បារម្ភពីគ្រោះថ្នាក់ផ្សេងៗដែលនឹងអាចកើតឡើងលើអ្នកប្រើប្រាស់ផ្លូវជាតិលេខ២នេះ ត្បិតមានរថយន្តធំៗឆ្លងកាត់ច្រើន ខណៈស្ថានភាពផ្លូវមានការលំបាក។
លោកបាននិយាយថា៖ «អ្វីដែលខ្ញុំព្រួយបារម្ភ គឺខ្លាចតែមានគ្រោះថ្នាក់ ព្រោះថា ផ្លូវហ្នឹងគឺហុយងងឹតមើលគ្នាមិនចង់ឃើញ។ មួយទៀត គឺឡានដឹកដី ដឹកក្រួសអីហ្នឹង បើពេលយប់វិញ បើអ្នកអត់ចាប់អារម្មណ៍ គឺអាចជិះប៉ះនឹងខ្សែដែលគេដាក់បង្ខាំងផ្លូវសម្រាប់ឈូសឆាយ»។
លោក សំ ស៊ុន បន្តថា ថ្នាក់ដឹកនាំគួរតែផ្តល់អ្នកបច្ចេកទេសទៅជួយត្រួតពិនិត្យក្នុងពេលសាងសង់ ដើម្បីធានាគុណភាពតាមស្តង់ដារបច្ចេកទេសដែលអាចទទួលយកបាន និងស្នើឱ្យពន្លឿនការងារសាងសង់ផ្លូវមួយនេះឱ្យបានឆាប់រហ័សផងដែរ។
ចំណែកឯអ្នកដំណើរឆ្លងកាត់ផ្លូវជាតិលេខ២នេះ លោក លន់ សេនី ក៏បានប្រាប់ វីអូឌី ថាលោកមានការព្រួយបារម្ភខ្លាំងទាក់ទងទៅនឹងផ្លូវជាតិមួយនេះ ដោយសារតែការសាងសង់មានភាពយឺតយ៉ាវ ហើយដីហុយខ្លាំង មិនអាចមើលគ្នាឃើញឡើយពេលមានរថយន្តធំៗឆ្លងកាត់ម្តងៗ។ លោកថា បញ្ហាដីហុយខ្លាំងនេះអាចបណ្ដាលឱ្យមានបញ្ហាសុខភាពដល់អ្នកដំណើរនិងពលរដ្ឋរស់នៅអមដងផ្លូវ ដូចជា ក្អក កណ្តាស់ ឬប៉ះពាល់ដល់សួត ជាដើម។
លោកបន្តថា៖ «សម្រាប់ស្តង់ដារក្នុងការសាងសង់នៅមិនអាចទទួលយកបាននោះទេ ព្រោះបើនិយាយអំពីស្តង់ដារនៃគុណភាព និយាយទៅ ផ្លូវហ្នឹងប្រើរយៈពេលនៃការសាងសង់ដូចជាយូរណាស់ហើយ មានតែប៉ះពាល់ថែមដល់ប្រជាពលរដ្ឋ មិនមែនជាការអភិវឌ្ឍប្រកបដោយចីរភាព មានតែបំផ្លាញជាងការអភិវឌ្ឍ»។
ទាក់ទងក្តីបារម្ភនេះ អគ្គនាយកបច្ចេកទេសនៃក្រសួងសាធារណការ និងដឹកជញ្ជូន លោក ហ៊ាង វុត្ថា មានប្រសាសន៍ថា ក្រុមការងារក្រសួងកំពុងដោះស្រាយករណីនេះ។
ដោយឡែក អ្នកនាំពាក្យក្រសួងសាធារណការ និងដឹកជញ្ជូន លោក វ៉ាស៊ឹម សុរិយា មានប្រសាសន៍កាលពីថ្ងៃទី១០ ខែមិថុនា ថាលោកមិនបានដឹងលម្អិតពីបញ្ហានេះទេ ដោយសារលោកពុំបានស្ថិតនៅក្នុងក្រុមការងារនៃការអនុវត្តគម្រោងសាងសង់ផ្លូវមួយនេះ។ យ៉ាងណា លោកយល់ថា ភាពយឺតយ៉ាវនៃការសាងសង់ផ្លូវជាតិលេខ២ អាចបណ្តាលមកពីការផ្ទុះជំងឺកូវីដ-១៩ផងដែរ ព្រោះកម្មករខ្លះមានទីលំនៅក្នុងតំបន់ក្រហម។
ចំណែកបញ្ហាដីហុយខ្លាំងឬមានជង្ហុកខ្លះនោះ អ្នកនាំពាក្យរូបនេះថា វាជារឿងធម្មតាទេក្នុងអំឡុងពេលនៃការសាងសង់ផ្លូវនោះ។
លោកបញ្ជាក់ថា៖ «ជាទូទៅ កាលណាធ្វើផ្លូវ វាតែងតែមានហុយដី ជង្ហុក និងមានបញ្ហាបន្តិចបន្តួចជាធម្មតា។ ខាងក្រុមការងារលោកក៏មានផលលំបាកដែរ ទាំងអស់គ្នាតែងតែមានបញ្ហាផលលំបាកអ៊ីចឹងហើយ»។
ប្រធាននាយកដ្ឋានផ្លូវថ្នល់នៃក្រសួងសាធារណការ និងដឹកជញ្ជូន និងជាប្រធានគ្រប់គ្រងប្រតិបត្តិគម្រោងនៃការស្ថាបនាផ្លូវជាតិលេខ២ លោក ឈឹម ផល្លា បានថ្លែងថា ការសាងសង់កំណាត់ផ្លូវជាតិលេខ២នេះ មានការលំបាកច្រើន ដោយសារតែផ្លូវនេះជាផ្លូវចាស់។
លោកបន្តថា៖ «បើសិនជាធ្វើផ្លូវថ្មីកាត់វាលស្រែ គ្មានចរាចរណ៍ គ្មានផ្ទះប្រជាពលរដ្ឋ អាហ្នឹងវាគ្មានបញ្ហាទេ។ ប៉ុន្តែខ្ញុំគិតថា ការខ្វះខាតចន្លោះប្រហោងលើការសាងសង់ដែលគាត់ធ្វើមិនទាន់ពេល នៅមុខផ្ទះប្រជាពលរដ្ឋ ការជីកដីហើយក្របានចាក់វិញ ព្រោះពេលខ្លះវាត្រូវការពេលនិងលក្ខណៈបច្ចេកទេស ហើយកន្លែងខ្លះក៏វាទទួលទឹកភ្លៀង ហើយគាត់ធ្វើមិនទាន់ គឺខ្ញុំទទួលស្គាល់កន្លែងហ្នឹង»។
លោកបន្តថា គិតត្រឹមខែឧសភា ឆ្នាំ២០២១នេះ ការសាងសង់កំណាត់ផ្លូវជាតិលេខ២នេះ បានប្រមាណជាង៣៧ភាគរយហើយ។
បើតាមលោក ឈឹម ផល្លា ផ្លូវជាតិលេខ២នេះ បានចាប់ផ្ដើមស្ថាបនាតាំងពីខែកុម្ភៈ ឆ្នាំ២០២០មកម្ល៉េះ រហូតមកដល់ពេលនេះមានរយៈពេលជាង១ឆ្នាំ៤ខែហើយ។ លោកថា ផ្លូវជាតិលេខ២ និងកំណាត់ផ្លូវជាតិលេខ២២ ក្នុងគម្រោងតែមួយនោះ គឺមានប្រវែង៧២គីឡូម៉ែត្រ ដោយគិតចាប់ពីរង្វង់មូលខេត្តកណ្តាលរហូតទៅដល់ខេត្តតាកែវ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកឡើងថា រដ្ឋាភិបាលគួរពិនិត្យមើលចំណុចខ្វះខាតរបស់ក្រុមហ៊ុនសាងសង់ ជាពិសេសរឿងដដែលនេះអាចបង្កការរំខានដល់ពលរដ្ឋ ដូចជាបញ្ហាដីហុយជាដើម។
លោកបន្តថា៖ «ប្រជាពលរដ្ឋដែលរស់នៅតាមដងផ្លូវហ្នឹង តែងតែប្រឈមពីបញ្ហាសុខភាពក្នុងការសាងសង់របស់ក្រុមហ៊ុននានាដែលកំពុងកសាង។ ដូច្នេះ ខាងរដ្ឋាភិបាលត្រូវតែដោះស្រាយរឿងដដែលហ្នឹង កុំឱ្យវាកើតឡើង ហើយគួរយកការបង្ការឬការទប់ស្កាត់ពីដីហុយនេះ ជាផ្នែកមួយនៃកិច្ចសន្យាក្នុងដំណើរការសាងសង់»។
ក្នុងវេទិកាសំណេះសំណាលស្ដីពីចល័តភាពក្នុងទីប្រជុំជន កាលពីថ្ងៃទី៥ ខែធ្នូ ឆ្នាំ២០១៩ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល ឱ្យដឹងថា ផ្លូវជាតិលេខ២ និងផ្លូវជាតិលេខ២២ នឹងត្រូវពង្រីកឱ្យធំជាងមុននៅក្នុងឆ្នាំ២០២០។
លោកបន្តថា ការកែលម្អឡើងវិញនូវផ្លូវជាតិទាំងពីរខ្សែនេះ គ្រោងចំណាយថវិកាអស់ជាង៥៦លានដុល្លារអាមេរិក ក្រោមកម្ចីឥណទានពីរដ្ឋាភិបាលកូរ៉េខាងត្បូង និងថវិកាបដិភាគរបស់រាជរដ្ឋាភិបាលកម្ពុជា។
តាមគម្រោង ផ្លូវទាំងពីរខ្សែនេះនឹងដំណើរការសាងសង់ឱ្យរួចរាល់ដោយប្រើរយៈពេល៣០ខែឬ២ឆ្នាំកន្លះ៕