សកម្មជនបរិស្ថាន អះអាងថា បទល្មើសព្រៃឈើក្នុងរយៈពេល៦ខែដើមឆ្នាំ២០២១ នៅតំបន់ព្រៃឡង់ និងតំបន់ផ្សេងទៀត មិនមានការថយចុះឡើយ ខណៈក្រសួងបរិស្ថានអះអាងថា បទល្មើសព្រៃឈើកើតមានខ្លះមែន ប៉ុន្តែជាទ្រង់ទ្រាយតូចតែប៉ុណ្ណោះ។
ការអះអាងរបស់សកម្មជនបរិស្ថាន បានធ្វើឡើងបន្ទាប់ពីពួកគេបានរកឃើញបទល្មើសព្រៃឈើចំនួន៣៦៦ករណី ស្ថិតក្នុងតំបន់ព្រៃឡង់បន្ថែមទៀត ក្រោយពីប្រជាសហគមន៍ព្រៃឡង់នៅខេត្តព្រះវិហារ៩នាក់ចុះល្បាតក្នុងតំបន់ព្រៃឡង់ ស្ថិតនៅចំណុចបុស្សរាំង ជាប់ក្បាលដំរី អូរអាចម៍ដែក និងប្រាសាទគោល ក្នុងតំបន់ស្នូលព្រៃឡង់ រយៈពេល៥ថ្ងៃ ដោយចាប់ពីថ្ងៃទី៩ ដល់ថ្ងៃទី១៣ ខែកក្កដា ឆ្នាំ២០២១។
ប្រធានកម្មវិធីផ្នែកស្រាវជ្រាវ និងតស៊ូមតិរបស់សមាគមបណ្ដាញយុវជនកម្ពុជា លោក ហេង គឹមហុង ប្រាប់ វីអូឌី នៅថ្ងៃនេះថា ដើមឈើធំៗដែលប្រជាសហគមន៍ប្រទះឃើញ ដោយសារការអាររំលំនៅសល់តែគល់ និងសំណល់ចម្រៀកឈើ ជាប់នឹងគល់ឈើនោះ មានមុខកាត់ចាប់ពី៤តឹក ដល់១ម៉ែត្រ២តឹក និងប្រវែងចាប់ពី៤ម៉ែត្រ ដល់៦ម៉ែត្រ។
លោកបន្តថា សកម្មភាពកាប់និងដឹកជញ្ជូនឈើចេញពីតំបន់ព្រៃឡង់និងនៅខេត្តផ្សេងៗទៀត រយៈពេល៦ខែដើមឆ្នាំនេះ មិនថយចុះឡើយ ពោលគឺសកម្មភាពបទល្មើសនៅតែកើតមានឥតឈប់ឈរ។
លោកបង្ហាញ ក្ដីបារម្ភចំពោះបទល្មើសព្រៃឈើនៅតំបន់ព្រៃឡង់និងតំបន់ផ្សេងទៀត ដែលថា នឹងធ្វើឱ្យព្រៃឈើនៅក្នុងប្រទេសកម្ពុជាឈានទៅដល់ការវិនាស ខណៈសង្គមស៊ីវិលនិងសកម្មជនបរិស្ថានត្រូវបានក្រសួងបរិស្ថាននិងអាជ្ញាធររារាំងមិនឱ្យចូលចុះល្បាតរយៈពេលជិត២ឆ្នាំមកហើយ។
លោកថា៖ «ការរកឃើញបន្ថែមទៀតចំនួន៣៦៦ករណី ស្ដីពីការកាប់បំផ្លាញព្រៃឈើនៅក្នុងតំបន់ព្រៃឡង់ នៅភូមិសាស្ត្រខេត្តព្រះវិហារនេះ គឺជាសញ្ញាដែលយើងកត់សម្គាល់ថា បទល្មើសព្រៃឈើនៅតែបន្តកើតមានឡើង មិនមានការថយចុះឡើយ។ ជាពិសេសថ្មីៗ ការកាប់បំផ្លាញព្រៃឈើមិនត្រឹមតែមានការផ្សព្វផ្សាយនៅតំបន់ព្រៃឡង់ទេ សូម្បីនៅតំបន់ឧទ្យានអង្គរ គិរីរម្យ ក៏មានការកាប់បំផ្លាញ ទន្ទ្រានយកដីគួរឱ្យកត់សម្គាល់»។
សកម្មជនព្រៃឡង់ និងជាអ្នកសម្របសម្រួលបណ្តាញព្រៃឡង់ប្រចាំខេត្តកំពង់ធំ លោក ហឿន សុភាព លើកឡើងថា ការកាប់បំផ្លាញព្រៃនៅតំបន់ព្រៃឡង់ក្នុងភូមិសាស្ត្រខេត្តនេះ មិនមានការថយចុះឡើយ ហើយកត្ដាដែលបទល្មើសមិនថមថយ ដោយសារអ្នកអនុវត្តច្បាប់អាចមានជាប់ពាក់ព័ន្ធនឹងបទល្មើស។ លោកបន្តថា ព្រៃឈើនៅតំបន់ព្រៃឡង់និងនៅកន្លែងផ្សេងទៀត នឹងវិនាសក្នុងពេលឆាប់ៗខាងមុខ ដោយសារវិធានការទប់ស្កាត់របស់រដ្ឋាភិបាលបច្ចុប្បន្នមិនមានប្រសិទ្ធភាព។
លោកថា៖ «យើងមើលឃើញថា អាជ្ញាធរឬសមត្ថកិច្ចមួយចំនួនធំគឺកំពុងនៅពីក្រោយបទល្មើស ស្ទើរតែ៧០ភាគរយហើយដែលនៅពីក្រោយបទល្មើស។ អ៊ីចឹងការកាប់ ការដឹកឈើទៅបាន ដោយសារអាជ្ញាធរជួយមើលផ្លូវ និងជួយសម្រួលចរាចរណ៍ចេញហ្នឹងឯង»។
អ្នកនាំពាក្យកងរាជអាវុធហត្ថលើផ្ទៃប្រទេស និងជាអ្នកនាំពាក្យគណៈកម្មការជាតិទប់ស្កាត់និងបង្ក្រាបបទល្មើសធនធានធម្មជាតិ លោក អេង ហ៊ី លើកឡើងថា ចាប់ពីឆ្នាំ២០២០ ដល់ឆ្នាំ២០២១នេះ សមត្ថកិច្ចបង្ក្រាបឈើបានជាង៥ ០០០ម៉ែត្រគូប ហើយឈើដែលបង្ក្រាបបាននេះ លោកថា មិនមានការកើនឡើងឡើយ។
នៅពេលសួរថា តើឃាត់ខ្លួនមនុស្សបានប៉ុន្មាននាក់ដែរ លោកថា សមត្ថកិច្ចបានឃាត់ខ្លួនជនប្រព្រឹត្តល្មើសជាបន្តបន្ទាប់ ប៉ុន្តែលោកមិនចាំតួលេខនោះទេ ។
លោកថា៖ «តួលេខអត់នៅក្នុងដៃខ្ញុំទេ មានការឃាត់ខ្លួន មានទាំងឃាត់មធ្យោបាយ ហើយថ្មីៗហ្នឹង មានការឃាត់រថយន្ត២គ្រឿងដែលចូលទៅក្នុងព្រៃនៅជួរភ្នំក្រវាញហ្នឹង។ ហើយបើតាមបទបញ្ជាឯកឧត្ដមនាយឧត្ដមសេនីយ៍ សៅ សុខា ប្រធានគណៈកម្មការជាតិដើម្បីទប់ស្កាត់បទល្មើសធនធានធម្មជាតិ គឺឱ្យកម្ទេចចោល»។
អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់ វីអូឌី តាមប្រព័ន្ធតេឡេក្រាមនៅថ្ងៃព្រហស្បតិ៍នេះថា រយៈពេល៦ខែដើមឆ្នាំ២០២១ មន្ត្រីឧទ្យានុរក្សបានបង្ក្រាបបទល្មើសធនធានធម្មជាតិចំនួនជាង៤ ០០០ករណី (៤ ២៣៨ករណី) ។
លោកបន្តថា ក្នុងចំណោមបទល្មើសជាង៤ ០០០ករណីនោះ មានបទល្មើសចំនួន៥១១ករណីត្រូវបានពិន័យអន្តរការណ៍ និងសំណុំរឿងចំនួន៥១៥ករណី ត្រូវបានបញ្ជូនទៅតុលាការ ដែលភាគច្រើនទាក់ទងនឹងការទន្ទ្រានកាន់កាប់ដីព្រៃរបស់រដ្ឋក្នុងតំបន់អភិរក្សដោយខុសច្បាប់ ការកាប់បំផ្លាញឈើ ការបរបាញ់សត្វ ជាដើម។
លោក នេត្រ ភក្ត្រា បញ្ជាក់ថា ចំនួនតួលេខបទល្មើសដែលមន្ត្រីឧទ្យានុរក្សបង្រ្កាបបានក្នុងរយៈពេល៦ខែនេះ បើប្រៀបធៀបរយៈពេលដូចគ្នានៅឆ្នាំ២០២០ គឺមានចំនួនប្រហាក់ប្រហែលគ្នា។
លោក នេត្រ ភក្ត្រា បញ្ជាក់ថា៖ «ក្រសួងបរិស្ថាន សូមគូសបញ្ជាក់ថា បទល្មើសធនធានធម្មជាតិទ្រង់ទ្រាយធំនៅក្នុងតំបន់ការពារធម្មជាតិ លែងមានទៀតហើយ! តែនៅមានបទល្មើសទ្រង់ទ្រាយតូចៗកើតឡើង ដែលសមត្ថកិច្ចក្រសួងបរិស្ថាននិងសមត្ថកិច្ចពាក់ព័ន្ធ បាននិងកំពុងបន្តអនុវត្តច្បាប់ដោយការទទួលខុសត្រូវ។ ក្រសួងបរិស្ថាន នឹងបន្តបេសកកម្មរបស់ខ្លួនប្រកបដោយការទទួលខុសត្រូវខ្ពស់និងវិជ្ជាជីវៈ ក្នុងការគ្រប់គ្រងនិងអភិរក្សតំបន់ការពារធម្មជាតិនៅក្នុងប្រទេសកម្ពុជាសម្រាប់មនុស្សរាប់ជំនាន់ទៅមុខទៀត»។
លោក នេត្រ ភក្ត្រា អះអាងថា បច្ចុប្បន្ន មានមន្ត្រីឧទ្យានុរក្សចំនួន១ ២៦០នាក់របស់ខ្លួន ក្រសួងបានសហការជាមួយកម្លាំងមានសមត្ថកិច្ចពាក់ព័ន្ធ ចុះល្បាតនិងទប់ស្កាត់បទល្មើសធនធានធម្មជាតិ នៅក្នុងតំបន់ការពារធម្មជាតិនិងរបៀងអភិរក្សជីវចម្រុះទាំង៧៥កន្លែង ដែលមានផ្ទៃដីសរុបជាង៧លានហិកតា។
កាលពីថ្ងៃទី១៧ ខែមិថុនា ឆ្នាំ២០២១ ស្ថានទូតសហរដ្ឋអាមេរិកប្រចាំកម្ពុជា បានប្រកាសផ្តាច់ជំនួយពីរដ្ឋាភិបាលកម្ពុជាលើគម្រោង «ព្រៃឡង់បៃតង» ជាការឆ្លើយតបនឹងវិធានការរបស់រដ្ឋាភិបាលដែលបិទខ្ទប់សំឡេងនិងសកម្មភាពសកម្មជនការពារព្រៃឈើ មិនឱ្យចូលល្បាតនៅតំបន់ព្រៃឡង់ ហើយព្រៃឈើក្នុងតំបន់ការពារមួយនេះនៅបន្តរងការកាប់បំផ្លាញ។
អង្គការជាតិនិងអន្តរជាតិបានរកឃើញថា ក្នុងរយៈពេល២០ឆ្នាំចុងក្រោយនេះ ទំហំព្រៃឡង់ជាង១សែន (១០២ ៤៣៦) ហិកតា ឬស្មើនឹង ២៤% ត្រូវបានបាត់បង់ ក្លាយជាវាលរហោឋាន។ ដោយឡែក នៅទូទាំងប្រទេសកម្ពុជា បានបាត់បង់គម្របព្រៃឈើសរុបរហូតដល់ទៅ២លាន៣សែនហិកតា ធ្វើឱ្យកម្ពុជាក្លាយជាប្រទេសទាំង១០ក្នុងពិភពលោកដែលរងការបាត់បង់ព្រៃឈើខ្លាំងជាងគេបំផុត៕
អត្ថបទទាក់ទង