មន្រ្តីក្រសួងបរិស្ថាន អំពាវនាវឱ្យពលរដ្ឋទាំងនៅក្នុងតំបន់ការពារធម្មជាតិនិងទូទាំងប្រទេសចូលរួមថែរក្សាធនធនធម្មជាតិនិងសត្វទាំងឡាយដែលមាននៅក្នុងតំបន់ការពារទេសភាពព្រែកល្ពៅ ខណៈតំបន់មួយនេះគ្រោងដាក់ចូលជា«តំបន់រ៉ាមសារ»ក្នុងពេលខាងមុខ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់ វីអូឌី ថាតំបន់ការពារទេសភាពព្រែកល្ពៅ ជាតំបន់ការពារធម្មជាតិមួយ ស្ថិតនៅក្នុងស្រុកចំនួនពីរក្នុងខេត្តតាកែវ រួមមាន ស្រុកកោះអណ្តែត និងស្រុកបូរីជល់សារ ដែលមានផ្ទៃដីប្រមាណជាង៨ ០០០ហិកតា។
លោកថា មូលហេតុដែលក្រសួងគ្រោងដាក់តំបន់ទេសភាពព្រែកល្ពៅ ជាតំបន់រ៉ាមសារ ដោយសារតំបន់ការពារមួយនេះ បានផ្តល់ធនធានធម្មជាតិសម្រាប់ជីវភាពរស់នៅរបស់ប្រជាសហគមន៍ជាច្រើន។ មិនតែប៉ុណ្ណោះ លោកថា តំបន់នេះបានផ្តល់ជាទីជម្រកសម្រាប់សត្វស្លាបជាច្រើនប្រភេទ ជាពិសេសសត្វក្រៀល ដែលងាយទទួលរងការគំរាមកំហែងជាងគេនៅប្រទេសកម្ពុជា។
បន្ថែមពីនេះ លោកថា តំបន់ការពារព្រែកល្ពៅនេះក៏ជាតំបន់ដីសើមងាយស្រួលសម្រាប់សត្វរស់នៅ ដូចជា ពពួកសត្វចាបព្រៃវែង រនាលវ័រ និងទុងប្រផេះ ជាដើម។
លោក នេត្រ ភក្រ្តា បន្តថា៖ «ការដាក់តំបន់នេះជាតំបន់រ៉ាមសារ គឺដើម្បីធ្វើការពារឱ្យបានមោះមុត ហើយការដាក់តំបន់ទេសភាពព្រែកល្ពៅ ជាតំបន់រ៉ាមសារ ក៏មានអត្ថប្រយោជន៍ផ្សេងៗទៀត ដូចជា ទី១ មិនត្រឹមតែបង្ហាញថាតំបន់ដីសើមនេះមានសារៈសំខាន់ជាអន្តរជាតិ និងមានការទទួលស្គាល់ជាអន្តរជាតិ ដោយអនុសញ្ញារ៉ាមសារ ដែលជាកិច្ចការពារមួយ ត្រូវបានទទួលស្គាល់ដោយអន្តរជាតិ»។
អ្នកនាំពាក្យក្រសួងបរិស្ថានរូបនេះបន្តទៀតថា ការដាក់តំបន់នេះជាតំបន់រ៉ាមសារ នឹងផ្តល់ផលប្រយោជន៍មួយចំនួនទៀត ដូចជា អាចបង្កើនការយល់ដឹងជាសាធារណៈឱ្យស្គាល់ពីសារៈសំខាន់នៃតំបន់ដីសើម បង្កើនការចូលរួមពីអ្នកពាក់ព័ន្ធទាំងអស់ក្នុងការគ្រប់គ្រងតំបន់ដីសើម ហើយនឹងអាចមានការគាំទ្រកាន់តែច្រើនជាងមុនក្នុងការការពារតំបន់នេះ ក៏ដូចជាតំបន់នៅជុំវិញ និងបង្កើនមូលនិធិសម្រាប់អភិរក្សទាំងក្នុងនិងក្រៅប្រទេស ព្រមទាំងអាចបង្កើតឱកាសក្នុងការស្រាវជ្រាវផ្នែកវិទ្យាសាស្រ្ត និងអេកូទេសចរណ៍នៅក្នុងតំបន់នោះទៀតផង។
ដោយឡែក ប្រធានមន្ទីរបរិស្ថានខេត្តតាកែវ លោក ឆយ ម៉ុនលី មានប្រសាសន៍ថា មន្ត្រីជំនាញនិងអាជ្ញាធរមូលដ្ឋានបានរៀបចំដាក់តំបន់ការពារទេសភាពព្រែកល្ពៅ ទៅជា«តំបន់រ៉ាមសារ» រួចរាល់ហើយ ដោយនៅរង់ចាំការសម្រេចពីប្រមុខរដ្ឋាភិបាលតែប៉ុណ្ណោះ។
ស្របពេលគ្នានេះដែរ ប្រធានមន្ទីរបរិស្ថានរូបនេះក៏ចង់ឃើញតំបន់នេះនៅតែអាចរក្សាបានគង់វង្សនិងរីកចម្រើនសម្រាប់ក្មេងជំនាន់ក្រោយ។
លោកបានបន្តថា៖ «ខ្ញុំអំពាវនាវដល់ប្រជាសហគមន៍ដែលរស់នៅជុំវិញតំបន់ហ្នឹង ក៏ដូចជាភ្ញៀវជាតិ អន្តរជាតិ សូមឱ្យទៅទស្សនាហើយ ថែរក្សាជីវចម្រុះនៅក្នុងតំបន់ហ្នឹង ហើយក៏សូមឱ្យមានការគាំទ្រពីថ្នាក់ជាតិ ក៏ដូចជាសាធារណជនទាំងអស់ ទាំងអង្គការជាតិនិងអង្គការអន្តរជាតិហ្នឹង ឱ្យគាត់ជួយគាំទ្រ ដើម្បីការពារតំបន់ការពារទេសភាពព្រែកល្ពៅ ក្រោយពេលដែលយើងក្លាយជាតំបន់រ៉ាមសារ»។
នៅក្នុងប្រទេសកម្ពុជា មានតំបន់រ៉ាមសារចំនួន៥ ដែលតំបន់ទាំងនោះមានដូចជា តំបន់រ៉ាមសារស្ទឹងត្រែង តំបន់រ៉ាមសារកោះកាពិ តំបន់ព្រែកទាល់ខេត្តបាត់ដំបង បឹងទន្លេឆ្មា និងតំបន់រ៉ាមសារស្ទឹងសែន ខេត្តកំពង់ធំ ដែលមានផ្ទៃដីសរុបចំនួន៤២ ២៥៧ហិកតា។
អនុសញ្ញារ៉ាមសារ ធ្វើឡើងក្នុងគោលបំណងសំខាន់៣ គឺការប្រើប្រាស់តំបន់ដីសើមប្រកបដោយភាពឆ្លាតវៃ កំណត់និងបង្កើតដីសើមជាលក្ខណៈអន្តរជាតិ និងកិច្ចសហការអន្តរជាតិ។ បច្ចុប្បន្ននេះ តំបន់ដីសើមដែលត្រូវបានដាក់បញ្ចូលជាតំបន់រ៉ាមសារមានចំនួន២ ៤២៤កន្លែងនៅលើពិភពលោក គ្របដណ្តប់លើផ្ទៃដីប្រមាណ២៥លានហិកតា៕
