អាជ្ញាធរខណ្ឌឫស្សីកែវ រាជធានីភ្នំពេញ នៅថ្ងៃអង្គារនេះ បានបន្តចុះរុះរើលំនៅដ្ឋានរបស់ប្រជាពលរដ្ឋចំនួន២០គ្រួសារ ស្ថិតនៅក្នុងសហគមន៍បឹងឈូកអេ សង្កាត់គីឡូម៉ែត្រលេខ៦ រាជធានីភ្នំពេញ ដោយគ្មានសំណង។
ប្រជាពលរដ្ឋរងគ្រោះម្នាក់ដែលមានលំនៅក្នុងសហគមន៍បឹងឈូកអេ អ្នកស្រី តូច ឡៃអៀង បានប្រាប់ វីអូឌី នៅថ្ងៃអង្គារនេះថា នៅព្រឹកនេះ មានកងកម្លាំងប្រជាការពារចុះទៅរុះរើផ្ទះប្រជាពលរដ្ឋជាបន្តបន្ទាប់អស់ប្រមាណជា១០ខ្នងហើយ គិតចាប់តាំងពីថ្ងៃចន្ទមក។ ជនរងគ្រោះដដែលក៏បានបញ្ជាក់ផងដែរថា អាជ្ញាធរទុកដីឱ្យជនរងគ្រោះទាំងនោះតែបន្តិចបន្តួចប៉ុណ្ណោះសម្រាប់ស្នាក់នៅបណ្ដោះអាសន្ន។
កាលពីថ្ងៃចន្ទ អាជ្ញាធរខណ្ឌឫស្សីកែវបានចុះរុះរើផ្ទះប្រជាពលរដ្ឋចំនួន៣គ្រួសារនៅសហគមន៍បឹងឈូកអេ [A] រាជធានីភ្នំពេញ ដើម្បីពង្រីកផ្លូវ ប៉ុន្តែពលរដ្ឋអះអាងថា ការរុះរើនេះធ្វើឡើងដោយមិនបានផ្ដល់សំណងណាមួយដល់ពួកគាត់ឡើយ។
ពលរដ្ឋម្នាក់ក្នុងចំណោម១០គ្រួសារដែលត្រូវអាជ្ញាធរខណ្ឌរុះរើផ្ទះ អ្នកស្រី ចែម ចន្នី បានលើកឡើងនៅថ្ងៃទី០២ ខែសីហា ថាខាងអាជ្ញាធរបានសន្យាថានឹងផ្ដល់ជាសំណងជូនពួកគាត់ តាំងពីថ្ងៃទី២៧ ខែសីហា ឆ្នាំ២០២០ ប៉ុន្តែថ្មីៗនេះ ស្រាប់តែអាជ្ញាធរជូនដំណឹងជាថ្មីឱ្យពលរដ្ឋរុះរើផ្ទះក្នុងរយៈពេលមួយសប្តាហ៍ ដោយមិនមានសំណងទៅវិញ។
អ្នកស្រីបន្តថា គ្រួសាររបស់គាត់បានរស់នៅលើដីនោះតាំងពីឆ្នាំ១៩៩៥ ហើយនៅពេលអាជ្ញាធរចុះរុះរើផ្ទះរបស់ពួកគាត់ ដោយគ្មានសំណងបែបនេះ ធ្វើឱ្យពួកគាត់មិនមានទីជម្រកសម្រាប់រស់នៅឡើយ។ ករណីនេះ អ្នកស្រីនៅតែស្នើយ៉ាងទទូចឱ្យអាជ្ញាធរដោះស្រាយសំណងជូនពួកគាត់ ដើម្បីឱ្យពួកគាត់អាចរកលំនៅថ្មីសម្រាប់រស់នៅបាន។
អ្នកស្រី ចែម ចន្នី និយាយថា៖ «មិនដឹងថាទៅរស់នៅណាទេ ព្រោះរុះហើយមិនដឹងទៅនៅណានៅណី! មិនមែនរុះរើធម្មតាទេ វាយខ្ទេចវាយខ្ទី [វាយផ្ទះរបស់អ្នកស្រី] អស់ហ្មង […] ខ្ញុំសូមឱ្យខាងអាជ្ញាធរជួយអន្តរាគមន៍ផង ជួយដោះស្រាយឱ្យសមរម្យសិនមក ព្រោះពួកខ្ញុំមិនប្រឆាំងនឹងការអភិវឌ្ឍទេ តែសូមដោះស្រាយឱ្យពួកខ្ញុំបាននៅសមរម្យសិនមក ព្រោះអីពួកខ្ញុំដឹងតែរុះ [រើផ្ទះ] ហើយ មិនប្រឆាំងទេ! ដោះស្រាយសិនទៅ ចាំពួកខ្ញុំរុះតាមក្រោយ មិនចាំបាច់ពួកគាត់មករកក៏បាន ខ្ញុំរុះខ្លួនឯងក៏បានដែរ សំខាន់មានដំណោះស្រាយជូនពួកខ្ញុំសិនមក»។
លោក កែវ តុង ពលរដ្ឋម្នាក់ទៀតនៅសហគមន៍បឹងឈូកអេ បានលើកឡើងថា គ្រួសាររបស់លោកមិនដឹងជាត្រូវទៅរស់នៅទីណាទៀតទេ ពេលគេរុះរើផ្ទះអស់បែបនេះ។
លោកបន្តថា៖ «ខ្ញុំអត់ទៅណាទេបង គេរុះរើអស់ហើយ ឥលូវនៅតែខ្នង ឆ្អឹងផ្ទះ។ ខ្ញុំអត់ទៅណាទេ ខ្ញុំមានតែបោះតង់ដេកទីនេះដដែល ព្រោះយើងទៅណាអត់កើត»។
វីអូឌី មិនអាចសុំការឆ្លើយតបពីអភិបាលខណ្ឌឫស្សីកែវ លោក ជា ពិសី បានទេ ខណៈអភិបាលរងខណ្ឌឫស្សីកែវ លោក ប្រាជ្ញ សីហា បដិសេធអត្ថាធិប្បាយដោយប្រាប់ថាកំពុងជាប់ប្រជុំ។
មន្ត្រីជាន់ខ្ពស់នៃអង្គការការពារសិទ្ធិមនុស្សលីកាដូ លោក អំ សំអាត បានលើកឡើងថា ការបណ្តេញចេញឬការបំផ្លិចបំផ្លាញផ្ទះពលរដ្ឋទាំងបង្ខំ បានបង្កឱ្យប៉ះពាល់ដល់សតិអារម្មណ៍ និងធ្វើឱ្យមានការិះគន់ទាក់ទងការរំលោភបំពានលើផ្នែកសិទ្ធិមនុស្ស។
លោកបញ្ជាក់ថា៖ «អាជ្ញាធរគួរផ្តល់ព័ត៌មានរយៈពេលមួយសមរម្យនិងការស្វែងរកដំណោះស្រាយណាមួយដែលអាចយល់ស្របគ្នាបាន ដោយមិនមានចម្រូងចម្រាសអំពើហិង្សាណាកើតឡើង»។
លោកបន្ថែមថា៖ «ការអភិវឌ្ឍ ធ្វើផ្លូធ្វើអ្វីក៏ដោយ មិនថាសម័យណាទេ ទោះបីជាសម័យកូវីដក៏ដោយ ករណីណាក៏ដោយ ក៏ត្រូវមានការដោះស្រាយដ៏សមរម្យមួយក្នុងភាពជាមនុស្ស និងដំណោះស្រាយទទួលយកបាន។ ហើយក្នុងសម័យកូវីដទៀត បើមិនមានដំណោះស្រាយ វាអាចបះពាល់ច្រើនដល់ប្រជាពលរដ្ឋ មិនដឹងរស់នៅទីណា ដូច្នេះគាត់ចេះតែប្រមូលផ្តុំរស់នៅ ឬការរស់នៅមិនសមរម្យ វាជាហានិភ័យខ្ពស់សម្រាប់ពួកគាត់ក្នុងការឆ្លងជំងឺ»៕
