ប្រជាពលរដ្ឋជាង១០គ្រួសារ រស់នៅសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ ទាមទារឱ្យអាជ្ញាធរបកស្រាយពីមូលហេតុនៃការចាក់ដីចូលទៅក្នុងព្រែក ត្រង់ចំណុចស្ពានលេខ៧ តាមបណ្ដោយផ្លូវជាតិលេខ៦។
ពលរដ្ឋម្នាក់ដែលមានទីលំនៅតាមបណ្ដោយព្រែកជីក នៅក្នុងភូមិបាក់ខែង សង្កាត់បាក់ខែង លោក ពូក ចាន់តារា បានលើកឡើងថា កាលពីថ្ងៃទី២២ និងថ្ងៃទី២៣ ខែកក្កដា ឆ្នាំ២០២១ ពួកគាត់បានឃើញរថយន្តជាច្រើនគ្រឿង បានឈូសឆាយ និងចាក់ដីនិងខ្សាច់ចូលទៅក្នុងព្រែកជីក ត្រង់ចំណុចស្ពានទី៧ ក្នុងនោះក៏មានកម្លាំងការពារសណ្តាប់ខណ្ឌជ្រោយចង្វារចុះទៅជាមួយផងដែរ។
លោកបន្តថា ពេលបានឃើញបែបនេះ ពលរដ្ឋបាននាំគ្នាសួរនាំទៅអាជ្ញាធរខណ្ឌពីមូលហេតុនៃការចាក់ដីលុបព្រែកនេះ ប៉ុន្តែពួកគេបានបដិសេធឆ្លើយតប និងបានតម្រូវឱ្យសួរទៅខាងសាលាខណ្ឌ ហើយពួកគាត់ក៏បានដាក់បណ្តឹងទៅសាលាខណ្ឌ ប៉ុន្តែមកដល់ពេលនេះ នៅពុំទាន់ទទួលបានចម្លើយនៅឡើយ។
លោកថា៖ «គាត់អត់បានផ្ដល់ដំណឹងមកដល់ប្រជាជនយើងទេ អ៊ីចឹងការអភិវឌ្ឍអីទាំងអស់ហ្នឹង យើងទទួលស្គាល់ យើងក៏ចូលរួមជាមួយការអភិវឌ្ឍទាំងអស់ហ្នឹងដែរ ទោះជារដ្ឋក៏ដោយ! ប៉ុន្តយើងជាអ្នកអាស្រ័យផលនៅទីនេះ ហើយយ៉ាងណា ទោះរដ្ឋធ្វើយ៉ាងម៉េច ក៏គួរផ្ដល់ដំណឹងដល់ប្រជាជនមូលដ្ឋានដែរ មិនអ៊ីចឹង? តែនេះវាអត់មាន [ដឹងដំណឹង] អីទាំងអស់សម្រាប់ប្រជាជន»។
លោក ពូក ចាន់តារា ក៏បានអំពាវនាវឱ្យអាជ្ញាធរមូលដ្ឋានគិតគូរពីផលប៉ះពាល់នៃការចាក់ដីចូលព្រែកនេះ ព្រោះថា ដីនៅទីនោះជាទំនាបដែលអាចនឹងមានការលិចលង់ផ្ទះពលរដ្ឋនៅពេលមានភ្លៀងធ្លាក់ខ្លាំង។
ប្រជាពលរដ្ឋមួយរូបទៀតដែលមានលំនៅដ្ឋានតាមបណ្ដោយព្រែកជីកនោះ លោក អ៊ុំ តុលា បានលើកឡើងថា ប្រជាពលរដ្ឋមិនរារាំងការអភិវឌ្ឍណាមួយរបស់រដ្ឋាភិបាលទេ ប៉ុន្តែសុំឱ្យមានការបង្ហាញពីគម្រោងនៃការលុបព្រែកនេះឱ្យពួកគាត់បានដឹង ដើម្បីឱ្យពលរដ្ឋអស់ចម្ងល់ និងបញ្ឈប់ការភ័យខ្លាចថាក្រែងគម្រោងនេះប៉ះពាល់ដល់ដីរបស់ពួកគាត់។
លោកបន្តថា៖ «ប្រសិនបើគម្រោងរបស់សាលាក្រុង ប្រជាពលរដ្ឋពិភាក្សារួមមតិគ្នាស្នើសុំឱ្យបង្ហាញពីគម្រោងរបស់សាលាក្រុងមក។ ជាធម្មតា សាលាក្រុងរាជធានីភ្នំពេញ គឺគាត់មិនដែលធ្វើអីកំបាំងមុខទេ គឺគាត់ធ្វើមក គឺបង្ហាញប្លង់ណែនាំពន្យល់ ឬក៏បោះត្រាមកថា គម្រោងអភិវឌ្ឍរបស់សាលាក្រុង ធ្វើអីមួយហើយគឺច្បាស់លាស់ណាស់»។
ក្រុមប្រជាពលរដ្ឋឱ្យដឹងបន្ថែមថា បើតាមពាក្យចចាមអារ៉ាម ពួកគាត់ឮថា ការចាក់ដីលុបព្រែកនេះអាចត្រូវគេយកទៅសាងសង់ជាមន្ទីរពេទ្យឬសាលាឃុំ ខណៈពាក្យចចាមអារ៉ាមខ្លះទៀត គេយកដីកន្លែងនោះកសាងជាបុរីនិងផ្ទះល្វែង ដើម្បីធ្វើជាសំណងទៅកាន់ប្រជាពលរដ្ឋដែលមានលំនៅដ្ឋានប៉ះពាល់ផ្លូវល្បឿនលឿននៅតំបន់ព្រែកតារដ្ឋ។ ក្រុមពលរដ្ឋបន្តថា ដោយសារតែមានពាក្យចចាមអារ៉ាមបែបនេះ ទើបពួកគាត់ស្នើឱ្យអាជ្ញាធរមូលដ្ឋានបញ្ជាក់ឱ្យបានច្បាស់ពីមូលហេតុនៃការចាក់ដីលុបព្រែកនេះ។
ទាក់ទងទៅនឹងបញ្ហានេះ ចៅសង្កាត់បាក់ខែង លោក គង់ ប៊ុនលី ប្រាប់ វីអូឌី នៅថ្ងៃទី០២ ខែសីហានេះថា នៅថ្ងៃអង្គារនេះ រដ្ឋបាលខណ្ឌនឹងមានការអញ្ជើញពលរដ្ឋដែលមានទីលំនៅនៅតំបន់នោះ មកពន្យល់ពីផែនការដែលខាងរដ្ឋបាលរាជធានីភ្នំពេញគ្រោងនឹងធ្វើបន្ទាប់ពីការចាក់ដីនេះ។
ប៉ុន្តែចៅសង្កាត់រូបនេះបង្ហើបឱ្យដឹងថា តាមការប្រជុំនៅរដ្ឋបាលរាជធានីភ្នំពេញនាពេលកន្លងមក ព្រែកដែលកំពុងមានការចាក់ដីលុបនេះ គឺសម្រាប់កសាងមណ្ឌលសុខភាពបម្រើដល់សង្កាត់ចំនួន៣ ដែលមានដូចជា សង្កាត់ព្រែកលាភ សង្កាត់ព្រែកតាសេក និងសង្កាត់បាក់ខែង។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ក្នុងករណីលុបបឹងឬព្រែកនីមួយៗ អាជ្ញាធរគួរសិក្សាវាយតម្លៃពីផលប៉ះពាល់នៃការលុបនោះឱ្យបានច្បាស់លាស់ជាមុនសិន ចៀសវាងបង្កការលំបាកដល់ការរស់នៅរបស់ប្រជាពលរដ្ឋ ជាពិសេសនៅពេលមានភ្លៀងធ្លាក់ម្តងៗដែលអាចបង្កជាជំនន់ទឹកភ្លៀង។
លោកបន្តថា៖ «ឧទាហរណ៍ថា ព្រែកហ្នឹងវាគ្មានទំនាក់ទំនងអីនៅក្នុងការរំដោះទឹក នៅក្នុងការស្តុបទឹក នៅក្នុងការជួយបង្ហូរទឹកទេ អាហ្នឹងគឺយើងអាចកែច្នៃវាបាន ដើម្បីយកវាទៅធ្វើស្អីផ្សេង ដូចជា ការលុបចាក់ធ្វើអគារ តែបើវានៅមានសារៈសំខាន់នៅក្នុងការនាំទឹកភ្លៀង ជួយរំដោះការជន់លិចនៅក្នុងភូមិ នៅក្នុងសហគមន៍របស់ប្រជាពលរដ្ឋ បានន័យថា វានៅតែមានផលប្រយោជន៍ចំពោះសាធារណៈ គឺត្រូវរក្សាទុក មិនអាចទៅលុបទៅអីអ៊ីចឹងទេ»៕
