តុលាការខេត្តកណ្ដាលបានដោះលែងអ្នកតវ៉ាដីធ្លីចំនួន៩នាក់ឱ្យនៅក្រៅឃុំបណ្តោះអាសន្ន ដោយភ្ជាប់ជាមួយលក្ខខណ្ឌឈប់តវ៉ា និងព្រមយកសំណងតាមអាជ្ញាធរកំណត់ត្រឹមតែ៨ដុល្លារក្នុង១ម៉ែត្រការ៉េ។
កាលពីថ្ងៃទី១២ ខែកញ្ញា ឆ្នាំ២០២១ មានការប៉ះទង្គិចគ្នាមួយរវាងពលរដ្ឋមានជម្លោះដីធ្លីជាមួយគម្រោងអភិវឌ្ឍន៍ព្រលានយន្តហោះថ្មីរបស់ក្រុមហ៊ុន OCIC នៅខេត្តកណ្តាល ជាមួយនឹងសមត្ថកិច្ច ហើយសមត្ថកិច្ចបានចាប់ខ្លួនមនុស្ស៣០នាក់បញ្ជូនទៅតុលាការ ប៉ុន្តែបានដោះលែងមនុស្សចំនួន២១នាក់វិញ ខណៈ៩នាក់ផ្សេងទៀតបញ្ជូនទៅឃុំខ្លួនបណ្តោះអាសន្ននៅពន្ធនាគារ ក្រោមការចោទប្រកាន់ថា ពួកគេបានបង្កហិង្សាដោយចេតនាទៅលើសមត្ថកិច្ចឱ្យរងរបួស។
ក្នុងដីកាសម្រេចចុះថ្ងៃទី២០ ខែកញ្ញានេះ ចៅក្រមស៊ើបសួរសាលាដំបូងខេត្តកណ្ដាល លោក វ៉ាន់ សុបញ្ញា បានសម្រេចដោះលែងអ្នកតវ៉ាដីធ្លី៩នាក់នោះឱ្យនៅក្រៅឃុំបណ្តោះអាសន្ន ប៉ុន្តែដាក់ឱ្យស្ថិតក្រោមការត្រួតពិនិត្យរបស់តុលាការដដែល។
បើតាមដីកាដដែលនេះ តុលាការបានចោទប្រកាន់អ្នកតវ៉ាដីធ្លីទាំង៩នាក់នោះ ចំនួន៣បទចោទ រួមមាន «បទហិង្សាដោយចេតនាមានស្ថានទម្ងន់ទោស បទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបទប្រឆាំងនឹងមន្ត្រីរាជការសាធារណៈមានស្ថានទម្ងន់ទោស»។
ពលរដ្ឋម្នាក់កំពុងរត់គេចខ្លួន ខណៈប្រពន្ធគាត់ទើបតែត្រូវបានដោះលែង បានថ្លែងនៅថ្ងៃអង្គារនេះ ក្នុងលក្ខខណ្ឌមិនបញ្ចេញឈ្មោះដោយបារម្ភពីសុវត្ថិភាព ថាករណីតុលាការដោះលែងប្រពន្ធគាត់និងពលរដ្ឋ៨នាក់ផ្សេងទៀតនេះ បានធ្វើឡើងក្នុងលក្ខខណ្ឌបង្ខិតបង្ខំនិងគំរាមគំហែង។
ពលរដ្ឋរូបនេះបន្តថា អាជ្ញាធរបានតម្រូវឱ្យប្រជាពលរដ្ឋទាំងនោះធ្វើលិខិតស្នាមផ្ដិតមេដៃសុំទោស បញ្ឈប់ការតវ៉ា និងតម្រូវឱ្យពលរដ្ឋទទួលយកសំណងត្រឹម៨ដុល្លារក្នុងមួយម៉ែត្រការ៉េតាមការកំណត់របស់អាជ្ញាធរ។ លោកបន្តទៀតថា ពួកគាត់ប្រឈមបាត់បង់ដីធ្លីទាំងមិនទទួលបានសំណងសមរម្យ ហើយម្ចាស់ដីត្រូវជាប់ពន្ធនាគារយ៉ាងអយុត្តិធម៌ថែមទៀតនោះ។
លោកបន្ថែមថា៖ «ពួកខ្ញុំអាចនឹងតវ៉ាទៀត បើខ្ញុំអត់តវ៉ា ឱ្យខ្ញុំយកតម្លៃហ្នឹង ដូចឱ្យពួកខ្ញុំស្លាប់ទាំងរស់អ៊ីចឹង។ ខ្ញុំតូចចិត្តណាស់ ដីយើងគេយកទៅហើយ យើងគ្រាន់តែការពារដីខ្លួនសោះ បែរជាយើងរងបណ្ដឹងសុទ្ធតែបទឧក្រិដ្ឋទៀត ហើយជាប់ឃុំហ្នឹងសុទ្ធតែស្រីៗទៅទៀត»។
ក្នុងលិខិតសុំទោសចុះថ្ងៃទី១៧ ខែកញ្ញា ឆ្នាំ២០២១ ប្រជាពលរដ្ឋបានសុំទោសអភិបាលខេត្តកណ្តាល លោក គង់ សោភ័ណ្ឌ និងបានទទួលកំហុសចំពោះហេតុការណ៍ប៉ះទង្គិចគ្នារវាងពលរដ្ឋនិងសមត្ថកិច្ច កាលពីថ្ងៃទី១២ ខែកញ្ញា ទៀតផង។
បើតាមលិខិតដដែលនោះ ប្រជាពលរដ្ឋបានសន្យាឈប់តវ៉ាទាមទារប្រឆាំងគម្រោងអភិវឌ្ឍន៍ព្រលានយន្តហោះអន្តរជាតិថ្មី និងត្រូវចូលរួមអភិវឌ្ឍជាមួយគម្រោងនេះរហូតទទួលបានជោគជ័យ។
មន្ត្រីសម្របសម្រួលផ្នែកធុរកិច្ច និងសិទ្ធិមនុស្ស របស់មជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា តាមព័ត៌មានដែលលោកទទួលបានពីប្រជាពលរដ្ឋ ការដោះលែងពលរដ្ឋទាំង៩នាក់នោះបានប្តូរជាមួយលក្ខខណ្ឌមួយចំនួនពិតមែន។
លោកបន្តថា៖ «រាល់ទំនាស់ដីធ្លីដែលដោះស្រាយមិនបាន នៅពេលចុងបញ្ចប់ហ្នឹង គឺគាត់នឹងរងផលប៉ះពាល់ដោយការគំរាមកំហែងខាងផ្លូវតុលាការហ្នឹងហើយ។ នៅពេលណាមានការចាប់ខ្លួន បើសិនជាចង់រួចខ្លួន គឺត្រូវមានលក្ខខណ្ឌធ្វើតាមតម្រូវការរបស់ក្រុមហ៊ុននិងអាជ្ញាធរ។ អ៊ីចឹង ទង្វើនេះជាការរំលោភសិទ្ធិរបស់ប្រជាពលរដ្ឋធ្ងន់ធ្ងរណាស់ បើនិយាយសិទ្ធិមនុស្ស អានេះគេហៅថា ការដាក់សម្ពាធឱ្យមានការទទួលយកសំណងទាំងពលរដ្ឋមិនពេញចិត្ត»។
មន្ត្រីសិទ្ធិមនុស្សរូបនេះបានស្នើដល់អាជ្ញាធរនិងក្រុមហ៊ុនស្វែងរកដំណោះស្រាយតាមនីតិវិធីក្នុងការដោះស្រាយផលប៉ះពាល់ជូនពលរដ្ឋ ជាជាងប្រើប្រាស់ប្រព័ន្ធតុលាការមកគំរាមកំហែងឱ្យប្រជាពលរដ្ឋទទួលទាំងបង្ខំចិត្តបែបនេះ ដែលជាទង្វើខុសច្បាប់និងរំលោភសិទ្ធិធ្ងន់ធ្ងរ។
អ្នកនាំពាក្យសាលាដំបូងខេត្តកណ្តាល លោក សូ សារិន បានច្រានចោលការលើកឡើងនេះ។ លោកថា ការដោះលែងពលរដ្ឋ៩នាក់ឱ្យនៅក្រៅឃុំបណ្តោះអាសន្ននេះ គឺធ្វើឡើងតាមការស្នើសុំរបស់អ្នកជាប់ឃុំ ហើយសំណុំរឿងនេះក៏មិនទាន់បញ្ចប់ដែរ ព្រោះពលរដ្ឋទាំង៩នាក់ស្ថិតក្រោមការត្រួតពិនិត្យរបស់តុលាការដដែល។
លោកបន្ថែមថា៖ «អាហ្នឹងជាសម្តីរបស់គាត់ទេ ប៉ុន្តែតុលាការ គឺយើងបានដាក់គាត់ឱ្យស្ថិតក្រោមការត្រួតពិនិត្យរបស់តុលាការ ឱ្យគាត់នៅក្រៅឃុំបណ្តោះអាសន្ន។ ការដោះលែងនេះ គឺមានការស្នើសុំពីជនសង្ស័យផ្ទាល់តែម្តង»។
បើតាមការអះអាងរបស់ប្រជាពលរដ្ឋ គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ នេះ បានធ្វើឱ្យប៉ះពាល់ប្រជាពលរដ្ឋ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្តាលស្ទឹង ខេត្តកណ្តាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង១លានម៉ែត្រការ៉េ៕