ប្រជាពលរដ្ឋមួយចំនួនដែលកំពុងមានជម្លោះដីធ្លីជាមួយក្រុមហ៊ុនចិន ញូញៀន (Union Development Group ឬ UDG) ក្នុងខេត្តកោះកុង បដិសេធទទួលយកសំណង ខណៈអាជ្ញាធរបើកដំណើរការដោះស្រាយជុំវិញវិវាទដីធ្លីនេះ។
កាលពីថ្ងៃទី២៨ ខែកញ្ញា ឆ្នាំ២០២១ រដ្ឋបាលខេត្តកោះកុង បានប្រកាសអំពីដំណើរការដោះស្រាយវិវាទដីធ្លីជូនពលរដ្ឋប្រមាណ១ ៣៣៣គ្រួសារដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន ស្ថិតនៅស្រុកបទុមសាគរ និងស្រុកគិរីសាគរ នៃខេត្តនេះ។
អ្នកស្រី សាំង ពុយ ជាប្រជាពលរដ្ឋរស់នៅឃុំកោះស្តេច ស្រុកគិរិសាគរ ប្រាប់ វីអូឌី នៅថ្ងៃពុធនេះថា អ្នកស្រីមិនអាចទទួលយកសំណងតាមការដោះស្រាយរបស់អាជ្ញាធរនៅពេលនេះទេ ដោយសារការដោះស្រាយនេះពុំមានតម្លាភាព និងសំណងនោះមិនសមរម្យ។
ពលរដ្ឋរូបនេះអះអាងថា គ្រួសារអ្នកស្រីមានដីទំហំ៨ហិកតា មានបណ្ណកម្មសិទ្ធិ ពេញដោយដំណាំហូបផ្លែ ខណៈម្តាយអ្នកស្រីមានដីទំហំ១២ហិកតា ប៉ុន្តែការដោះស្រាយជាគោលនយោបាយរបស់អាជ្ញាធរពេលនេះ គឺមួយគ្រួសារបានតែ២ហិកតាប៉ុណ្ណោះ ទោះគ្រួសារនោះមានដីទំហំប៉ុណ្ណាក៏ដោយ។
អ្នកស្រីបន្ថែមថា៖ «ខ្ញុំអត់ពេញចិត្តទេ ចំពោះការដោះស្រាយបែបនេះ។ ខ្ញុំធ្លាប់បានសំណូមពរច្រើនលើកច្រើនសារហើយ ឱ្យដោះស្រាយតាមទំហំដីជាក់ស្តែង តាមស្ថានភាព តាមភូមិសាស្ត្រ តាមការកាន់កាប់។ តែចេញលទ្ធផលមកអ៊ីចឹង គឺក្រុមខ្ញុំមិនអាចទទួលយកបានទេ។ ហើយមួយទៀត ការដោះស្រាយនេះអត់មានការជួបប្រជុំឬពិភាក្សាជាមួយប្រជាពលរដ្ឋដែលរងផលប៉ះពាល់ផ្ទាល់ទេ គឺមកដល់គាត់ប្រកាសអ៊ីចឹងតែម្តង អត់មានជួបជុំឬបង្ហាញដីដែលត្រូវដោះដូរហ្នឹងទេ»។
លោក សែម ធី ជាពលរដ្ឋនៅឃុំព្រែកខ្សាច់ ស្រុកគិរីសាគរ ដែលអះអាងថាមានដីជាង៨ហិកតា និងមានបណ្ណកម្មសិទ្ធិត្រឹមត្រូវ បាននិយាយថា គ្រួសារលោកមិនអាចចាកចេញពីភូមិចាស់បានទេ ប្រសិនបើការដោះស្រាយនោះមិនបានផ្តល់សំណងសមរម្យ។
លោកបន្តថា ការចុះដោះស្រាយរបស់អាជ្ញាធរពេលនេះហាក់មានការគាបសង្កត់មកលើពលរដ្ឋឱ្យទទួលយកសំណងទាំងបង្ខំចិត្ត។ លោកបានទាមទារការដោះស្រាយទៅតាមតម្លៃទីផ្សារ។
លោកបន្ថែមថា៖ «សម្រាប់ខ្ញុំ អត់ចាកចេញទេ សុខចិត្តប្តូរស្លាប់រស់នៅហ្នឹងហើយ ទោះគេចេញអស់ក៏ដោយ ពីព្រោះការដោះស្រាយនេះអត់សមស្រប។ ការដោះដូរនេះ គឺខ្ញុំមិនអាចទទួលបានទេ»។
អ្នកស្រី ព្រាប រដ្ឋា នៅឃុំព្រែកខ្សាច់ម្នាក់ទៀតដែលមានដីលំនៅឋាន និងចម្ការត្រឹមតែជាង៦០អា ក៏មិនព្រមចាកចេញពីភូមិចាស់ដែរ ដោយបារម្ភខ្លាចជួបការលំបាកនិងបាត់បង់មុខរបរ ខណៈប្រជាពលរដ្ឋមួយចំនួនដែលទទួលបានការដោះស្រាយនាពេលកន្លងមក បានជួបការលំបាកដោយបាត់បង់មុខរបរនិងធ្លាក់ចុះនូវជីវភាពជាដើម។
អ្នកស្រីបន្ថែមថា៖ «ខ្ញុំអត់ព្រម ដោយសារខ្ញុំស្រឡាញ់ទីតាំងរបស់ខ្ញុំ ខ្ញុំចង់រកអ្វីក៏បាន។ មួយទៀត ខ្ញុំឃើញគំរូចាស់របស់អ្នកភូមិនៅឃុំភ្ញីមាសដែលគាត់ទៅហើយ។ ហើយគាត់បានត្រលប់មករកស៊ីកន្លែងចាស់វិញ ដែលពីមុនពួកគាត់ក៏គេឱ្យដី២ហិកតានិងលុយខ្លះអ៊ីចឹងដែរ ហើយគេធ្វើទាំងផ្ទះឱ្យនៅទៀត។ ប៉ុន្តែនៅតែមានពលរដ្ឋខ្លះមករកស៊ីកន្លែងចាស់ទៀត ហើយជីវភាពរបស់ពួកគាត់ធ្លាក់ខ្លាំងមែនទែន។ បើនិយាយពីកន្លែងខ្ញុំនេះ ខ្ញុំរកស៊ីផ្លូវគោកក៏បាន ផ្លូវសមុទ្រក៏បាន។ ម្ហូប បើខ្ញុំអត់លុយដោះ ក៏ខ្ញុំរកម្ហូបឆ្ងាញ់បានស៊ីដែរ ព្រោះខ្ញុំរកខ្លួនឯងបាន។ ទៅកន្លែងថ្មី ទៅរកអីណាបាន? នៅលើភ្នំហ្នឹង មានទឹកឯណារកត្រី មានសមុទ្រឯណារកក្តាមរកខ្យង»។
បើតាមអ្នកស្រី ព្រាប រដ្ឋ ការចុះដោះស្រាយផលប៉ះពាល់ដីធ្លីរបស់អាជ្ញាធរពាក់ព័ន្ធនៅពេលនេះ គឺមានពលរដ្ឋតិចតួចប៉ុណ្ណោះដែលបានឯកភាពទទួលយកសំណងនេះ។ អ្នកស្រីថា អ្នកទទួលយកនោះភាគច្រើនជាពលរដ្ឋទទួលបានសំណងម្តងរួចហើយ ដែលពួកគេជាប្រជាពលរដ្ឋស្នើសុំគោលនយោបាយបន្ថែមប៉ុណ្ណោះ។
ក្នុងសេចក្តីជូនដំណឹងរបស់រដ្ឋបាលខេត្តកោះកុង កាលពីថ្ងៃទី២៨ ខែកញ្ញានេះ បានឱ្យដឹងថា ក្រុមការងារអាជ្ញាធរជាតិដោះស្រាយទំនាស់ដីធ្លី និងអាជ្ញាធរពាក់ព័ន្ធក្នុងខេត្តកោះកុង កំពុងដំណើរការដោះស្រាយដីធ្លីជូនប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន ចំនួន៣ប្រភេទ។
អាជ្ញាធរខេត្តកោះកុង បញ្ជាក់ថា ប្រភេទទី១ ជាប្រជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុនចំនួន២៤៧គ្រួសារ ប្រភេទទី២ ជាប្រជាពលរដ្ឋរស់នៅខុសមូលដ្ឋានឬខុសភូមិឃុំចំនួន២៥៥គ្រួសារ និងប្រភេទទី៣ ជាប្រជាពលរដ្ឋស្នើសុំគោលនយោបាយបន្ថែមចំនួន៨៣១គ្រួសារ។
សេចក្តីជូនដំណឹងដដែលនេះអះអាងថា ក្នុងចំណោមពលរដ្ឋទាំង៣ប្រភេទនេះ ពលរដ្ឋភាគច្រើនបានយល់ព្រមនិងចុះកិច្ចសន្យាទទួលការដោះស្រាយជាគោលនយោបាយរបស់រដ្ឋាភិបាល ហើយថា អ្នកដែលព្រមទទួលយកការដោះស្រាយជាគោលនយោបាយនេះ អាជ្ញាធរនឹងរៀបចំចាប់ឆ្នោតយកដីឡូត៍ នៅថ្ងៃទី១ ខែតុលា ឆ្នាំ២០២១។ ចំណែកអ្នកមិនទទួលយក នឹងធ្វើការចាប់ឆ្នោតពេលក្រោយទៀត។
វីអូឌី មិនអាចសុំការបញ្ជាក់បន្ថែមពីអភិបាលរង និងជាអ្នកនាំពាក្យសាលាខេត្តកោះកុង លោក សុខ សុទ្ធី បានទេ នៅថ្ងៃពុធនេះ។
ប៉ុន្តែកាលពីថ្ងៃទី២៤ ខែកញ្ញា ឆ្នាំ២០២១ អ្នកនាំពាក្យរូបនេះបានដឹកនាំមន្ត្រីចុះពិនិត្យទីតាំងដីទំហំ២ ៥០០ហិកតា ស្ថិតនៅចន្លោះទីតាំងដីក្រុមហ៊ុន ញូញៀន និងតំបន់សេដ្ឋកិច្ចពិសេស (អតីតដីក្រុមហ៊ុនឋានសួគ៌) ស្រុកបទុមសាគរ ខេត្តកោះកុង ដើម្បីឈូសឆាយធ្វើជាដីឡូត៍ដោះស្រាយជូនពលរដ្ឋ ដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន។ នេះបើតាមការចុះផ្សាយរបស់រដ្ឋបាលខេត្តកោះកុង។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ការដោះស្រាយនេះ អាជ្ញាធរបានកំណត់ទៅលើអាទិភាពចំនួន៣ ដោយអាទិភាពទី១ ទទួលបាន៣ហិកតាកន្លះ និងលុយជាង៩ ០០០ដុល្លារ, ទី២ ទទួលបាន២ហិកតា និងទី៣ អ្នកដែលទទួលបានសំណងហើយ គឺទទួលបានដី១ហិកតា។
មន្ត្រីសិទ្ធិមនុស្សរូបនេះបន្តថា ការកំណត់លក្ខខណ្ឌឱ្យពលរដ្ឋទទួលបានសំណងដូចៗគ្នាបែបនេះ ខណៈពលរដ្ឋខ្លះមានដីក្នុងទំហំដ៏ច្រើននោះ គឺមិនមានតម្លាភាពឡើយ ហើយថា ពលរដ្ឋភាគច្រើន នឹងមិនទទួលយកការដោះស្រាយបែបនេះឡើយ។ លោកបានស្នើដល់អាជ្ញាធរពាក់ព័ន្ធពិចារណាក្នុងការដោះស្រាយជូនពលរដ្ឋឡើងវិញ ដោយជួបពិភាក្សាជាមួយក្រុមហ៊ុននិងប្រជាពលរដ្ឋធ្វើការដោះស្រាយទៅតាមទំហំដីជាក់ស្តែងរបស់ប្រជាពលរដ្ឋនីមួយៗ។
លោកបន្ថែមថា៖ «បើសិនជានៅតែកំណត់ការដោះស្រាយអ្នកនៅក្នុងមូលដ្ឋាន អ្នកនៅក្រៅមូលដ្ឋាន ការដោះស្រាយហ្នឹងមិនអាចបញ្ចប់ទេ។ ការលើកឡើងថា ពួកគាត់រស់នៅលើដីឧទ្យាន រស់នៅខុសភូមិ ខុសឃុំ ខុសស្រុក ការលើកហេតុផលទាំងនេះហើយដែលធ្វើឱ្យការដោះស្រាយជម្លោះដីធ្លីរវាងប្រជាពលរដ្ឋនិងក្រុមហ៊ុនមិនបានបញ្ចប់ជាស្ថាពរ ពីព្រោះថា កម្មសិទ្ធិឯកជនត្រូវបានរដ្ឋធានា ហើយបើកម្មសិទ្ធិឯកជននោះផ្តល់ទៅឱ្យឯកជនវិនិយោគ ពលរដ្ឋត្រូវតែទទួលបានសំណងនៃការដោះស្រាយហ្នឹងឱ្យសមរម្យទៅតាមតម្លៃទីផ្សារដីជាក់ស្តែង ទៅតាមគ្រួសារនីមួយៗ។ យើងមិនអាចកំណត់បែបនេះបានទេ»។
កាលពីឆ្នាំ២០០៨ រដ្ឋាភិបាលបានសម្រេចផ្តល់ដីសម្បទានសេដ្ឋកិច្ចទំហំ៣៦ ០០០ហិកតា ស្ថិតនៅក្នុងស្រុកបទុមសាគរ និងស្រុកគិរីសាគរ ខេត្តកោះកុង ទៅដល់ក្រុមហ៊ុនចិន Union Development Group ដើម្បីធ្វើការអភិវឌ្ឍពាណិជ្ជកម្មនិងរមណីយដ្ឋានទេសចរណ៍។
របាយការណ៍និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ រកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិននេះ បានធ្វើឱ្យប្រជាពលរដ្ឋចំនួន១ ១៤៣គ្រួសារត្រូវបង្ខំឱ្យបោះបង់ចោលដីធ្លីប្រមាណជាង១ម៉ឺនហិកតា និងផ្ទះ១ ៥០០ខ្នងត្រូវបង្ខំឱ្យរុះរើនិងឈូសឆាយ៕
