រដ្ឋាភិបាលជួលទីតាំង៤កន្លែងក្នុងតំបន់ការពារ ស្ថិតនៅស្រុកថ្មបាំង ខេត្តកោះកុង ទៅឱ្យក្រុមហ៊ុនឯកជនមួយអភិវឌ្ឍជាតំបន់ទេសចរណ៍ខ្នាតតូច។
រដ្ឋបាលខេត្តកោះកុង បានឱ្យដឹងថា កាលពីថ្ងៃទី១ ខែតុលា ឆ្នាំ២០២១ អភិបាលរងខេត្តកោះកុង លោក អ៊ុក ភ័ក្រ្តា និងរដ្ឋលេខាធិការក្រសួងបរិស្ថាន លោក ស្រ៊ុន ដារិទ្ធិ បានចុះពិនិត្យមើលទីតាំងស្នើសុំវិនិយោគគម្រោងអភិវឌ្ឍន៍ទេសចរណ៍ធម្មជាតិខ្នាតតូចចំនួន៤គម្រោង ដែលមានទំហំដីក្រោម១០ហិកតា ស្ថិតក្នុងភូមិសាស្ត្រស្រុកថ្មបាំង នៃខេត្តកោះកុង។
អភិបាលរងខេត្តកោះកុង លោក អ៊ុក ភ័ក្ត្រា ប្រាប់ វីអូឌី នៅថ្ងៃសុក្រនេះថា ក្រុមហ៊ុនឯកជនមួយ បានសុំជួលដីពីរដ្ឋក្រោម១០ហិកតា ដើម្បីអភិវឌ្ឍធ្វើតំបន់ទេសចរណ៍ធម្មជាតិចំនួន៤គម្រោង។ លោកថា ពាក់ព័ន្ធការស្នើសុំនេះ រដ្ឋបាលខេត្តនិងមន្ត្រីក្រសួងបរិស្ថានបានធ្វើកំណត់ហេតុដាក់ទៅអភិបាលខេត្តនិងមន្ត្រីក្រសួងបរិស្ថានរួចហើយ នៅចាំតែការសម្រេចប៉ុណ្ណោះ។
លោកបន្ថែមថា៖ «មន្ត្រីជំនាញយើងបានពិនិត្យរួចហើយ គម្រោងអភិវឌ្ឍន៍ វាអត់មានប៉ះពាល់បរិស្ថានទេ បើប៉ះពាល់បរិស្ថាន ក៏យើងមិនអនុញ្ញាតដែរ។ បើគម្រោងហ្នឹងអត់ប៉ះពាល់បរិស្ថានទេ អ៊ីចឹងគម្រោងនេះវាទៅមុខហើយ»។
អភិបាលរងខេត្តរូបនេះបន្ថែមថា ក្រោមគម្រោងអភិវឌ្ឍន៍នេះ លោកបានស្នើដល់ម្ចាស់គម្រោងសិក្សាឱ្យបានច្បាស់លាស់ ត្រូវកាត់បន្ថយជាអតិបរមាលើធនធានធម្មជាតិនិងជីវចម្រុះ គិតគូរលើការលើកកម្ពស់ជីវភាពប្រជាពលរដ្ឋ និងអនុញ្ញាតឱ្យធ្វើការឈូសឆាយតាមគោលការណ៍តែ៣០ភាគរយ នៃទំហំដែលបានអនុញ្ញាតប៉ុណ្ណោះ។
កាលពីខែកញ្ញា ឆ្នាំ២០២១ រដ្ឋបាលខេត្តកោះកុង និងមន្ត្រីជាន់ខ្ពស់ក្រសួងបរិស្ថាន ក៏បានចុះពិនិត្យមើលទីតាំងស្នើសុំជួលដីរដ្ឋទំហំជាង៣៦ហិកតា ក្នុងតំបន់ការពាររបស់ក្រសួងបរិស្ថាន ស្ថិតនៅឃុំជ្រោយប្រស់ ស្រុកកោះកុង ទៅឱ្យក្រុមហ៊ុនឯកមួយដើម្បីវិនិយោគវារីវប្បកម្ម បង្កាត់ពូជត្រី និងចិញ្ចឹមក្ដាមសមុទ្រ រយៈពេល១៥ឆ្នាំ។
ពាក់ព័ន្ធករណីនេះ មន្ត្រីសង្គមស៊ីវិលប្រចាំខេត្តកោះកុង បានសាទរប្រសិនជាការអភិវឌ្ឍនោះផ្តល់ផលប្រយោជន៍ដល់ប្រជាពលរដ្ឋ ប៉ុន្តែពួកគេក៏បារម្ភពីផលប៉ះពាល់បរិស្ថានផងដែរ ប្រសិនបើគម្រោងនោះអាជ្ញាធរមិនបានសិក្សាឱ្យបានច្បាស់លាស់និងតាមដាននូវការអនុវត្តគម្រោងឱ្យបានម៉ត់ចត់ទេនោះ៕