រដ្ឋមន្ត្រីក្រសួងមហាផ្ទៃ លោក ស ខេង បានក្រើនរំឭកមន្ត្រីឱ្យយកចិត្តទុកដាក់ដោះស្រាយវិវាទនានាក្រៅប្រព័ន្ធតុលាការ ដែលថា ការនេះបានទុកផ្លូវឱ្យពលរដ្ឋទទទួលបានយុត្តិធម៌។
ក្នុងពិធីប្រកាសចូលកាន់តំណែងអភិបាលខេត្តបាត់ដំបង នាថ្ងៃចន្ទនេះ លោក ស ខេង បានថ្លែងថា ការដោះស្រាយបញ្ហាក្រៅប្រព័ន្ធតុលាការជាយន្តការមួយត្រូវយកចិត្តទុកដាក់ ព្រោះវាបានទុកផ្លូវឱ្យពលរដ្ឋទទួលបានយុត្តិធម៌។
លោកបានគូសបញ្ជាក់ថា កន្លងទៅ លោកបានបង្កើតហ្វេសប៊ុកនិងក្រុមការងារសម្រាប់ទទួលយកមតិយោបល់ រួមទាំងសំណូមពរនានាយកមកដោះស្រាយ ទទួលបានផលល្អ ដែលលោកថា មកដល់ពេលនេះមានជិត១ ០០០ករណីហើយត្រូវបានដោះស្រាយ។
លោកថា៖ «មិនមែនមានន័យថា យើងធ្វើអ៊ីចឹងមិនទុកចិត្តរដ្ឋបាលនៅនឹងកន្លែងទេ មិនមែនមានន័យអ៊ីចឹងទេ ក៏ប៉ុន្តែជាការបង្កលក្ខណៈឱ្យមានជម្រើស។ ជួនកាលដោះស្រាយនៅកន្លែងណាមួយនោះមិនបាន ឬវាមិនយុត្តិធម៌ យើងទុកផ្លូវឱ្យគាត់ បើដោះរបៀបហ្នឹងមិនបានទេ មានផ្លូវមួយទៀត។ ខ្ញុំគិតថា យើងត្រូវហ៊ានបើកចំហ ដើម្បីទទួលយកមតិយោបល់របស់ប្រជាពលរដ្ឋ»។
ក្នុងពិធីនោះដែរ អតីតអភិបាលខេត្តកំពង់ធំ ដែលត្រូវផ្លាស់មកកាន់មុខតំណែងជាអភិបាលខេត្តបាត់ដំបង លោក សុខ លូ បានប្តេជ្ញាចិត្តថា នឹងអនុវត្តតាមការចង្អុលបង្ហាញនេះ ដើម្បីធានាកម្មសិទ្ធិស្របច្បាប់ជូនប្រជាពលរដ្ឋនៅមូលដ្ឋានរបស់ខ្លួន។
លោកថា៖ «ដើម្បីឆ្លើយតបឱ្យស័ក្តិសមពីជំនឿទុកចិត្តពីប្រមុខរដ្ឋាភិបាលនិងក្រសួងមហាផ្ទៃ ខ្ញុំសូមប្ដេជ្ញាដូចតទៅ […] ជំរុញសេវាសាធារណៈ តាមរយៈយន្តការច្រកចេញចូលតែមួយ […] បន្តខិតខំដោះស្រាយទំនាស់ដីធ្លីនិងទំនាស់ផ្សេងៗទៀតក្រៅប្រព័ន្ធតុលាការ ដើម្បីការពារប្រយោជន៍ស្របច្បាប់របស់ប្រជាពលរដ្ឋ»។
អ្នកសម្របសម្រួលគម្រោងធុរកិច្ចនៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត យល់ថា សារនយោបាយនេះជាជម្រើសល្អមួយ ខណៈអ្នកតវ៉ាដីធ្លីខ្លះត្រូវបានគេចាប់ដាក់ពន្ធនាគារ ក្រោមបទចោទប្រកាន់ផ្សេងៗ ក្រោយពីពួកគេតវ៉ាប្រឆាំងនឹងការបណ្ដេញចេញទាំងបង្ខំ នៅពេលគម្រោងអភិវឌ្ឍន៍ទៅដល់។ ប៉ុន្តែលោកថា សារនយោបាយនេះនឹងមិនអាចធានាផលប្រយោជន៍ពលរដ្ឋទេ បើខ្វះប្រព័ន្ធតាមដានការអនុវត្តនោះ។
លោក សុផាត លើកជាឧទាហរណ៍ថា ករណីចាប់ខ្លួនអ្នកតវ៉ាដីធ្លី៣០នាក់ ពាក់ព័ន្ធគម្រោងកសាងព្រលានយន្តហោះថ្មីនៅខេត្តកណ្ដាលជាដើម ដែលករណីនេះ លោកថា ពលរដ្ឋជាម្ចាស់កម្មសិទ្ធិត្រូវបានចាប់ឃុំខ្លួនមួយរយៈ ក្រោយពីពួកគេមិនព្រមទទួលយកសំណងដែលតម្រូវដោយអាជ្ញាធរនិងក្រុមហ៊ុន OCIC។
លោកថា៖ «ដូចយើងឃើញស្រាប់ហើយ បញ្ហាព្រលានយន្តហោះថ្មីនៅខេត្តកណ្ដាលអ៊ីចឹង អាជ្ញាធរភាគច្រើនធ្វើការដើម្បីដាក់សម្ពាធពលរដ្ឋឱ្យប្រគល់ដីឱ្យទៅក្រុមហ៊ុន ប្រគល់ដីឱ្យឈ្មួញដែលមានអំណាចមានទ្រព្យសម្បត្តិអីវិញ»៕