ប្រជាពលរដ្ឋ៣០នាក់ តំណាងឱ្យ៣០គ្រួសារ ដែលកំពុងមានជម្លោះដីធ្លីជាមួយក្រុមហ៊ុនចិន ញូញៀន (Union Development Group ឬ UDG) ស្ថិតនៅស្រុកបទុមសាគរ និងស្រុកគិរីសាគរ ខេត្តកោះកុង រកកិច្ចអន្តរាគមន៍ពីរដ្ឋមន្ត្រីក្រសួងការពារជាតិ លោក ទៀ បាញ់ ឱ្យជួយដោះស្រាយវិវាទដីធ្លីរបស់ពួកគេ។
កាលពីថ្ងៃទី២៨ ខែកញ្ញា ឆ្នាំ២០២១ រដ្ឋបាលខេត្តកោះកុង បានប្រកាសអំពីដំណើរការដោះស្រាយវិវាទដីធ្លីជូនពលរដ្ឋប្រមាណ១ ៣៣៣គ្រួសារដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន និងបានព្រមានពីការមិនទទួលខុសត្រូវលើការបាត់បង់ផលប្រយោជន៍ ចំពោះពលរដ្ឋណាដែលមិនព្រមមកចាប់ឆ្នោះយកដីឡូត៍តាមការកំណត់របស់អាជ្ញាធរផងដែរ។
ក្នុងញត្តិដាក់ទៅរដ្ឋមន្ត្រីក្រសួងការពារជាតិ តាមរយៈរដ្ឋបាលខេត្តកោះកុង នៅថ្ងៃទី២៦ ខែតុលា ឆ្នាំ២០២១នេះ ក្រុមពលរដ្ឋបានលើកឡើងថា ការចុះដោះស្រាយផលប៉ះពាល់ដីធ្លីរបស់រដ្ឋបាលខេត្តកោះកុង និងអាជ្ញាធរជាតិដោះស្រាយទំនាស់ដីធ្លី ពុំមានតម្លាភាពនិងយុត្តិធម៌សម្រាប់ពួកគាត់ឡើយ ខណៈពួកគាត់ប៉ះពាល់ដីចម្ការក្នុងចំនួនច្រើន ដែលដីបានកាន់កាប់ស្របទៅតាមច្បាប់ត្រឹមត្រូវ និងអាស្រ័យផលជាក់ស្ដែង។
អ្នកស្រី សាំង ពុយ ជាប្រជាពលរដ្ឋរស់នៅឃុំកោះស្ដេច ស្រុកគិរីសាគរ និងជាពលរដ្ឋប្រភេទទី២ ដែលបានទៅប្រមូលផ្ដុំដាក់ញត្តិនៅមុខរដ្ឋបាលខេត្តកោះកុង នៅព្រឹកថ្ងៃអង្គារនេះ ជាមួយពលរដ្ឋប្រមាណ៣០នាក់ទៀត បាននិយាយថា ការដោះស្រាយរបៀបនេះ អ្នកស្រីមិនអាចទទួលបានយកបានឡើយ ដោយសារគ្រួសារអ្នកស្រីបានប៉ះពាល់ដីចម្ការទំហំជាង២០ហិកតា ប៉ុន្តែការផ្ដល់សំណងមកវិញត្រឹមតែដី២ហិកតានោះ។
អ្នកស្រីបន្តថា ពលរដ្ឋទាមទារការដោះស្រាយតាមទំហំដីជាក់ស្ដែង និងកាត់ឆ្វៀលដីលំនៅឋានរបស់ពួកគាត់ចេញពីគម្រោងអភិវឌ្ឍន៍។
អ្នកស្រីបន្ថែមថា៖ «ពួកយើងមិនអាចទទួលយកបាន ដោយសារពលរដ្ឋប្រភេទទី២ គោលនយោបាយបានដី២ហិកតា ប៉ុន្តែដីពួកយើងខ្លះមានចំនួនច្រើន ហើយការដោះដូរដីទៅកន្លែងថ្មី ពួកគាត់មិនអាចទៅរស់នៅបាន ដោយគ្មានមុខរបរ។ ឥលូវយើងមកដាក់ញត្តិសុំឱ្យសម្ដេច ទៀ បាញ់ និងក្រុមការងារដោះស្រាយនេះ ពិចារណាឡើងវិញ ចំពោះពលរដ្ឋដែលពួកគាត់មិនអាចទទួលយការដោះស្រាយនេះបាន។ ពួកគាត់ចង់ឱ្យដោះស្រាយតាមទំហំដីជាក់ស្ដែង មានដំណាំផ្សេងៗ និងកាត់ឆ្វៀលដីលំនៅឋានចេញពីគម្រោងអភិវឌ្ឍន៍នេះ»។
ពលរដ្ឋម្នាក់ទៀត អ្នកស្រី ទិត្យ តេន រស់នៅឃុំព្រែកខ្សាច់ និងជាពលរដ្ឋប្រភេទទី២ដែរនោះ អះអាងថា គ្រួសារអ្នកស្រីប៉ះពាល់ដីចំនួន២កន្លែង ដោយដីលំនៅឋាន ៣០អា នៅឃុំព្រែកខ្សាច់ និងដីចម្ការ ៦៩ហិកតា នៅឃុំភ្ញីមាស ប៉ុន្តែការផ្ដល់សំណងជាគោលនយោបាយត្រលប់មកវិញ បានដីត្រឹមតែ ២ហិកតា ប៉ុណ្ណោះ។
ពលរដ្ឋរូបនេះបានបង្ហាញការខកចិត្តចំពោះអាជ្ញាធរពាក់ព័ន្ធដែលចុះដោះស្រាយ ដែលមានការបែងចែកពលរដ្ឋជាប្រភេទទី១ ទី២ និងទី៣ ដោយមិនដោះស្រាយតាមទំហំដីជាក់ស្ដែងជូនពលរដ្ឋ។
អ្នកស្រីបន្ថែមថា៖ «ខ្ញុំមិនព្រមទទួលការដោះស្រាយនេះ ដោយសារខ្ញុំមានដីច្រើន ដោះដូរមិនមានតម្លាភាព មិនយុត្តិធម៌ជាមួយពួកខ្ញុំ។ អាជ្ញាធរនិយាយថា ពួកខ្ញុំនៅក្រៅឃុំ ប៉ុន្តែពេលគាត់ដោះនៅក្រៅឃុំ គាត់មកយកក្នុងភូមិរបស់ពួកខ្ញុំដែរ។ គាត់អត់ប្រកាន់ថាក្រៅថាក្នុងណា! អ៊ីចឹងគាត់ដូចជាយកប្រៀបលើប្រជាពលរដ្ឋខ្លាំងពេក អ៊ីចឹងខ្ញុំមិនអាចទទួលយកបាន។ ខ្ញុំមានដីជាង៦០ហិកតា មកដោះដូរយកដី២ហិកតា តើវាយុត្តិធម៌សម្រាប់ខ្ញុំអត់?»
បើតាមរដ្ឋបាលខេត្តកោះកុង យុទ្ធនាការដោះស្រាយដីធ្លីជូនពលរដ្ឋដែលកំពុងរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុន ញូញៀន នេះ អាជ្ញាធរបានបែងចែកពលរដ្ឋជា៣ប្រភេទ ដែលផ្ដល់សំណងជាគោលនយោបាយកំណត់ដោយរដ្ឋាភិបាល។
រដ្ឋបាលខេត្តកោះកុង បញ្ជាក់ថា ពលរដ្ឋប្រភេទទី១ មាន២៤៧គ្រួសារ ជាពលរដ្ឋរស់នៅក្នុងទីតាំងវិនិយោគរបស់ក្រុមហ៊ុន ដែលត្រូវទទួលបានសំណងដីលំនៅឋានទំហំ០,៥ហិកតា ដីចម្ការទំហំ៣ហិកតា និងថវិកា៩ ០០០ដុល្លារ ខណៈពលរដ្ឋប្រភេទទី២ មាន២៥៥គ្រួសារ ជាអ្នករស់នៅខុសមូលដ្ឋាន ឬខុសភូមិឃុំ ត្រូវទទួលបានសំណងដី២ហិកតា បើទោះបីពលរដ្ឋទាំងនោះមានទំហំដីប៉ះពាល់ប៉ុនណាក៏ដោយ និងពលរដ្ឋប្រភេទទី៣ មាន៨៣១គ្រួសារ ជាអ្នកស្នើសុំគោលនយោបាយបន្ថែម ដែលត្រូវទទួលបានសំណង១ហិកតា។
វីអូឌី មិនអាចសុំការឆ្លើយតបពីអភិបាលខេត្តកោះកុង លោកស្រី មិថុនា ភូថង និងអ្នកនាំពាក្យរដ្ឋបាលខេត្តកោះកុង លោក សុខ សុទ្ធី បានទេ នៅថ្ងៃអង្គារនេះ។
ប៉ុន្តែលោក សុខ សុទ្ធី ធ្លាប់ប្រាប់ វីអូឌី ថាពលរដ្ឋណាមិនពេញចិត្តនិងមិនទទួលយកសំណងនៃការដោះស្រាយនេះ វាជារឿងរបស់ពួកគេ ពីព្រោះការដោះស្រាយនេះជាគោលនយោបាយរបស់រដ្ឋាភិបាល។
បើតាមពលរដ្ឋ រដ្ឋបាលខេត្តកោះកុងបានទទួលយកញត្តិរបស់ពួកគេ និងបានសន្យាថានឹងបញ្ជូនញត្តិនោះទៅឱ្យអភិបាលខេត្ត និងរដ្ឋមន្ត្រីក្រសួងការពារជាតិ ដើម្បីពិនិត្យនិងពិចារណាលើការតវ៉ានេះ។ ពលរដ្ឋបន្តថា ប្រសិនបើពុំមានការឆ្លើយតបនិងគ្មានដំណោះស្រាយទេ ពួកគេនឹងនាំគ្នាយកញត្តិទៅដាក់ដល់ក្រសួងការពារជាតិទៀត។
ពាក់ព័ន្ធករណីនេះ មន្រ្តីសម្របសម្រួលអង្គការការពារសិទ្ធិមនុស្សលីកាដូ ប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា បើអាជ្ញាធរពាក់ព័ន្ធដោះស្រាយមិនមានតម្លាភាពនិងមិនឈរលើគោលការណ៍យុត្តិធម៌ទេ នឹងធ្វើឱ្យប្រជាពលរដ្ឋមិនអាចទទួលយកបាន ហើយពួកគាត់នឹងផ្ទុះការតវ៉ា ដែលធ្វើឱ្យការដោះស្រាយនោះមិនអាចបញ្ចប់បានឡើយ។ លោកបានស្នើដល់អាជ្ញាធរពាក់ព័ន្ធពិចារណាឡើងវិញ ដោយជួបពិភាក្សាជាមួយពលរដ្ឋណាដែលមិនព្រមទទួលសំណងនោះ ដើម្បីរកដំណោះស្រាយមួយដែលអាចទទួលបានទាំងអស់គ្នា។
លោកបន្ថែមថា៖ «ដើម្បីដោះស្រាយឱ្យបានជោគជ័យ ទាល់តែការដោះស្រាយនោះឈរលើគោលការណ៍យុត្តិធម៌ ហើយប្រជាពលរដ្ឋត្រេកអរក្នុងការទទួលយកសំណោះស្រាយ។ វាមិនមែនជាការចាប់បង្ខំឱ្យប្រជាពលរដ្ឋទទួលយកដំណោះស្រាយទេ។ បើមិនទទួល គឺលែងទទួលខុសត្រូវ អ៊ីចឹងបង្ហាញថា អាជ្ញាធរគ្មានឆន្ទៈក្នុងការដោះស្រាយជូនប្រជាពលរដ្ឋទេ។ ហើយការធ្វើបែបនេះ បង្ហាញថា អាជ្ញាធរគិតប្រយោជន៍ក្រុមហ៊ុនជាជាងប្រយោជន៍ប្រជាពលរដ្ឋ ហើយដំណោះស្រាយបែបនេះនឹងធ្វើឱ្យប្រជាពលរដ្ឋកាន់តែរងទុក្ខនិងកាន់វេទនា»។
រដ្ឋបាលខេត្តកោះកុង និងអាជ្ញាធរជាតិដោះស្រាយទំនាស់ដីធ្លី ធ្លាប់បានព្រមានពីការមិនទទួលខុសត្រូវលើការបាត់បង់ផលប្រយោជន៍ ចំពោះពលរដ្ឋណាដែលមិនព្រមមកចាប់ឆ្នោះយកដីឡូត៍តាមការកំណត់របស់អាជ្ញាធរផងដែរ៕
