មន្ត្រីក្រុមការងារចំពោះកិច្ចរបស់រដ្ឋាភិបាលលើកឡើងថា ជនភៀសខ្លួនអាហ្វហ្គានីស្ថាន ជាបុគ្គលិកអង្គការមូលនិធិអាស៊ី និងក្រុមគ្រួសារ ដែលរដ្ឋាភិបាលអនុញ្ញាតឱ្យមកស្នាក់នៅបណ្ដោះអាសន្នក្នុងប្រទេសកម្ពុជា បានមកដល់ចំនួន១៥នាក់ហើយ កាលពីយប់មិញនេះ។
អនុប្រធានលេខារបស់ក្រុមការងារចំពោះកិច្ច ដើម្បីទទួលជនភៀសខ្លួនអាហ្វហ្គានីស្ថាន លោក ជុង រ៉ាវុធ ថ្លែងប្រាប់វីអូឌីនៅថ្ងៃទី ១៧ខែវិច្ឆិកានេះថា ជនភៀសខ្លួនអាហ្វហ្គានីស្ថានដំបូងដែលជាបុគ្គលិកអង្គការមូលនិធិអាស៊ី និងក្រុមគ្រួសារចំនួន ១៥នាក់ បានមកដល់កម្ពុជាហើយ។
លោក ជុង រ៉ាវុធ ថា៖ «[ជនភៀសខ្លួនអាហ្វហ្គានីស្ថានចំនួន ១៥នាក់] គាត់មក [ដល់កម្ពុជា] យប់មិញ។ គាត់មក ព្រោះថាគោលការណ៍រដ្ឋាភិបាលយើងគឺទទួលក្នុងនាមមនុស្សធម៌ ទទួលពួកគាត់មកស្នាក់នៅ [គឺ] ឈប់ចតបណ្តោះអាសន្ន។ [ពួកគាត់ និងគ្រួសារ សរុបចំនួនប៉ុន្មាននាក់ដែលនឹងមកកម្ពុជា] យើងអត់ទាន់មានតួលេខច្បាស់លាស់ទេ ព្រោះការងារហ្នឹងវាដូរពីមួយផ្នែកទៅមួយផ្នែកទៅតាមការស្នើសុំ»។
លោកថា ក្រុមការងារចំពោះកិច្ចកំពុងពិចារណាពីទីតាំងសម្រាប់ឱ្យពលរដ្ឋអាហ្គានីស្ថានទាំងនោះស្នាក់នៅ ខណៈបច្ចុប្បន្នពួកគាត់ទាំងនោះកំពុងស្នាក់នៅផ្ទះជួលដែលអាជ្ញាធរខ្មែររៀបចំឱ្យស្នាក់បណ្តោះអាសន្ន រីឯព័ត៌មានលម្អិតផ្សេងទៀតលោកមិនទាន់អាចជម្រាបជូនបាននៅឡើយ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា រដ្ឋាភិបាលកម្ពុជាបានប្រកាសរួចហើយ ក្នុងការទទួលយកជនភៀសខ្លួនអាហ្វហ្គានីស្ថានឱ្យស្នាក់នៅបណ្តោះអាសន្ននៅកម្ពុជាដើម្បីរង់ចាំចេញទៅប្រទេសទី៣។
លោក អំ សំអាត បន្តថា ការប្រកាសទទួលយកជនភៀសខ្លួនអាហ្វហ្គានីស្ថាននេះ រដ្ឋាភិបាលចង់បង្ហាញថាកម្ពុជាមានមនុស្សធម៌ សម្រាប់ទទួលយកពួកគេ និងបង្ហាញថាជនទាំងនោះរងការធ្វើទុក្ខបុកម្នេញ ការរំលោភសិទ្ធិមនុស្ស ដូច្នេះការទទួលយកពួកគេ គឺដើម្បីបង្ហាញពីការលើកកម្ពស់សិទ្ធិមនុស្សផងដែរ។
លោក អំ សំអាត និយាយថា៖ «ខ្ញុំឃើញថារាជរដ្ឋាភិបាលលោកកំណត់ចំនួនមនុស្សហើយ ថាដូចជាទទួលចំនួនប៉ុន្មានរយនាក់អ៊ីចឹងណា។ ប៉ុន្តែប្រសិនជាលើសវាអាស្រ័យទៅលើការចរចា ប៉ុន្តែអាហ្នឹងហើយដែលជាបន្ទុករបស់រដ្ឋាភិបាលសម្រាប់រកកន្លែងឱ្យគេស្នាក់នៅ»។
រដ្ឋាភិបាលកម្ពុជាបានសម្រេចបង្កើតក្រុមការងារចំពោះកិច្ច ដើម្បីទទួលយកជនភៀសខ្លួនពលរដ្ឋអាហ្វហ្គានីស្ថានដែលជាបុគ្គលិកអង្គការមូលនិធិអាស៊ី និងក្រុមគ្រួសារ មកស្នាក់នៅបណ្ដោះអាសន្នក្នុងប្រទេសកម្ពុជា។
យោងតាមសេចក្ដីសម្រេចរបស់រដ្ឋាភិបាលកម្ពុជា កាលពីថ្ងៃទី១៥ ខែវិច្ឆិកា ឆ្នាំ២០២១នេះ បានឱ្យដឹងថា ក្រុមការងារនេះមានលោក សុខ ផល រដ្ឋលេខាធិការក្រសួងមហាផ្ទៃ ជាប្រធាន។ ចំណែកអគ្គនាយកនៃអគ្គនាយកដ្ឋានអន្តោប្រវេសន៍ លោក គៀត ច័ន្ទថារិទ្ធ ជាអនុប្រធានអចិន្ត្រៃយ៍ អមដោយអនុប្រធានពីររូប និងសមាជិកចំនួន៩រូប។
ក្រុមការងារនេះ មានតួនាទីនិងភារកិច្ចពិនិត្យនិងសម្របសម្រួលផ្ដល់ការអនុញ្ញាតឱ្យពលរដ្ឋអាហ្វហ្គានីស្ថានដែលជាបុគ្គលិកអង្គការមូលនិធិអាស៊ី និងក្រុមគ្រួសារ មកស្នាក់នៅបណ្ដោះអាសន្នក្នុងប្រទេសកម្ពុជា ស្របតាមច្បាប់ស្ដីពីអន្តោប្រវេសន៍ និងគោលការណ៍សម្រេចរបស់រដ្ឋាភិបាលកម្ពុជា ព្រមទាំងមានតួនាទីចាំបាច់មួយចំនួនទៀត។
កាលពីថ្ងៃទី២៨ ខែសីហា ឆ្នាំ២០២១ លោកនាយករដ្ឋមន្ត្រី ហ៊ុន សែន បានប្រកាសយល់ព្រមទទួលយកជនភៀសខ្លួនអាហ្វហ្គានីស្ថានចំនួន៣០០នាក់ ដែលជាបុគ្គលិកអង្គការមូលនិធិអាស៊ី និងក្រុមគ្រួសារ ឱ្យមកស្នាក់នៅក្នុងប្រទេសកម្ពុជាជាបណ្ដោះអាសន្ន មុននឹងសម្រេចបញ្ជូនទៅកាន់ប្រទេសទី៣។
ការសម្រេចនេះ ធ្វើឡើងតាមសំណើរបស់អង្គការមូលនិធិអាស៊ី បន្ទាប់ពីប្រទេសអាហ្វហ្គានីស្ថានបានធ្លាក់ក្នុងកណ្ដាប់ដៃរបស់ក្រុមតាលីបង់ ដែលបានធ្វើរដ្ឋប្រហារផ្តួលរំលំរដ្ឋាភិបាលស្របច្បាប់ ភ្លាមៗក្រោយពីសហរដ្ឋអាមេរិកសម្រេចដកកងទ័ពរបស់ខ្លួនចេញពីប្រទេសមួយនេះ កាលពីខែសីហា ឆ្នាំ២០២១៕