ពលរដ្ឋជាច្រើនគ្រួសារ រស់នៅឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល បានផ្អាកការតវ៉ានៅមុខសាលាឃុំ ក្រោយពីអាជ្ញាធរស្រុកសន្យាជួបចរចារកដំណោះស្រាយរឿងសំណងផលប៉ះពាល់ដីធ្លី ក្រោមគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មីរបស់ក្រុមហ៊ុន OCIC។
អ្នកភូមិប្រមាណ២០០នាក់ដែលអះអាងថាជាតំណាងឱ្យ៤១៤គ្រួសារ នៅឃុំអំពៅព្រៃ បាននាំគ្នាតវ៉ាមុខសាលាឃុំអំពៅព្រៃ រយៈពេល៣ថ្ងៃមកហើយ គឺនៅថ្ងៃទី៤ ថ្ងៃទី៦ និងថ្ងៃទី៧ ខែធ្នូនេះ ដើម្បីទាមទារឱ្យអាជ្ញាធរឃុំបំភ្លឺជុំវិញដំណោះស្រាយផលប៉ះពាល់ដីធ្លី និងបានព្រមានធ្វើបាតុកម្មមុខសាលាឃុំរាល់ថ្ងៃ ប្រសិនបើពុំមានដំណោះស្រាយ។
លោក ភោគ ផាន់នី ដែលអះអាងថាជាតំណាងពលរដ្ឋ ប្រាប់ វីអូឌី ថាក្រុមពលរដ្ឋបានផ្អាកការតវ៉ាហើយ ក្រោយពីអភិបាលស្រុកកណ្ដាលស្ទឹង លោក អ៊ូច សាវឿន សន្យាជួបចរចារកដំណោះស្រាយជាមួយតំណាងពលរដ្ឋនៅដើមសប្ដាហ៍ក្រោយ។
តំណាងពលរដ្ឋរូបនេះបន្តថា ប្រសិនជាការចរចានោះពុំបានលទ្ធផលដែលអាចទទួលយកបាន អ្នកភូមិនឹងនាំគ្នាតវ៉ាមុខសាលាឃុំបន្តទៀត រហូតដល់មានការដោះស្រាយសមរម្យសម្រាប់ពួកគេ។
ពលរដ្ឋរូបនេះអះអាងទៀតថា ពួកគេ៤១៥គ្រួសារនៅឃុំអំពៅព្រៃ និងមានដីទំហំសរុប៨៣ហិកតា បានរងផលប៉ះពាល់ដោយគម្រោងអភិវឌ្ឍន៍ព្រលានយន្តហោះថ្មីរបស់ក្រុមហ៊ុន OCIC តាំងពីឆ្នាំ២០១៨ រហូតមកដល់ពេលនេះ គឺពុំទាន់បានការដោះស្រាយសំណងនៅឡើយទេ ហើយពួកគេបានទាមទារសំណងជាគោលនយោបាយ ដោយក្នុង១ម៉ែត្រការ៉េ តម្លៃ៨ដុល្លារ។
យ៉ាងណា អភិបាលស្រុកកណ្ដាលស្ទឹង លោក អ៊ូច សាវឿន ប្រាប់ វីអូឌី កាលពីថ្ងៃទី៣ ខែធ្នូ ថានៅក្នុងឃុំអំពៅព្រៃ ពុំមានដីសហគមន៍ ឬដីចំណែកក្រុមសាមគ្គីទៀតទេ។ លោកថា ដីក្រុមសាមគ្គីនោះ ត្រូវអាជ្ញាធរវាស់វែងចែកជូនពលរដ្ឋជាឯកជនអស់ហើយតាំងពីឆ្នាំ១៩៩០ ហើយអាជ្ញាធរក៏ពុំមានការដោះស្រាយសំណងអ្វីជូនពួកគាត់ទៀតឡើយ។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ បានធ្វើឱ្យប៉ះពាល់ប្រជាពលរដ្ឋ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង១លានម៉ែត្រការ៉េ៕
