អ្នកនាំពាក្យស្ថានទូតអាមេរិកប្រចាំនៅកម្ពុជាថា សហរដ្ឋអាមេរិកនៅតែប្តេជ្ញាចិត្តគាំទ្រចំពោះប្រជាជនកម្ពុជា និងក្តីប្រាថ្នារបស់ពួកគេសម្រាប់ប្រទេសមួយដែលមានភាពរីកចម្រើនខាងប្រជាធិបតេយ្យ និងឯករាជ្យ។
ការលើកឡើងនេះ គឺបន្ទាប់ពីមានប្រតិកម្មរបស់លោកនាយករដ្ឋមន្ត្រី ហ៊ុន សែន កាលពីម្សិលមិញដោយបញ្ជាឱ្យយកអាវុធនិងសម្ភារៈយោធាអាមេរិកទៅរក្សាទុកក្នុងឃ្លាំង ឬយកទៅកម្ទេចចោល ក្រោយពីក្រសួងពាណិជ្ជកម្មអាមេរិកបានដាក់ទណ្ឌកម្មហាមលក់អាវុធនិងសម្ភារៈយោធាឱ្យកម្ពុជា ដោយសម្អាងពីបញ្ហាសិទ្ធិមនុស្ស អំពើពុករលួយ និងកំណើនឥទ្ធិពលយោធាចិននៅកម្ពុជា។
តែអ្នកនាំពាក្យស្ថានទូតអាមេរិកប្រចាំនៅកម្ពុជា លោក Chad Roedemeier បានប្រាប់វីអូឌីតាមប្រព័ន្ធសារអេឡិចត្រូនិចអ៊ីម៉ែលនៅល្ងាចថ្ងៃទី១០ ខែធ្នូ ម្សិលមិញនេះថា អាមេរិកនៅតែប្តេជ្ញាចិត្តចង់ឱ្យកម្ពុជាមានភាពរីកចម្រើនខាងប្រជាធិបតេយ្យ និងឯករាជ្យភាព។
លោក Chad Roedemeier បានឆ្លើយតបនឹងសារអ៊ីម៉ែលរបស់វីអូឌីយ៉ាងខ្លីដែលមានន័យជាភាសាខ្មែរថា៖ «សហរដ្ឋអាមេរិកនៅតែប្តេជ្ញាចិត្តគាំទ្រចំពោះប្រជាជនកម្ពុជា និងបំណងប្រាថ្នារបស់ពួកគេ ដែលចង់បានប្រទេសមួយមានភាពរីកចម្រើនខាងប្រជាធិបតេយ្យ និងឯករាជ្យបន្ថែមទៀត»។
លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញ បានបញ្ជាទៅអង្គភាពប្រដាប់អាវុធទាំងអស់ ឱ្យត្រួតពិនិត្យឡើងវិញជាបន្ទាន់ នូវអាវុធ និងសម្ភារៈយោធាដែលកម្ពុជាមានបច្ចុប្បន្ន ហើយត្រូវប្រមូលអាវុធ និងសម្ភារៈយោធាអាមេរិកទាំងអស់នោះ ទៅរក្សាទុកក្នុងឃ្លាំង ឬយកទៅកម្ទេចចោល ប្រសិនបើមាន។
លោកនាយករដ្ឋមន្ត្រី ហ៊ុន សែន បានលើកឡើងនៅក្នុងទំព័រហ្វេសប៊ុករបស់លោក កាលពីថ្ងៃសុក្រថា ការសម្រេចរបស់សហរដ្ឋអាមេរិក លើបម្រាមការលក់ដូរអាវុធ និងសម្ភារៈយោធាមកកម្ពុជា នាពេលនេះ បានឆ្លុះបញ្ចាំងពីភាពត្រឹមត្រូវនៃការសម្រេចចិត្តរបស់លោក កាលពីឆ្នាំ១៩៩៤ ដែលនៅពេលនោះ លោកបានសម្រេចចិត្តមិនធ្វើការផ្លាស់ប្តូរប្រព័ន្ធអាវុធកម្ពុជា ដែលមានពេលនោះ ទៅទិញប្រព័ន្ធអាវុធអាមេរិក។
ករណីនេះ លោកបានចេញបទបញ្ជាទៅដល់អង្គភាពប្រដាប់អាវុធទាំងអស់ ឱ្យត្រួតពិនិត្យអាវុធ និងសម្ភារៈយោធារបស់ខ្លួនឡើងវិញជាបន្ទាន់ ហើយប្រសិនបើមានអាវុធ និងសម្ភារៈយោធាអាមេរិក អង្គភាពទាំងនោះត្រូវយកទៅរក្សាទុកក្នុងឃ្លាំង ឬយកទៅកម្ទេចចោលតាមការជាក់ស្តែង។
លោកបានគូសបញ្ជាក់ថា៖ «ជាថ្មីម្តងទៀត ខ្ញុំសូមអរគុណសហរដ្ឋអាមេរិក ដែលបានជួយបញ្ជាក់ថា ការសម្រេចចិត្តរបស់ខ្ញុំ មិនយល់ព្រមទិញអាវុធពីអាមេរិក ពិតជាត្រឹមត្រូវសម្រាប់នយោបាយការពារជាតិរបស់កម្ពុជា ហើយវាក៏ជាសារព្រមានមួយប្រាប់ទៅខ្មែរ ដែលគ្រប់គ្រងរាជរដ្ឋាភិបាលជំនាន់ក្រោយ ឱ្យបានជ្រាបថា បើចង់មានឯករាជ្យភាពលើវិស័យការពារជាតិ សូមកុំប្រើប្រាស់អាវុធរបស់អាមេរិក»។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន បានកត់ចំណាំដែរថា អ្នកដែលធ្លាប់ប្រើប្រព័ន្ធអាវុធអាមេរិកជាច្រើន បានចាញ់សង្រ្គាម ដូចជា ក្នុងរបបសាធារណខ្មែររបស់ លន់ នល់ ដែលពេលនោះបានប្រើប្រព័ន្ធអាវុធអាមេរិក និងបាននាំចូលអាវុធជាច្រើនមកកម្ពុជា ហើយធ្វើឱ្យកម្ពុជាជាប់បំណុលខ្មៅនេះ រហូតមកដល់បច្ចុប្បន្ននេះ។ ថ្មីៗនេះទៀតសោត លោកថា អ្នកប្រើប្រព័ន្ធអាវុធអាមេរិក ក៏បានចាញ់សង្រ្គាមនៅអាហ្គានីស្ថានដែរ។
អ្នកស្រាវជ្រាវផ្នែកភូមិសាស្ត្រនយោបាយ លោក វណ្ណ ប៊ុនណា បានលើកឡើងថា ប្រតិកម្មរបស់លោកនាយករដ្ឋមន្ត្រី ហ៊ុន សែន ទៅកាន់សហរដ្ឋអាមេរិកនេះ គ្រាន់តែជាការរុញទូកបណ្តោយទឹកប៉ុណ្ណោះ។ លោកថា វាមិនបានផ្តល់ផលប្រយោជន៍ធំដុំដល់កម្ពុជានោះទេ។ ផ្ទុយទៅវិញ វាកាន់តែរុញឱ្យស្ថានការណ៍និងទំនាក់ទំនងការទូតរវាងកម្ពុជានិងអាមេរិកឱ្យកាន់តែធ្លាក់ចុះ ធ្ងន់ធ្ងរឡើង។
អ្នកស្រាវជ្រាវផ្នែកភូមិសាស្ត្រនយោបាយរូបនេះ បានផ្តល់យោបល់ថា អ្វីដែលកម្ពុជាគួរធ្វើនៅពេលនេះ គឺព្យាយាមអត់ធ្មត់ និងព្យាយាមធ្វើយ៉ាងណាឆ្លើយតបតាមផ្លូវការទូតជៀសវាងការឆ្លើយតបតាមការយល់ឃើញ ឬចិត្តនឹកឃើញម្តងមួយពេលដែលធ្វើឱ្យប៉ះពាល់ដល់ផលប្រយោជន៍យូអង្វែងរវាងកម្ពុជានិងសហរដ្ឋអាមេរិក។
លោកមានប្រសាសន៍បន្ថែមថា៖ «អ្វីដែលខ្ញុំបន្ថែមហ្នឹង គ្រាន់តែថា ក្នុងកំឡុងពេលហ្នឹង ជាការប្រកួតប្រជែងភូមិសាស្រ្តនយោបាយរវាងចិននិងអាមេរិក អីចឹងទេ សម្ពាធពីសហរដ្ឋអាមេរិកហ្នឹងជារឿងធម្មតា ដោយសារកម្ពុជាត្រូវបានសហរដ្ឋអាមេរិកមើលឃើញថា ជាសម្ព័ន្ធមិត្តរបស់ចិន អីចឹងសហរដ្ឋអាមេរិកតែងតែដាក់ទណ្ឌកម្ម ឬក៏ដាក់សម្ពាធមកលើកម្ពុជា ក៏ប៉ុន្តែជាការឆ្លើយតប កម្ពុជាគួរតែរក្សាគោលជំហររបស់ខ្លួនហ្នឹង មិនឆ្លើយតបបែបដែលហៅថាអវិជ្ជមាន ហើយយើងគួរថ្លឹងថ្លែងពីផលប៉ះពាល់ ឧទាហរណ៍ផលប៉ះពាល់ នៃការកម្ទេចអាវុធអីចឹងវាធ្វើឱ្យអ្វីដែលយើងបានទិញអាវុធរួចហើយ ទី១ ទាក់ទងហ្នឹងលុយកាក់ ទី២ដែលខ្ញុំនិយាយ គឺរុញស្ថានការណ៍ទំនាក់ទំនងហ្នឹងឱ្យកាន់តែអាក្រក់ឡើងរវាងសហរដ្ឋអាមេរិកនិងកម្ពុជា»។
ប្រតិកម្មរបស់លោកនាយករដ្ឋមន្ត្រី ហ៊ុន សែន កាលពីម្សិលមិញនេះ បានធ្វើឡើងចំពេលដែលមន្ត្រីជាន់ខ្ពស់ក្រសួងការបរទេសអាមេរិក លោក Derek Chollet កំពុងទស្សនកិច្ចនៅកម្ពុជា។ ដំណើរទស្សនកិច្ចនេះ ធ្វើឡើង ក្នុងគោលបំណងដើម្បីស្វែងរកដំណោះស្រាយវិបត្តិនៅប្រទេសភូមា ខណៈកម្ពុជានឹងត្រូវធ្វើជាម្ចាស់ផ្ទះអាស៊ាននៅឆ្នាំក្រោយនេះ៕