មន្ត្រីជាន់ខ្ពស់រដ្ឋាភិបាល បានចេញប្រតិកម្មតបចំពោះការលើកឡើងរបស់លោក សម រង្ស៊ី ដែលថាដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសមីយ៉ាន់ម៉ា ឬភូមា នៅដើមឆ្នាំក្រោយ មិនតំណាងឱ្យកម្ពុជានិងអាស៊ាននោះឡើយ។
ប្រតិកម្មនេះធ្វើឡើង ក្រោយពេលអតីតប្រធានគណបក្សសង្រ្គោះជាតិដែលកំពុងរស់នៅនិរទេសខ្លួនឯងនៅប្រទេសបារាំង លោក សម រង្ស៊ី បានចេញសេចក្តីថ្លែងការណ៍មួយកាលពីថ្ងៃទី១៤ខែធ្នូ ហើយលោកទើបផ្សព្វផ្សាយនៅថ្ងៃទី១៥ខែធ្នូ ដោយលើកឡើងថា ដំណើរទស្សនកិច្ចរបស់លោក ហ៊ុន សែន ទៅមីយ៉ាន់ម៉ានាខែមករា ឆ្នាំ២០២២ខាងមុខនេះ មិនមែនតំណាងឱ្យកម្ពុជា និង សមាគមអាស៊ានឡើយ ។
ក្នុងសេចក្តីថ្លែងការណ៍ជាភាសាអង់គ្លេសនោះ ដំណើរទស្សនកិច្ចទៅប្រទេសមីយ៉ាន់ម៉ា នៅពេលខាងមុខ របស់ លោក ហ៊ុន សែន បានផ្ទុយពីសេចក្តីសម្រេចរបស់សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន ទាំងស្រុង ដោយសារតែអាស៊ានមិនទទួលបានស្គាល់របបយោធាភូមា ក្រោយពីមានរដ្ឋប្រហារកាលដើមឆ្នាំ២០២១នេះ។
សេចក្តីថ្លែងការណ៍អតីតគណបក្សសង្គ្រោះជាតិ ថា៖ «លោក ហ៊ុន សែន ពេលធ្វើទស្សនកិច្ច នៅប្រទេសភូមា មិនមែនជាតំណាងឲ្យកម្ពុជា និងឲ្យសមាគមអាស៊ានឡើយ ពីព្រោះរបប ហ៊ុន សែន មិនមែនជាតំណាងឲ្យប្រជារាស្ត្រខ្មែរទេ ដោយសារតែការបោះឆ្នោតក្លែងក្លាយជាបន្តបន្ទាប់នៅកម្ពុជា ហើយទស្សនកិច្ចលោក ហ៊ុន សែន នៅប្រទេសភូមានេះ គឺផ្ទុយពីសេចក្តីសម្រេចរបស់សមាគមអាស៊ានទាំងមូល ដែលមិនទទួលស្គាល់របបយោធា នៅប្រទេសភូមា ក្រោយពីរដ្ឋប្រហារ ថ្ងៃ០១ កុម្ភៈ ២០២១»។
ឆ្លើយតបនឹងបញ្ហានេះ ប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន ចាត់ទុកការលើកឡើងរបស់អតីតមេគណបក្សប្រឆាំងលោក សម រង្ស៊ីថា ជាបុគ្គលអវិជ្ជាក្នុងការដោះស្រាយបញ្ហា។ លោកបន្តថា លោកនាយករដ្ឋមន្ត្រី ហ៊ុន សែន ជាអ្នកមានបទពិសោធន៍ក្នុងដោះស្រាយបញ្ហានយោបាយ ហើយជាអ្នកនាំមុខក្នុងការបញ្ចប់សង្គ្រាមនៅកម្ពុជានាពេលកន្លងមក។
មន្ត្រីជាន់ខ្ពស់រដ្ឋាភិបាលរូបនេះបន្តថា ដំណើរទស្សនកិច្ចទៅប្រទេសមីយ៉ាន់ម៉ា ធ្វើឡើងក្នុងនាមជានាយករដ្ឋមន្ត្រីស្របច្បាប់ដែលកើតចេញពីការបោះឆ្នោតរបស់ប្រជាពលរដ្ឋកម្ពុជា ហើយដំណើរទស្សនកិច្ចនេះដែរ លោក ផៃ ស៊ីផាន និយាយថា ដើម្បីជួយសម្របសម្រួលដោះស្រាយវិបត្តិនយោបាយនៅមីយ៉ាន់ម៉ា ផងដែរ។
លោកថា៖« យើងទៅនេះ ក្នុងនាមស្របច្បាប់ ពីព្រោះកម្ពុជា ឬក៏សហរដ្ឋអាមេរិក ប្រទេសចិន និងប្រទេសដ៏ទៃទៀត មានទូតនៅប្រទេសមីយ៉ាន់ម៉ា ឬភូមា។ ដូច្នេះ មានទំនាក់ទំនងគ្នាហ្នឹង យើងធ្វើតាមក្រឹត្យក្រមបំផុត ។ ការទៅរបស់លោក[ហ៊ុន សែន] ដើម្បីស្ទាបស្ទង់ ដើម្បីមើលធ្វើយ៉ាងម៉េច ដើម្បីរកដំណោះស្រាយនយោបាយ មិនមែនដាក់គំនាបលើភាគីណាមួយទេ គឺចង់ឃើញការបញ្ចប់សោនាដកម្ម ដើម្បីផលប្រយោជន៍នៃការរស់រានរបស់មិត្តមីយ៉ាន់ម៉ា។ យើងអត់មានកាន់ជើងអ្នកខាងណាខាងណីទេ»។
ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅប្រទេសមីយ៉ាន់ម៉ា នាពេលខាងមុខធ្វើឡើងស្របពេលកម្ពុជានឹងក្លាយជាប្រធានប្តូរវេនរបស់អាស៊ានជាផ្លូវការក្នុងរយៈពេល១ឆ្នាំពេញ ចាប់ពីខែមករា ឆ្នាំ២០២២ តទៅ។
កាលពីថ្ងៃទី១៥ ខែធ្នូ ក្នុងពិធីសម្ពោធសណ្ឋាគារមួយនៅភ្នំពេញ លោក ហ៊ុន សែន បានអះអាងជាថ្មីទៀតថា លោកនឹងដឹកនាំគណៈប្រតិភូទៅបំពេញទស្សនកិច្ចផ្លូវការនៅមីយ៉ាន់ម៉ា នាដើមខែមករា ឆ្នាំ២០២២ ខាងមុខ ដោយគ្មានការប្រែប្រួលឡើយ ហើយក៏គ្មាននរណាម្នាក់អាចហាមលោកបានដែរ។
លោកបញ្ជាក់ថា ដំណើរទស្សនកិច្ចទៅប្រទសដែលកំពុងគ្រប់គ្រងអំណាចដោយក្រុមយោធានេះ ដើម្បីជួយសង្គ្រោះអាស៊ានឱ្យនៅ១០ប្រទេស ត្បិតបើមានតែ៩ប្រទេសលោកថា គេមិនហៅអាស៊ានទេ។ តែយ៉ាងនេះលោកប្រមុខរដ្ឋាភិបាលរូបនេះ មិនឱ្យសង្ឃឹមហួសហេតុពេកលើភាពជាប្រធានអាស៊ានរបស់កម្ពុជា តែក៏មិនត្រូវមាក់ងាយពីតួនាទីកម្ពុជានោះដែរ។
អ្នកសិក្សាស្រាវជ្រាវនៅវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លោក វណ្ណ ប៊ុនណា មានប្រសាសន៍ប្រាប់វីអូឌីកាលពីថ្ងៃអង្គារថា ប្រសិនបើកម្ពុជាអាចដើរតួជាអ្នកដឹកដៃ គូជម្លោះនៅភូមាទៅរកតុចរចាបាន កម្ពុជានឹងទទួលបានគុណសម្បត្តិ ឬកិត្តិនាមខ្ពស់លើឆាកអន្តរជាតិ។
លោក បន្ថែមថា ជុំវិញវិបត្តិនៅមីយ៉ាន់ម៉ា កម្ពុជាគួរប្រកាន់ខ្ជាប់នូវគោលនយោបាយនៃការចរចា ឬសម្របសម្រួលភាគីជម្លោះទាំងយោធា និងស៊ីវិល តាមយន្តការឈ្នះៗទាំងអស់គ្នា។ លើសពីនេះ លោកថា មុនធ្វើការសម្រេចចិត្តឬ ផ្តល់សម្បទានណាមួយដល់ក្រុមយោធា កម្ពុជាត្រូវជជែកពិភាក្សាជាមួយបណ្តាប្រទេសជាសមាជិកអាស៊ានទាំងអស់ ដើម្បីស្តាប់យោបល់ និងធ្វើការសម្រេចរួមជុំវិញវិបត្តិនៅមីយ៉ាន់ម៉ានេះ ជៀសវាងបង្កភាពបែកបាក់ក្នុងចង្កោមអាស៊ាន។
ជាមួយគ្នានេះ កម្ពុជាត្រូវប្រាកដថា រាល់ដំណោះស្រាយដែលខ្លួនសម្របសម្រួលលើវិបត្តិនៅមីយ៉ាន់ម៉ា កើតចេញមកដោយមិនបម្រើមហិច្ឆតានយោបាយភូមិសាស្ត្រឱ្យមហាអំណាចណាមួយឡើយ ហើយក៏មិនបម្រើប្រយោជន៍ភាគីជម្លោះណាមួយនោះដែរ៕
