តំណាងប្រជាពលរដ្ឋនៅភូមិគ្រោះ ខេត្តតាកែវ អំពាវនាវទៅអាជ្ញាធរពាក់ព័ន្ធចុះពិនិត្យទីតាំងចាក់សំរាមមួយកន្លែងដោយថា ក្រុមហ៊ុនឯកជននៅតែបន្តដឹកសំរាមយកមកចាក់ពាសវាលពាសកាល ដោយមិនទាន់ធ្វើរបងបិទជិតតាមការសន្យាជាមួយប្រជាពលរដ្ឋនោះទេ។
អ្នកស្រី ធុល រ៉ា ដែលអះអាងថាជាតំណាងឱ្យពលរដ្ឋនៅភូមិគ្រោះ ឃុំរវៀង ស្រុកសំរោង ខេត្តតាកែវ ជាង ១០០គ្រួសារ បានប្រាប់វីអូឌីនៅថ្ងៃអាទិត្យនេះថា រយៈពេលជិត១សប្តាហ៍កន្លងមកនេះ ក្រុមហ៊ុនឯកជនមួយឈ្មោះ ជឹម សុវណ្ណរិទ្ធ បានធ្វើកិច្ចសន្យាជាមួយប្រជាពលរដ្ឋ ដោយមានអាជ្ញាធរស្រុកសំរោងដឹងឮផងថា នឹងរៀបចំធ្វើរបងព័ទ្ធជុំវិញទីតាំងចាក់សំរាមដែលមានទំហំប្រហែលជិត១ហិកតា និងឈប់ដុតសំរាមនៅក្រៅឡបន្តទៀត។
អ្នកស្រី ធុល រ៉ា សង្កេតឃើញថា ក្រុមហ៊ុនដុតសំរាមនៅក្នុងឡបានប្រហែលជាមួយឡានតែប៉ុណ្ណោះក្នុងមួយថ្ងៃ ខណៈសំរាមដែលដឹកមកនៅសល់ប្រហែល ៩ឡានទៀតចាក់នៅពាសវាលពាសកាល និងមិនទាន់ធ្វើរបងព័ទ្ធជុំវិញទីតាំងនោះនៅឡើយ។ ករណីនេះអ្នកស្រីថា នៅតែធ្វើឱ្យប៉ះពាល់ដល់បរិស្ថាន សុខភាពនិងដំណាំប្រជាពលរដ្ឋនៅក្បែរនោះផងដែរ។
អ្នកស្រីនិយាយថា៖ «សុំឱ្យក្រុមហ៊ុនធ្វើរបងឱ្យស្អាតបិទឱ្យជិត ព្រោះរបងអត់ធ្វើផង តែមួយចំហៀងតិច រៀបឥដ្ឋតែមួយម៉ែត្របានតែចំហៀងខាងកើត ហើយនៅខាងលិចចំហដដែល។ ខាងត្បូងនៅតែចំហដដែល ហើយថាបិទសង្ក័សី ឃើញដឹកសង្ក័សីចាស់ដឹកមកមួយរឺម៉ក ពីររឺម៉កនៅដឹកគរចោលហ្នឹង អត់មានធ្វើទេ»។
អ្នកស្រីបន្ថែមថា៖ «ក្នុងមួយថ្ងៃគេដឹកសំរាមចូលប្រហែលជា១០ឡាន ប៉ុន្តែខ្ញុំឃើញដុតសំរាមនៅក្នុងឡបានប្រហែល១ឡានទេក្នុងមួយថ្ងៃ ហើយនៅសល់ប្រហែល៩ឡានទៀតដឹកដាក់ពាសវាលពាសកាលនៅទីលានហ្នឹង មានក្លិនស្អុយប៉ះពាល់សុខភាពពលរដ្ឋ »។
អ្នកស្រី ម៉ម សារឿន ដែលអះអាងថាតំណាងឱ្យពលរដ្ឋនៅភូមិគ្រោះមួយរូបទៀត និយាយថា នៅពេលខ្យល់បកមកធ្វើឱ្យក្លិនស្អុយប៉ះពាល់ដល់បរិស្ថាន សុខភាព និងដំណាំប្រជាពលរដ្ឋនៅក្បែរនោះ។ ករណីនេះ អ្នកស្រីស្នើទៅអាជ្ញាធរពាក់ព័ន្ធចុះត្រួតពិនិត្យទីតាំងចាក់សំរាមនោះ ដើម្បីជំរុញទៅក្រុមហ៊ុនធ្វើកន្លែងចាក់សំរាមនោះ ឱ្យមានស្តង់ដារ កុំឱ្យប៉ះពាល់សុខភាពពលរដ្ឋផងដែរ។
អ្នកស្រីអំពាវនាវដូចនេះថា៖ «ខ្ញុំស្នើទៅអាជ្ញាធរពាក់ព័ន្ធចុះមកមើលម្តងទៀតមក ឱ្យឃើញថា សំរាមហ្នឹងវាចាក់ពាសវាលពាសកាល ហើយក្រុមហ៊ុនអត់ធ្វើតាមកិច្ចសន្យាជាមួយពលរដ្ឋេ របងក៏អត់ធ្វើ ឃើញដឹកសង្ក័សីមួយរឺម៉កនៅគរចូលនៅហ្នឹង»។
អ្នកស្រី ម៉ម សារឿន ព្រមានថា បើសិនជាអាជ្ញាធរពាក់ព័ន្ធមិនជំរុញឱ្យក្រុមហ៊ុនចាក់សំរាមគោរពតាមកិច្ចសន្យាទេ ពួកគេនឹងនាំគ្នាបន្តតវ៉ាបិទផ្លូវមិនឱ្យក្រុមហ៊ុននោះដឹកសំរាមចាក់នៅតំបន់នោះបន្តទៀតនោះទេ។
វីអូឌី មិនអាចសុំការបំភ្លឺពីក្រុមហ៊ុនឯកជនមួយឈ្មោះ ជឹម សុវណ្ណរិទ្ធ បានទេនៅរសៀលថ្ងៃអាទិត្យនេះ។
ប៉ុន្តែអភិបាលស្រុកសំរោង លោក កេត ម៉ៅ មានប្រសាសន៍ថា ម្ចាស់អាជីវកម្មដឹកសំរាមនោះ គាត់មិនទាន់បង្កើតជាក្រុមហ៊ុននោះទេ គឺគាត់គ្រាន់តែជាសេវាករដែលមានដី និងទទួលបានអាជ្ញាបណ្ណពីក្រសួងបរិស្ថាន ដើម្បីសហការជាមួយក្រសួង ជួយដឹកសំរាមយកទៅចាក់នៅទីលាននិងដុតក្នុងឡតែប៉ុណ្ណោះ។
លោកបន្តថា ក្រោយពីទទួលបានសំណើរពីប្រជាពលរដ្ឋ គឺលោកនឹងសហការជាមួយមន្ត្រីជំនាញចុះពិនិត្យ និងប្រាប់ទៅម្ចាស់អាជីវកម្មដឹកសំរាមនោះ គោរពតាមកិច្ចសន្យាដែលខ្លួនបានសន្យាជាមួយពលរដ្ឋផងដែរ ។
លោកមានប្រសាសន៍ថា៖ «ដំណាក់កាលនេះខ្ញុំនិងដោះស្រាយជូនប្រជាពលរដ្ឋ បើសិនជាប៉ះពាល់ដំណាំប្រជាពលរដ្ឋ បើពលរដ្ឋធ្វើស្រូវមិនបាន ខ្ញុំមានសំណង។ បើថាម្ចាស់អាជ្ញាបណ្ណសំរាម មិនសងឱ្យគាត់ប្រាប់មកខ្ញុំ ទីពីរមិនអនុញាតឱ្យទឹកហៀមកដល់ដីស្រែពលរដ្ឋ បើនៅហៀ ឱ្យគាត់ប្រាប់មកខ្ញុំ ខ្ញុំនឹងចុះទៅបញ្ជាឱ្យគាត់ធ្វើភ្លាម។ បើគាត់ដឹកនៅក្រៅឡសុំឱ្យគាត់ថតឱ្យខ្ញុំឱ្យជាប់ ខ្ញុំនិងមានវិធានការបន្តទៅទៀត»។
អតីតស្ថាបនិកមួយរូបនៃចលនាមាតាធម្មជាតិ និងបច្ចុប្បន្នជាមន្ត្រីគម្រោងតស៊ូមតិនៃគម្រោងអ្នកការពារព្រៃឈើនៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍ថា បញ្ហាសំរាម គឺជារឿងមួយស្មុគស្មាញ ដែលរដ្ឋាភិបាលមិនទាន់ដោះស្រាយឱ្យបានល្អនោះទេ។
លោកបន្តថា ប្រសិនបើបញ្ហានេះមិនបានដោះស្រាយដោយយកចិត្តទុកដាក់និងទាន់ពេលវេលានោះទេ អាចធ្វើឱ្យពលរដ្ឋនាំគ្នាប្រមូលផ្តុំតវ៉ា ឬឡើងមកដាក់ញត្តិនៅក្រសួងពាក់ព័ន្ធ ដើម្បីទាមទាររកដំណោះស្រាយផងដែរ។
លោក សាន់ ម៉ាឡា យល់ថា បើក្រុមហ៊ុននៅតែមិនគោរពតាមកិច្ចសន្យាជាមួយពលរដ្ឋទេ នោះអាជ្ញាធរត្រូវដកអាជ្ញាបណ្ណមកវិញ ហើយបើកឱ្យក្រុមហ៊ុនផ្សេងមកជំនួស ដើម្បីរៀបចំកន្លែងទីតាំងចាក់ និងដុតសំរាមនោះមានស្តង់ដារ មិនប៉ះពាល់បរិស្ថាននិងសុខភាពពលរដ្ឋ។
លោកមានប្រសាសន៍ថា៖ «បើសិនជាមិនមានដំណោះស្រាយទេ អាជ្ញាធរគួរតែធ្វើការសិក្សាក្នុងការដកក្រុមហ៊ុនដែលទទួលសិទ្ធិក្នុងការប្រមូលសំរាមចោល ហើយស្វែងរកក្រុមហ៊ុនណាដែលអាចមានដំណោះស្រាយចំពោះប្រជាពលរដ្ឋ ទើបទទួលបានផលវិជ្ជមានល្អផងដែរ»៕
