គណបក្សនយោបាយចំនួន៣ បានប្រកាសរួមគ្នាជាថ្មីទៀតថា នឹងបន្តទាមទារឱ្យស្ថាប័នជាតិរៀបចំការបោះឆ្នោត (គ.ជ.ប) ត្រូវទទួលយកសេចក្ដីស្នើអំពីទម្រង់១១០២ ដែលជាក្ដីកង្វល់របស់គណបក្សនយោបាយនៅក្រៅរដ្ឋាភិបាល ដាក់បញ្ចូលទៅក្នុងដំណើរការបោះឆ្នោតឡើងវិញ ខណៈ គ.ជ.ប ធ្លាប់បានច្រានចោលសេចក្ដីស្នើនោះ។
ប្រធានគណបក្សកម្ពុជានិយម លោក យ៉ែម បុញ្ញឬទ្ធិ ឱ្យដឹងនៅថ្ងៃចន្ទនេះថា តំណាងគណបក្សនយោបាយទាំង៣គណបក្ស បានជួបប្រជុំគ្នានៅរសៀលថ្ងៃនេះ ដែលបង្ហាញពីការមិនអាចទទួលយកបានចំពោះការបដិសេធរបស់ គ.ជ.ប អំពីសំណើនិងកង្វល់របស់ពួកគេ។ លោកបន្តថា ការសម្រេចចិត្តរបស់ស្ថាប័ន គ.ជ.ប ជាការមិនគោរពនិងមិនទទួលយកសេចក្ដីស្នើនានាពីតំណាងគណបក្សនយោបាយ ទាក់ទងទម្រង់១១០២នេះ។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធា ក៏ឯកភាពដែរថា ការជំទាស់របស់ គ.ជ.ប អំពីធាតុចូលទាំងឡាយកន្លងទៅរបស់គណបក្សនយោបាយ ទៅលើសេចក្ដីព្រាងបទបញ្ជានិងនីតិវិធីក្នុងជំហានដំបូង ជាហេតុផលមួយដែលនឹងរុញឱ្យមានព្រឹត្តិការណ៍នៃការតវ៉ាដ៏ចម្រូងចម្រាស ក្រោយការបោះឆ្នោតនាពេលខាងមុខ។
លោកបន្ថែមថា ទម្រង់១១០២នេះជាភស្តុតាងដែលមិនអាចខ្វះបាន ព្រោះវាអាចជួយឱ្យភ្នាក់ងារអ្នកសង្កេតការណ៍ ឬភ្នាក់ងារគណបក្សនយោបាយ ផ្ទៀងផ្ទាត់រកខុសត្រូវអំពីលទ្ធផលឆ្នោត ហើយគណបក្សប្រជាធិបតេយ្យមូលដ្ឋាន នឹងមិនឈប់ត្រឹមនេះ ក្នុងការទាមទារដល់ គ.ជ.ប ឱ្យប្ដូរជំហររបស់ខ្លួនដែរ។
លោកបន្តថា៖ «យើងនឹងធ្វើការតស៊ូមតិបន្ថែមទៀតលើចំណុចនេះ។ សម្រាប់ពួកយើង ការលុបចោលនូវនីតិវិធីនេះ គឺវាប៉ះពាល់ទៅដល់ទំនុកចិត្តយ៉ាងខ្លាំង។ វាអាចឱ្យគេនិយាយបំប៉ោងឬបំភ័ន្តលទ្ធផលនៃការបោះឆ្នោតបាន»។
វីអូឌី មិនទាន់អាចសុំការឆ្លើយតបពីអ្នកនាំពាក្យ គ.ជ.ប លោក ហង្ស ពុទ្ធា បាននៅឡើយទេ នៅថ្ងៃចន្ទនេះ។ ប៉ុន្តែលោកធ្លាប់អះអាងថា គ.ជ.ប មិនទទួលយកការទាមទាររបស់តំណាងគណបក្សទាំងនោះទេ។
លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត បានចេញសេចក្ដីសម្រេចកាលពីថ្ងៃទី១៤ ខែមករា ឆ្នាំ២០២២ ដោយមិនអនុវត្តទម្រង់១១០២នេះ ដូចការបោះឆ្នោតលើកមុនៗទៀតឡើយ។ ជាបន្តបន្ទាប់មក គ.ជ.ប នៅតែបន្តរក្សាជំហរនេះដោយមិនកែប្រែ បើទោះជាមានការជំទាស់ម្ដងហើយម្ដងទៀតពីគណបក្សប្រជាធិបតេយ្យមូលដ្ឋាន គណបក្សកម្ពុជានិយម និងគណបក្សកែទម្រង់កម្ពុជាក៏ដោយ។
ការមិនផ្លាស់ប្ដូរគោលជំហររបស់ គ.ជ.ប នេះ បានជំរុញឱ្យគណបក្សទាំង៣ចេញសេចក្ដីថ្លែងការណ៍រួមគ្នាកាលពីថ្ងៃទី១១ ខែមករា ដោយទាមទារឱ្យស្ថាប័នជាតិរៀបចំការបោះឆ្នោត ត្រូវរក្សាទុកទម្រង់កំណត់ហេតុនៃការរាប់សន្លឹកឆ្នោត ឬហៅកាត់ថា «ទម្រង់១១០២» ហើយគណៈកម្មការជាតិរៀបចំការបោះឆ្នោត នៅតែមានភារកិច្ចចែកជូនកំណត់ហេតុនៃការរាប់សន្លឹកឆ្នោត ឬទម្រង់១១០២នេះ ដល់ភ្នាក់ងារគណបក្សនយោបាយដែលមានវត្តមាននៅការិយាល័យបោះឆ្នោត ដូចការបោះឆ្នោតមុនៗ។
អ្នកសម្របសម្រួលផ្នែកអង្កេត និងតស៊ូមតិ នៃអង្គការខុមហ្វ្រែល លោក កន សាវាង្ស យល់ឃើញថា ការរក្សាទុកទម្រង់១១០២នេះ ជាមធ្យោបាយដ៏ល្អ ដែលអាចជួយឱ្យគ្រប់ភាគីពាក់ព័ន្ធអស់ចិត្តអំពីលទ្ធផលឆ្នោត ហើយការអនុវត្តដូច្នេះ លោកថា មិនប៉ះពាល់ដល់ដំណើរការបោះឆ្នោតនោះទេ។
លោកបន្តថា៖ «សម្រាប់យើងខ្ញុំជាអ្នកមើល យើងមើលឃើញថា ការដែលបែងចែកទម្រង់នេះនៅការិយាល័យ បោះត្រានៅការិយាល័យ ហើយនិងអ្នកធ្វើការជាមួយនឹងការិយាល័យនេះ គឺល្អបំផុត។ យើងក៏នៅតែស្នើសុំឱ្យ គ.ជ.ប អំពីចំណុចទាំងអស់នេះ ពីព្រោះចំណុចទាំងអស់នេះ វាអត់មានខាតបង់អ្វីទាល់តែសោះសម្រាប់ស្ថាប័ន គ.ជ.ប»។
កាលបរិច្ឆេទនៃការរបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់អាណត្តិទី៥ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២៕