គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចលុបឈ្មោះប្រជាពលរដ្ឋ៥នាក់ចេញពីបញ្ជីបោះឆ្នោត នៅសង្កាត់ផ្សារចាស់ រាជធានីភ្នំពេញ ខណៈពួកគេប្ដឹងតវ៉ាចំពោះសេចក្ដីសម្រេចនេះ។
ក្នុងសេចក្ដីប្រកាសព័ត៌មានស្ដីពី «លទ្ធផលសវនាការពាក់ព័ន្ធនឹងការដោះស្រាយបណ្ដឹងតវ៉ាសុំរក្សាទុកឈ្មោះក្នុងបញ្ជីបោះឆ្នោត» បានឱ្យដឹងកាលពីថ្ងៃ១៨ ខែមករា ម្សិលមិញនេះថា ប្រជាពលរដ្ឋចំនួន៥រូបបានប្ដឹតវ៉ាទៅនឹងការសម្រេចរបស់ក្រុមប្រឹក្សាសង្កាត់ផ្សារចាស់ ក្នុងរាជធានីភ្នំពេញ ដែលបានសម្រេចលុបឈ្មោះរបស់ពួកគាត់ចេញពីបញ្ជីបោះឆ្នោត។
ពលរដ្ឋទាំងនោះរួមមាន លោក ដួង វិចិត្រ, អ្នកស្រី អ៊ុន សុគន្ធី, អ្នកស្រី ដួង ចិន្ដាមុនី, លោក ដួង វិរៈ និងលោក ដួង វិសាល។
គណៈកម្មាធិការជាតិរៀបចំការបោះឆ្នោតបានបញ្ជាក់ថា ដើមចមដែលនាំឱ្យ គ.ជ.ប សម្រេចលុបឈ្មោះពលរដ្ឋទាំង៥នាក់នេះ ដោយសារតែពួកគេពុំបានបំពេញលក្ខខណ្ឌមានទីលំនៅ ឬទីសំណាក់ក្នុងឃុំ-សង្កាត់ដែលសាម៉ីខ្លួនត្រូវបោះឆ្នោតនោះទេ។ នេះបើយោងតាមមាត្រា៤៦ និងមាត្រា៥១ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ។
គ.ជ.ប បញ្ជាក់ដូច្នេះថា៖ «ឈ្មោះប្រជាពលរដ្ឋទាំង៥រូបនេះ ត្រូវបានស្រង់ចូលក្នុងបញ្ជីឈ្មោះអ្នកបោះឆ្នោត ដែលនឹងត្រូវលុបចេញពីបញ្ជីបោះឆ្នោត ដោយមូលហេតុពួកគាត់បានផ្លាស់ប្ដូរទីលំនៅចេញពីសង្កាត់ផ្សារចាស់ ទៅសង្កាត់ស្ទឹងមានជ័យទី១។ តាមបញ្ញត្តិដូចចែងក្នុងមាត្រាទាំង២ខាងលើ គ.ជ.ប សម្រេចតម្កល់សេចក្ដីសម្រេចលេខ ០០១/២២ ចុះថ្ងៃទី១៣ ខែមករា ឆ្នាំ២០២២ ទុកជាបានការពេញទាំងមូល»។
ទាក់ទិននឹងបញ្ហានេះ គ.ជ.ប ក៏បានទុកសិទ្ធិឱ្យពលរដ្ឋទាំង៥នាក់នោះឬតំណាងដែលមិនសុខចិត្តនឹងសេចក្ដីសម្រេចខាងលើនេះ គឺពួកគេអាចប្ដឹងជំទាស់ទៅក្រុមប្រឹក្សាធម្មនុញ្ញក្នុងរយៈពេល៥ ថ្ងៃយ៉ាងយូរ បន្ទាប់ពីថ្ងៃបានទទួលសម្រង់សេចក្ដីសម្រេច (ទម្រង់បែបបទ ១២០៣) នេះតទៅ។
សេចក្ដីប្រកាសព័ត៌មានរបស់ គ.ជ.ប បានឱ្យដឹងកាលពីថ្ងៃ១៥ ខែមករានេះថា គិតត្រឹមថ្ងៃទី១៤ ខែមករា ឆ្នាំ២០២២ ក្នុងដំណាក់កាលបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត ឆ្នាំ២០២១ ក្រុមប្រឹក្សាឃុំ-សង្កាត់ (កបឃស) ទូទាំងប្រទេស បានទទួលពាក្យបណ្ដឹងតវ៉ាសរុបចំនួន៣៦បណ្ដឹង នៅក្នុងរាជធានី-ខេត្តចំនួន១០ រួមមាន រាជធានីភ្នំពេញ ខេត្តកំពង់ចាម កំពង់ស្ពឺ កំពង់ធំ កណ្ដាល ក្រចេះ ពោធិ៍សាត់ ស្វាយរៀង ខេត្តតាកែវ និងខេត្តឧត្ដរមានជ័យ៕