មន្ត្រីជាន់ខ្ពស់ក្រសួងបរិស្ថាន បានឱ្យដឹងថា នៅក្នុងឆ្នាំ២០២១កន្លងទៅ មន្ត្រីជំនាញ បានដោះអន្ទាក់ដាក់សត្វព្រៃចំនួន ៦១ ៦១១អន្ទាក់ និងបានដកហូតកាំភ្លើងកែច្នៃចំនួន ៧៥៨ដើម ព្រមទាំងបានជួយសង្គ្រោះសត្វព្រៃជាច្រើនទៀត នៅក្នុងប្រតិបត្តិការបង្ក្រាបបទល្មើសនៅតំបន់ការពារធម្មជាតិទូទាំងប្រទេស។
រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍នៅថ្ងៃទី១៩ ខែមករា ឆ្នាំ២០២២នេះថា ក្នុងកិច្ចខិតខំប្រឹងប្រែងការពារ និងអភិរក្សព្រៃឈើនិងសត្វព្រៃនៅកម្ពុជា មន្ត្រីឧទ្យានុរក្សនៃក្រសួងបរិស្ថាន រួមជាមួយអង្គការអភិរក្សជាដៃគូ និងសហគមន៍តំបន់ការពារធម្មជាតិ បានដោះអន្ទាក់បានចំនួន ៦១ ៦១១អន្ទាក់ ពីក្នុងតំបន់ការពារធម្មជាតិ ដែលបានជួយសង្គ្រោះសត្វព្រៃ មិនឱ្យជាប់អន្ទាក់របស់ព្រានព្រៃ និងបង្កគ្រោះថ្នាក់ដល់មនុស្ស។
លោកបន្តថា បរិមាណអន្ទាក់ដែលដោះបាននៅឆ្នាំ២០២១នោះ មានចំនួនកើនឡើងប្រមាណជាង ២០% បើប្រៀបធៀបនឹងបរិមាណអន្ទាក់ដោះបាននៅឆ្នាំ២០២០ ដែលមានចំនួន ៤៣ ២៧០អន្ទាក់ ក្នុងនោះមានប្រភេទអន្ទាក់ឆក់ខ្សែភ្លើង អន្ទាក់វាយបំបាក់ស្មងជើង និងប្រភេទផ្សេងៗទៀត។
លោក នេត្រ ភក្ត្រា បានគូសបញ្ជាក់ថា៖ «កត្តាដែលគំរាមកំហែងខ្លាំងចំពោះសត្វព្រៃ គឺអន្ទាក់ដែលជាឃាតកលាក់មុខ។ ដោយសារតែសម្ភារសម្រាប់ធ្វើអន្ទាក់មានលក់នៅលើទីផ្សារ និងមានតម្លៃថោក ចំនួនអន្ទាក់ត្រូវបានប៉ាន់ស្មានថា មានការកើនឡើង ហើយនៅអាស៊ីមានអន្ទាក់ប្រមាណជាង ១២លានអន្ទាក់ ត្រូវបានលួចដាក់ក្នុងតំបន់ការពារនៅទូទាំងតំបន់អាស៊ី»។
ក្រៅពីអន្ទាក់ដែលបានបង្កគ្រោះថ្នាក់សម្លាប់សត្វព្រៃ លោកថា មន្ត្រីឧទ្យានុរក្សក៏បានដកហូតកាំភ្លើងកែច្នៃប្រើប្រាស់សម្រាប់ការប្រមាញ់សត្វព្រៃចំនួន ៧៥៨ដើមផងដែរ ហើយបរិមាណនេះប្រហាក់ប្រហែលឆ្នាំ២០២០។
លោកបានគូសបញ្ជាក់ថា៖ «ការកើនឡើងនៃកាំភ្លើងកែច្នៃ ក៏ជាផ្នែកមួយគំរាមកំហែងដល់សត្វព្រៃ ហើយកាំភ្លើងកែច្នៃនេះ គឺជាអាវុធដែលគ្រោះថ្នាក់បំផុតផងដែរ។ លើសពីនេះ សត្វឆ្កែប្រដេញ ក៏ជាមូលហេតុនាំឱ្យប៉ះពាល់ដល់សត្វព្រៃដែរ។ ប្រជាជនមួយចំនួន បានចិញ្ចឹមសត្វឆ្កែប្រដេញជាហ្វូង ដើម្បីបណ្តើរចេញទៅប្រមាញ់សត្វព្រៃ ដែលជាកត្តារួមផ្សំធ្វើឱ្យចំនួនសត្វព្រៃបានថយចុះ ដោយការប្រមាញ់ និងស្លាប់ដោយសារតែជំងឺឆ្លងពីឆ្កែស្រុក»។
ដើម្បីបញ្ឈប់ការបរបាញ់ និងការដាក់អន្ទាក់ចាប់សត្វព្រៃដោយខុសច្បាប់ លោកនេត្រ ភក្ត្រា បានអំពាវនាវដល់ប្រជាពលរដ្ឋ កុំបរិភោគសាច់សត្វព្រៃ កុំជួញដូរសត្វព្រៃ និងកុំជឿលើជំនឿ ដែលថា ការបរិភោគសាច់ ឈាម ឬយកឆ្អឹងសត្វព្រៃទៅធ្វើឱសថ ប៉ូវកម្លាំងឬជំនួយដល់សុខភាព ខណៈលោកថា ការទទួលទានបែបនេះ អាចនឹងធ្វើឱ្យពលរដ្ឋប្រឈមមុខនឹងគ្រោះថ្នាក់ដោយសារតែអាចមានមេរោគផ្សេងៗ៕
