តំណាងប្រជាពលរដ្ឋនៅភូមិគ្រោះ ខេត្តតាកែវ បានឱ្យដឹងថា ក្រុមហ៊ុនប្រមូលសំរាមមួយនៅតែបន្តលួចដុតសំរាមក្រៅឡ ដោយបំពានកិច្ចសន្យាជាមួយពលរដ្ឋនិងអាជ្ញាធរកាលពីពេលកន្លងទៅ ដែលបណ្តាលឱ្យប៉ះពាល់ដល់បរិស្ថាន និងសុខភាពអ្នកភូមិនៅក្បែរតំបន់នោះ។
លោក ហែន ស្រ៊ីវ ដែលអះអាងថា ជាតំណាងប្រជាពលរដ្ឋនៅក្នុងភូមិគ្រោះ ឃុំរវៀង ស្រុកសំរោង ខេត្តតាកែវ ជាង ១០០គ្រួសារ បានប្រាប់វីអូឌីនៅថ្ងៃអាទិត្យនេះថា ប្រហែល៤ថ្ងៃមកហើយ ក្រុមហ៊ុនឯកជនឈ្មោះ ជឹម សុវណ្ណរិទ្ធ បានលួចដុតសំរាមនៅក្រៅឡ និងមិនបានធ្វើរបងព័ទ្ធជុំវិញទីតាំងចាក់សំរាមដែលមានទំហំប្រហែលជិត ១ហិកតានោះទេ ។
ករណីនេះលោកជំរុញទៅអាជ្ញាធរពាក់ព័ន្ធ ជាពិសេសអភិបាលស្រុកដែលធ្លាប់ធ្វើជាសាក្សីនៅក្នុងកិច្ចសន្យារវាងក្រុមហ៊ុនជាមួយប្រជាពលរដ្ឋកាលពីដើមខែមករា ឆ្នាំ២០២២នេះ ដើម្បីទប់ស្កាត់កុំឱ្យប៉ះពាល់ដល់បរិស្ថាន និងសុខភាពប្រជាពលរដ្ឋនៅតំបន់នោះ ។
លោកមានប្រសាសន៍ថា៖ «នៅពេលប្រជាជនបិទផ្លូវកាលពីដើមខែមករានេះ អាជ្ញាធរស្រុកគេមកចុះពិនិត្យទីតាំងចាក់សំរាមហ្នឹងដែរ ។ នៅពេលនោះតំណាងក្រុមហ៊ុនបានធ្វើកិច្ចសន្យាជាមួយពលរដ្ឋ ហើយអាជ្ញាធរដឹងឮធ្វើសាក្សី ដោយក្រុមហ៊ុនសន្យាធ្វើរបងព័ទ្ធជុំវិញទីតាំងចាក់សំរាម មិនឱ្យទឹកជ្រាបចូលស្រែពលរដ្ឋ មិនឱ្យដុតសំរាមក្រៅឡ និងសងសំណង់ជូនពលរដ្ឋដែលប៉ះពាល់ដំណាំស្រូវ»។
លោកមានប្រសាសន៍បន្ថែមថា៖ «ប៉ុន្តែប្រហែល៤ថ្ងៃមុននេះ ខ្ញុំទៅស្រែ ឃើញខាងក្រុមហ៊ុនគេដុតសំរាមក្រៅឡ អត់គោរតាមការសន្យាទេ។ ចឹងខ្ញុំ[ស្នើ]ទៅអាជ្ញាធរគិតផលប្រយោជន៍ប្រជាជនផង ព្រោះខ្ញុំក្នុងនាមប្រជាជនអត់ចង់បានអី ចង់បានសុខសន្តិភាព សមស្រប ធ្វើអ្វីកុំឱ្យប៉ះពាល់ដល់ប្រជាពលរដ្ឋ»។
តំណាងពលរដ្ឋម្នាក់ទៀត អ្នកស្រី ធុល រ៉ា សង្កេតឃើញថា ក្រុមហ៊ុនដុតសំរាមនៅក្នុងឡ បានប្រហែលជាមួយឡានតែប៉ុណ្ណោះក្នុងមួយថ្ងៃ ខណៈសំរាមដែលដឹកមកនៅសល់ប្រហែល ៩ឡានទៀត ចាក់នៅពាសវាលពាសកាល និងមិនទាន់ធ្វើរបងព័ទ្ធជុំវិញទីតាំងនោះនៅឡើយ។ ករណីនេះទើបធ្វើឱ្យក្រុមហ៊ុនលួចដុតសំរាមនៅក្រៅឡបែបនេះ ។
ទោះជាបែបនេះក្តី អ្នកស្រីព្រមានថា បើអាជ្ញាធរពាក់ព័ន្ធ ជាពិសេសអភិបាលស្រុក មិនជួយរកដោះស្រាយ ឬទប់ស្កាត់ឱ្យក្រុមហ៊ុនអនុវត្តតាមកិច្ចសន្យាទេ នោះពួកគាត់និងនាំគ្នាបន្តបិទផ្លូវមិនឱ្យក្រុមហ៊ុនឯកជននោះដឹកសំរាមយកទៅចាក់នៅទីតាំងនោះបានទៀតទេ ។
លោកមានប្រសាសន៍ថា៖ «ពួកខ្ញុំធ្លាប់បិទផ្លូវ៣ទៅ៤លើកហើយ ពេលបិទផ្លូវបានមានអាជ្ញាធរមកដោះស្រាយបើមិនចឹងទេ គេអត់មិនជួយដោះស្រាយទេ។ លើកនេះ បើអាជ្ញាធរមិនជួយដោះស្រាយជូនពលរដ្ឋតាមកិច្ចសន្យាទេ នោះពួកខ្ញុំនឹងនាំគ្នាបន្តបិទផ្លូវទៀតរហូតមានដំណោះស្រាយ»។
វីអូឌី មិនអាចរកការទាក់ទងសុំការបំភ្លឺពីក្រុមហ៊ុនប្រមូលសំរាមឈ្មោះ ជឹម សុវណ្ណរិទ្ធ បានទេនៅថ្ងៃអាទិត្យនេះ។ ចំណែក អភិបាលស្រុកសំរោង លោក កេត ម៉ៅ អះអាងថា ជាប់រវល់ប្រជុំ ។
អតីតស្ថាបនិកមួយរូបនៃចលនាមាតាធម្មជាតិ និងបច្ចុប្បន្នជាមន្ត្រីគម្រោងតស៊ូមតិនៃគម្រោងអ្នកការពារព្រៃឈើនៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍ថា បញ្ហាសំរាម គឺជារឿងមួយស្មុគស្មាញ ដែលរដ្ឋាភិបាលមិនទាន់ដោះស្រាយឱ្យបានល្អនោះទេ។
លោកបន្តថា ប្រសិនបើបញ្ហានេះមិនបានដោះស្រាយដោយយកចិត្តទុកដាក់និងទាន់ពេលវេលានោះទេ អាចធ្វើឱ្យពលរដ្ឋនាំគ្នាប្រមូលផ្តុំតវ៉ា ឬឡើងមកដាក់ញត្តិនៅក្រសួងពាក់ព័ន្ធ ដើម្បីទាមទាររកដំណោះស្រាយផងដែរ។
លោក សាន់ ម៉ាឡា យល់ថា បើក្រុមហ៊ុននៅតែមិនគោរពតាមកិច្ចសន្យាជាមួយពលរដ្ឋទេ នោះអាជ្ញាធរត្រូវដកអាជ្ញាបណ្ណមកវិញ ហើយបើកឱ្យក្រុមហ៊ុនផ្សេងមកជំនួស ដើម្បីរៀបចំកន្លែងទីតាំងចាក់ និងដុតសំរាមនោះមានស្តង់ដារ មិនប៉ះពាល់បរិស្ថាននិងសុខភាពពលរដ្ឋ។
លោកមានប្រសាសន៍ថា៖ «បើសិនជាមិនមានដំណោះស្រាយទេ អាជ្ញាធរគួរតែធ្វើការសិក្សាក្នុងការដកក្រុមហ៊ុនដែលទទួលសិទ្ធិក្នុងការប្រមូលសំរាមចោល ហើយស្វែងរកក្រុមហ៊ុនណាដែលអាចមានដំណោះស្រាយចំពោះប្រជាពលរដ្ឋ ទើបទទួលបានផលវិជ្ជមានល្អផងដែរ»៕