រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាទៅអាជ្ញាធរពាក់ព័ន្ធ ជាពិសេសមន្ត្រីនគរបាលជាតិទាំងអស់ ត្រូវការពារសុវត្ថិភាព និងបង្កលក្ខណៈងាយស្រួលដល់គ្រប់សកម្មភាពគណបក្សនយោបាយទាំងអស់ដែលបានចុះបញ្ជីប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់នាពេលខាងមុខ ឱ្យបានស្មើភាពគ្នា។
ការបញ្ជានេះ ធ្វើឡើងបន្ទាប់ពីគណបក្សក្រៅរដ្ឋាភិបាលមួយចំនួនរិះគន់អាជ្ញាធរនៅតាមបណ្ដាខេត្តមួយចំនួនថា បានមករំខានសកម្មភាពជួបប្រជុំជាមួយសកម្មជនមូលដ្ឋាន និងរារាំងមិនឱ្យលើកស្លាកគណបក្សនៅទីសាធារណៈរបស់ពួកគេ ដោយលើកហេតុផលថា មិនបានជូនដំណឹងមកអាជ្ញាធរមូលដ្ឋានជាមុន។
ក្នុងពិធីប្រគល់រថយន្តជូនវរសេនាតូចនគរបាលការពារព្រំដែនប្រចាំទិសភូមិភាគទី១ ភូមិភាគទី២ និងភូមិភាគទី៣ នាព្រឹកថ្ងៃទី២៥ ខែមករា ឆ្នាំ២០២២នេះ រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា គណបក្សកាន់អំណាចនៅតែបន្តពង្រឹងនិងពង្រីកនូវលទ្ធិប្រជាធិបតេយ្យ សេរីពហុបក្ស និងការអនុវត្តនយោបាយកំណែទម្រង់វិមជ្ឈការនិងវិសហមជ្ឈការ តាមរយៈការផ្ទេរអំណាចពីថ្នាក់ជាតិទៅថ្នាក់ក្រោមជាតិឱ្យបានកាន់តែច្រើន និងស្របតាមច្បាប់។
ករណីនេះ លោកជំរុញទៅអាជ្ញាធរពាក់ព័ន្ធគ្រប់លំដាប់ថ្នាក់ ត្រូវមានភារកិច្ចរៀបចំផែនការការពារសុវត្ថិភាព និងបង្កលក្ខណៈងាយស្រួលដល់គ្រប់សកម្មភាពធ្វើនយោបាយរបស់គណបក្សទាំងអស់ ហើយវិធានការនេះត្រូវធ្វើឡើងដោយស្មើភាពគ្នា គ្មានការរើសអើងនិងប្រកាន់បក្ខពួក ដើម្បីឱ្យដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់មានភាពសេរី ត្រឹមត្រូវ និងយុត្តិធម៌ ស្របតាមគោលការណ៍ប្រជាធិបតេយ្យ។
លោកមានប្រសាសន៍ថា៖ «ក្នុងឋានៈយើងជានគរបាលជាតិ យើងត្រូវប្រកាន់នូវជំហរអព្យាក្រឹត្យចំពោះគណបក្សនយោបាយ បានន័យថា យើងត្រូវមានភារកិច្ចការពារគ្រប់គណបក្សនយោបាយ ដោយមិនបែងចែក មិនប្រកាន់ សម្រាប់គណបក្សដែលបានចុះឈ្មោះប្រកួតប្រជែងក្នុងការបោះឆ្នោតនេះ»។
យ៉ាងណា អ្នកនាំពាក្យគណបក្សភ្លើងទៀន លោក ថាច់ សេដ្ឋា ហាក់មិនមានជំនឿលើការអំពាវនាវនេះទេ ដោយថា តាមការសង្កេតកន្លងមក ការអំពាវនាវរបស់ថ្នាក់ដឹកនាំទៅកាន់អាជ្ញាធរថ្នាក់ក្រោមមិនមានប្រសិទ្ធភាពឡើយ។ លោកថា បើចង់ឱ្យដំណើរការបោះឆ្នោតមួយមានភាពសេរី ត្រឹមត្រូវ និងយុត្តិធម៌ លុះត្រាតែលោក ស ខេង ចេញលិខិតជាផ្លូវការ ដើម្បីឱ្យមន្ត្រីថ្នាក់ក្រោមគោរពនិងអនុវត្តតាម នោះទើបមានប្រសិទ្ធភាពខ្ពស់ ។
លោកបន្តថា៖ «ដើម្បីឱ្យមានការឯកភាពជាទូទៅ ការអនុវត្តឱ្យស្មើគ្នា ត្រូវមានចេញបញ្ជាជាផ្លូវការទៅ! អាហ្នឹងបានខាងមូលដ្ឋាន គឺគោរពទៅតាមអ្វីដែលជាបទបញ្ជារបស់ក្រសួងមហាផ្ទៃបាន។ យើងចង់ឱ្យចេញបញ្ជាជាក់លាក់ ជាលាយលក្ខណ៍អក្សរទៅតាមគ្រប់មូលដ្ឋាន បានខ្ញុំថាការអនុវត្តមានប្រសិទ្ធភាព»។
នាយកប្រតិបត្តិអង្គការនិកហ្វិច លោក សំ គន្ធាមី មានប្រសាសន៍គាំទ្រការលើកឡើងរបស់រដ្ឋមន្ត្រីក្រសួងមហាផ្ទៃ ដើម្បីធានាបាននូវសេរីភាព និងសុវត្ថិភាពចំពោះគណបក្សនយោបាយទាំងអស់។ ប៉ុន្តែលោកបញ្ជាក់ថា បើសិនជាអាជ្ញាធរពាក់ព័ន្ធមិនអនុវត្តតាមការអំពាវនាវរបស់ថ្នាក់ដឹកនាំ ហើយនៅតែបន្តរារាំងឬរំខានដល់គណបក្សនយោបាយនៅពេលពួកគេធ្វើសកម្មភាពស្របតាមច្បាប់ គឺថ្នាក់ដឹកនាំត្រូវអនុវត្តវិធានការរដ្ឋបាល ឬវិធានការច្បាប់លើមន្ត្រីទាំងនោះ ដើម្បីចៀសវាងមានរឿងបែបនេះកើតឡើងបន្តទៀត។
លោកមានប្រសាសន៍ថា៖ «ក្រសួងមហាផ្ទៃ ត្រូវមានវិធានការរបស់ក្រសួង ដោយត្រូវដក ផ្ទេរតាមបែបរដ្ឋបាល ដើម្បីជាគំរូសម្រាប់ខេត្តផ្សេងៗទៀត ដើម្បីឱ្យកន្លែងផ្សេងៗទៀតរាងចាល ទាល់មានវិធានជាក់ស្ដែង បានយើងទទួលយកបាន បានវាស្មើភាពគ្នា»។
មាត្រា៤ នៃច្បាប់ស្ដីពីគណបក្សនយោបាយ បានចែងថា គ្រប់គណបក្សនយោបាយមានសិទ្ធិស្មើៗគ្នាក្នុងការទទួលបុព្វសិទ្ធិ និងការយកចិត្តទុកដាក់ដោយស្មើភាពគ្នាពីរាជរដ្ឋាភិបាល និងអាជ្ញាធរគ្រប់ជាន់ថ្នាក់។ ដោយឡែក មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិផងដែរ។
បើតាមសេចក្ដីប្រកាសព័ត៌មានរបស់ គ.ជ.ប កាលពីថ្ងៃទី១៥ ខែមីនា ឆ្នាំ២០២១ កាលបរិច្ឆេទនៃការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ សម្រាប់អាណត្តិទី៥ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ខាងមុខនេះ៕