គណៈកម្មាធិការជាតិរៀបចំការបោះឆ្នោត គ.ជ.ប ទុករយៈពេល៤ខែដើម្បីឱ្យអ្នកសារព័ត៌មានជាតិ និងអន្តរជាតិទៅដាក់ពាក្យសុំចុះឈ្មោះធ្វើបណ្ណសម្គាល់ខ្លួន ចេញដោយ គ.ជ.ប សម្រាប់ចុះយកព័ត៌មានពីដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០២២ ខាងមុខនេះ។
ក្នុងសេចក្តីជូនដំណឹងរបស់ គ.ជ.ប ដែលវីអូឌីទទួលបាននៅថ្ងៃអាទិត្យនេះបានឱ្យដឹងថា អ្នកសារព័ត៌មានជាតិ និងអន្តរជាតិ ដែលមានបំណងចង់ចុះយកព័ត៌មានអំពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ខាងមុខនេះ ត្រូវមានបណ្ណសម្គាល់ខ្លួន ជាអ្នកសារព័ត៌មានដែលចេញដោយ គ.ជ.ប។
សេចក្តីជូនដំណឹងដដែលបញ្ជាក់ថា ដើម្បីទទួលបានបណ្ណសម្គាល់ខ្លួន អ្នកសារព័ត៌មានត្រូវដាក់ពាក្យសុំចុះឈ្មោះជាអ្នកសារព័ត៌មានដែលផ្តល់ជូនដោយ គ.ជ.ប និងឥតគិតថ្លៃ ។ សម្រាប់អ្នកសារព័ត៌មានជាតិ ចាប់ផ្តើមទទួលពាក្យ និងចុះឈ្មោះចាប់ពីថ្ងៃទី១៥ ខែកុម្ភៈ រហូតដល់ថ្ងៃទី២៥ ខែឧសភា ឆ្នាំ២០២២។ ចំណែក អ្នកសារព័ត៌មានអន្តរជាតិ ចាប់ផ្តើមពីថ្ងៃទី១៥ ខែកុម្ភៈ រហូតដល់ថ្ងៃទី១ ខែមិថុនា ឆ្នាំ២០២២ ដោយភ្ជាប់លក្ខខណ្ឌមួយចំនួន។
យោងតាមប្រតិទិននេះ គ.ជ.ប បានកំណត់ការចុះបញ្ជីគណបក្សនយោបាយនិងដាក់បេក្ខជន នឹងប្រព្រឹត្តិទៅចាប់ពីថ្ងៃទី៣ ដល់ថ្ងៃទី៦ ខែ មីនា ឆ្នាំ២០២២។ ដោយឡែក ការបោះឆ្នោតជ្រើសរើសក្រុមប្រឹក្សាឃុំ-សង្កាត់នេះ នឹងត្រូវធ្វើឡើងនៅថ្ងៃអាទិត្យទី៥ ខែមិថុនា ឆ្នាំ២០២២៕