តំណាងគណបក្សនយោបាយមួយចំនួនដែលនៅក្រៅរដ្ឋាភិបាល បានចោទប្រកាន់អាជ្ញាធរមូលដ្ឋានមកពីគណបក្សកាន់អំណាចថា បានគំរាមកំហែងពួកគេនៅចំថ្ងៃនៃការដាក់បញ្ជីបេក្ខភាពមេឃុំ-ចៅសង្កាត់ ក្នុងរូបភាពនិងហេតុផលផ្សេងៗ ខណៈមន្រ្តីជាន់ខ្ពស់គណបក្សប្រជាជនកម្ពុជាជំរុញឱ្យបក្សនយោបាយដែលអះអាថាខ្លួនត្រូវរងភាពអយុត្តិធម៌ ប្ដឹងតវ៉ាប្រឆាំងការរុកកួនផ្នែកនយោបាយនេះ។
លោក យ៉ែម បុញ្ញឬទ្ធិ ប្រធានគណបក្សកម្ពុជានិយម ប្រាប់វីអូឌីនៅថ្ងៃទី៧ ខែមីនានេះថា មានបេក្ខជនដែលឈរឈ្មោះជាមេឃុំ-ចៅសង្កាត់ខ្លះរបស់គណបក្សថ្មីថ្មោងមួយនេះ បានបោះបង់សមរភូមិនយោបាយចោល ដោយសារពួកគេចាញ់សម្លុតនៃការគំរាមកំហែងនៅចំថ្ងៃនៃការដាក់បញ្ជីឈ្មោះ។ លោកបន្តថា ខេត្តដែលប្រឈមមុខខ្លាំងក្នុងចំណោមរាជធានី-ខេត្តទាំង១០ ដែលគណបក្សកម្ពុជានិយមចូលរួមក្នុងការបោះឆ្នោតឃុំ-សង្កាត់ មានខេត្តព្រៃវែង និងខេត្តព្រះសីហនុ។
បើតាមលោក យ៉ែម បុញ្ញឬទ្ធិ មានឃុំខ្លះត្រូវរកបេក្ខភាពមេឃុំ-ចៅសង្កាត់មកជំនួសបេក្ខភាពចាស់ដែលសុំលាឈប់ ព្រោះតែទទួលរងគំនាបពីអាជ្ញាធរមូលដ្ឋាន ខណៈដែលឃុំខ្លះទៀតត្រូវមានកិច្ចអន្តរាគមន៍ពីគណៈកម្មការរៀបចំការបោះឆ្នោតឃុំ-សង្កាត់។
លោកបន្តថា៖ «គណបក្សក្រៅរដ្ឋាភិបាលតែងតែរងទទួល គឺខាងបក្សកាន់អំណាចគាត់ពុំទទួលស្គាល់ការពិតនោះទេ។ ហើយរឿងគំរាមកំហែងដោយផ្ទាល់ឬដោយប្រយោលហ្នឹង គឺតែងមានហើយ»។
មិនខុសគ្នាទេ លោក ថាច់ សេដ្ឋា មន្រ្តីនាំពាក្យគណបក្សភ្លើងទៀន ក៏ឯកភាពដែរថា គណបក្សចាស់វស្សាមួយនេះក៏ទទួលរងការយាយីពីអាជ្ញាធរក្នុងមូលដ្ឋានដែលមកពីគណបក្សប្រជាជនកម្ពុជាដែរ នៅថ្ងៃនៃការដាក់បញ្ជីបេក្ខភាពមេឃុំចៅ-សង្កាត់ និងនៅមុនពេលយុទ្ធនាការនៃការឃោសនាស្វែងរកសំឡេងឆ្នោតមកដល់។ ប្រភពដដែលបន្តថា ការគំរាមកំហែងទៅលើបេក្ខជនមេឃុំ-ចៅសង្កាត់ដែលឈរឈ្មោះឱ្យគណបក្សភ្លើងទៀននេះ តាមរូបភាពផ្សេងៗ ដូចជា ឈប់ផ្ដល់អំណោយ បើមានទុក្ខធុរៈក្នុងមូលដ្ឋាននឹងមិនដោះស្រាយជូន និងមិនចេញបណ្ណគ្រួសារ ជាដើម។
លោកបន្តថា៖ «ជួបច្រើន! វាមិនមែនជាការងាយស្រួលប៉ុន្មានទេ។ ដាក់បញ្ជី ហើយទៅមានការគំរាមកំហែងឱ្យទៅដកឈ្មោះដកអីហ្នឹងស្អេកស្កះពាសពេញហ្នឹងទាំងអស់ ដល់អ៊ីចឹងធ្វើឱ្យយើងពិបាកក្នុងការរៀបចំបញ្ជីឈ្មោះ។ មានមេឃុំខ្លះយកហេតុផលនេះហេតុផលនោះ ទុកពេលនេះទុកពេលនោះអ៊ីចឹងទៅ ឱ្យយឺតឱ្យអីអ៊ីចឹងទៅ ខ្លះមិនបញ្ជាក់ ទាល់មានកិច្ចអន្តរាគមន៍ពីស្អ៊ីអ៊ីចឹងទៅ »។
បើតាមលោក ថាច់ សេដ្ឋា ថ្វីត្បិតគណបក្សភ្លើងទៀន មានធនធាននិងលទ្ធភាពក្នុងការរៀបចំបញ្ជីបេក្ខភាពមេឃុំចៅ-សង្កាត់បានគ្រប់ទាំង២៥ រាជធានី-ខេត្តមែន តែមានឃុំចំនួន៣ ក៏មិនបានដាក់បេក្ខភាពដែរ ក្នុងនោះ២ឃុំនៅខេត្តពោធិ៍សាត់ និង១ឃុំទៀត ខេត្តរតនគិរី។ លោកថា មូលហេតុដែលចន្លោះនេះ ដោយសារការរៀបចំបញ្ជីបេក្ខជនឈរឈ្មោះមិនទាន់ ខណៈតំបន់ទាំងនោះនៅឆ្ងាយផង។
ចំណែកអគ្គហេរញ្ញិកនៃគណបក្សខ្មែរស្រឡាញ់ជាតិ លោក សៀវ វីសុទ្ធ ក៏យល់ស្របដែរថា បញ្ហារើសអើងផ្នែកនយោបាយនេះ សម្រាប់គណបក្សដែលទើបតែកកើតថ្មីរបស់លោក ក៏រងការធ្វើទុក្ខបុកម្នេញណាស់ដែរ តាមរយៈការគំរាមកំហែងពីសំណាក់អាជ្ញាធរមូលដ្ឋានក្រោមរូបភាពផ្សេងៗ។ លោកបន្តថា គិតមកដល់ថ្ងៃនេះទៅហើយ បេក្ខភាពមេឃុំចៅ-សង្កាត់ស្ទើរតែ១៣រាជធានីខេត្តដែលឈរឈ្មោះឱ្យគណបក្សនេះ បានទំនាក់ទំនងសុំដកឈ្មោះចេញវិញ។
ឆ្លើយតបរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធថា គណបក្សមួយនេះមិនដែលទទួលបានព័ត៌មានស្តីពីការយាយីនេះនៅថ្នាក់មូលដ្ឋានទាល់តែសោះ។ លោកចំអកទៅគណបក្សនយោបាយនៅក្រៅរដ្ឋាភិបាលទាំងនោះ ថានេះជាយុទ្ធនាការនៃការបន្លឺសំឡេង ដើម្បីឱ្យឃើញរូបភាពនៃអំពើហិង្សាកាន់តែធំប៉ុណ្ណោះ។
ទោះយ៉ាងណា លោកលើកទឹកចិត្តឱ្យបក្សនយោបាយទាំងនោះប្ដឹងតវ៉ា បើពិតជាមានសកម្មភាពបែបនេះមែន ជាពិសេសគួរបង្ហាញភស្តុតាងឱ្យបានត្រឹមត្រូវ ជាជាងគ្រាន់តែស្រែកបន្ទរឱ្យតែបានឮប៉ុណ្ណោះ។
លោកបន្តថា៖ «គណបក្សនយោបាយ ឬក៏ប្រជាពលរដ្ឋ ឬគណបក្សនយោបាយដែលរងការបំភិតបំភ័យហ្នឹង គួរមានជាការផ្ដល់ជាព័ត៌មានទៅស្ថាប័នរបស់ខ្លួន ឬក៏គណបក្សរបស់ខ្លួន ធ្វើម៉េចឱ្យមានចំណាត់ការ ឬក៏មានដំណោះស្រាយពីស្ថាប័ន អ្នកដែលមានការបំភិតបំភ័យហ្នឹង»។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា បញ្ជាក់ថា ការបោះឆ្នោតឃុំ-សង្កាត់ សម្រាប់នីតិកាលទី៥នេះ មានគណបក្សនយោបាយចំនួន១៧ បានដាក់បញ្ជីបេក្ខភាពមេឃុំ-ចៅសង្កាត់ បម្រើឱ្យការបោះឆ្នោតឆ្នាំ២០២២។ ក្រសួងមហាផ្ទៃ បានបង្ហាញថា បច្ចុប្បន្នគណបក្សនយោបាយដែលបានចុះបញ្ជីនៅក្រសួងមហាផ្ទៃមានប្រមាណ៤៥គណបក្សនយោបាយ។
អ្នកសម្របសម្រួលផ្នែកអង្កេតជាន់ខ្ពស់ និងតស៊ូមតិនៃអង្គការខុមហ្រ្វែល លោក កន សាវាង្ស យល់ឃើញថា នៅពេលនេះ គេមិនទាន់អាចវាយតម្លៃបានពីដំណើការនៃការបោះឆ្នោតនេះថាប្រព្រឹត្តទៅដោយសេរី ត្រឹមត្រូវ និងយុត្តិធម៌នៅឡើយទេ។ បើទោះជាបែបណា លោកជំរុញឱ្យអ្នកដែលរងការគំរាមកំហែង ត្រូវចេះហ៊ានប្រើប្រាស់សិទ្ធិដែលស្របទៅនឹងច្បាប់ ដាក់បណ្ដឹងតវ៉ាប្រឆាំងការយាយី ដើម្បីរកដំណោះស្រាយ។
បើតាមលោក កន សាង្ស មូលហេតុដែលកម្ពុជានៅតែរកឃើញពីកំហុសដែលកើតឡើងច្រំដែលៗទាក់ទិនការបោះឆ្នោតនេះ នោះក៏ព្រោះតែអ្នកអនុវត្តច្បាប់ចេះតែបំពានលើគោលការណ៍និងនីតិវិធីនានាដែលមានជាធរមាន។ មិនតែប៉ុណ្ណោះ ភាគីដែលត្រួតពិនិត្យនិងលើកកម្ពស់ក្នុងការអនុវត្តច្បាប់ ជាពិសេសរដ្ឋសភា ហាក់នៅមិនទាន់បានប្រើប្រាស់តួនាទីរបស់ខ្លួនឱ្យមានប្រសិទ្ធភាព ដើម្បីជំរុញឱ្យភាគីពាក់ព័ន្ធគោរពច្បាប់នេះនៅឡើយដែរ៕