ប្រធានគណបក្សកម្ពុជានិយមប្រចាំខេត្តព្រៃវែង ចោទប្រកាន់ថា មានបេក្ខជនដែលឈរឈ្មោះឱ្យគណបក្សក្រៅរដ្ឋាភិបាលមួយនេះមួយចំនួនសម្រេចចិត្តបោះបង់ការឈរឈ្មោះជាមេឃុំចៅ-សង្កាត់ ក្រោយមានការគំរាមកំហែងនិងធ្វើទុក្ខបុកម្នេញផ្នែកនយោបាយ នៅអំឡុងពេលនៃការដាក់បញ្ជីបេក្ខភាព ដើម្បីត្រៀមចូលរួមការប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ នាពេលខាងមុខ។
ការប្ដឹងសុំដកឈ្មោះចេញពីបញ្ជីបេក្ខភាពជាមេឃុំ-ចៅសង្កាត់នេះ គឺជាសមាជិកនៃគណបក្សកម្ពុជានិយម។ បេក្ខភាពដែលឈរឈ្មោះឱ្យគណបក្សកម្ពុជានិយម បញ្ជាក់ជំហរថា មូលហេតុដែលខ្លួនសុំដកឈ្មោះចេញវិញនេះ ដោយសារមិនចង់ចូលរួមប្រកួតប្រជែង។
ដោយឡែក មេឃុំកន្សោមអក អ្នកស្រី ហេង ពៅ បញ្ជាក់ថា អ្នកដែលប្ដឹងសុំដកឈ្មោះចេញវិញនេះ មិនមែនបក្សនយោបាយផ្សេងញុះញង់ ឬដោយសារការគំរាមកំហែងពីអាជ្ញាធរទេ តែជាការសម្រេចចិត្តរបស់ពួកគេតែម្ដង។
ផ្ទុយពីការអះអាងនេះ ប្រធានគណបក្សកម្ពុជានិយមប្រចាំខេត្តព្រៃវែង លោក ស៊ុំ ជុន ប្រាប់ វីអូឌី នៅថ្ងៃព្រហស្បតិ៍នេះថា ការស្នើសុំលុបឈ្មោះវិញនេះ ដោយសារតែក្នុងចំណោមពួកគេត្រូវបានគណបក្សកាន់អំណាចអូសទាញតាមរយៈការទិញទឹកចិត្ត សម្លុតគំរាមកំហែង និងធ្វើទុក្ខបុកម្នេញ។
លោកបន្តថា៖ «ខ្ញុំចូលទៅផ្ទះពួកគាត់ ស្រាប់តែមានមេភូមិ មេស្អី មេប្រជាការពារ ឬមេប្រឹក្សាអី គេមកអ៊ីចឹងទៅ! ខ្ញុំចូលផ្ទះណា ហើយជ្រើសរើសឈ្មោះហ្នឹង គេមកទាក់ទងយកទៅតែម្ដង»។
បើតាមលោក ស៊ុំ ជុន បេក្ខជនដែលឈរឈ្មោះជាមេឃុំចៅ-សង្កាត់របស់គណបក្សកម្ពុជានិយម ហើយសុំដកឈ្មោះចេញវិញ ព្រោះតែហេតុផលនយោបាយ រួមមាន លោក ឥត អ៊ាន មកពីភូមិព្រៃអណ្ដូង ឈរលេខរៀងទី៧, លោក ទៀប សាវ៉ុន នៅភូមិតាទាំង ឈរលេខរៀងទី៤, លោក ចាន់ រិទ្ធ ឈរលេខរៀងទី១០, លោក ឈិត ម៉ៅ ឈរលេខរៀងទី១៩ និងលោក សែម សុជា ឈរលេខរៀងទី៥ ដែលអ្នកទាំងបីរូបនេះមកពីភូមិជ្រួល រួមទាំងលោក ឌុក សេង នៅភូមិត្រពាំងរុន ឈរលេខរៀងទី៣។ បេក្ខជនទាំង៦រូបនេះ រស់នៅក្នុងឃុំកន្សោមអក ស្រុកកំពង់ត្របែក ខេត្តព្រៃវែង។
ជុំវិញបញ្ហានេះ កាលពីថ្ងៃទី៩ ខែមីនា មេឃុំស្ដីទីនៃឃុំកន្សោមអក លោក វ៉ា សារឿន បានចេញលិខិតអញ្ជើញតំណាងគណបក្សកម្ពុជានិយមប្រចាំខេត្តព្រៃវែង លោក ថោ ចន្ធី និងលោក ស៊ុំ ជុន ឱ្យចូលខ្លួនដោះស្រាយបណ្ដឹង ដែលប្រជាពលរដ្ឋប្ដឹងសុំដកឈ្មោះចេញពីបញ្ជីបេក្ខជនឈរឈ្មោះ បម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់វិញ។
បន្ថែមលើសេចក្ដីជូនដំណឹងនេះ មេឃុំកន្សោមអក អ្នកស្រី ហេង ពៅ បានប្រាប់ វីអូឌី ថា ការដែលអាជ្ញាធរខេត្តចេញលិខិតកោះហៅឱ្យតំណាងគណបក្សនយោបាយទាំងពីររូបចូលខ្លួនមកសាលាឃុំនោះ មិនមែនជាការគាបសង្កត់ ឬគំរាមកំហែងផ្នែកនយោបាយទេ។
អ្នកស្រីបន្តថា ផ្ទុយទៅវិញ នេះគ្រាន់ជាតែជាការជួយសម្របសម្រួល ដោយសារពលរដ្ឋប្ដឹងត្រង់មកសាលាឃុំតែប៉ុណ្ណោះ។ បើតាមអ្នកស្រី ហេង ពៅ ប្រសិនបើការសម្របសម្រួលនេះមិនត្រូវរ៉ូវគ្នា ក្នុងនាមអាជ្ញាធរឃុំ នឹងបញ្ជូនវិវាទនេះបន្តទៅគណៈកម្មាធិការឃុំសង្កាត់រៀបចំការបោះឆ្នោតបន្តទៀត។
លោកបន្តថា៖ «បើថាឱ្យខ្ញុំទៅគាបសង្កត់គេហ្នឹង អត់មានទេ សួរតែអ្នកស្រុកខ្ញុំទៅ។ ខ្ញុំអត់មានទេ គណបក្សហ្នឹងក៏ស្ដីនិយាយរកខ្ញុំ សើចលេង និងហូបចុកជាមួយខ្ញុំជាធម្មតាហ្នឹង។ តែបើថាឱ្យខ្ញុំទៅគាបសង្កត់ ឬប្ដឹងផ្ដល់គេអញ្ចេះអញ្ចុះអី គឺខ្ញុំអត់មានទេ»។
មេឃុំកន្សោមអក ឱ្យដឹងថា មានពលរដ្ឋចំនួន៦នាក់ ក្នុងចំណោម១២នាក់ ដែលបានប្ដឹងសុំដកឈ្មោះចេញពីបញ្ជីបេក្ខជនមេឃុំ-ចៅសង្កាត់របស់គណបក្សកម្ពុជានិយម។ ចំណែក៦នាក់ផ្សេងទៀតដែលបានដាក់ពាក្យដកឈ្មោះចេញដែរនោះ បន្តរក្សាភាពស្ងៀមស្ងាត់នៅឡើយ។
បេក្ខភាពដែលឈរជាមេឃុំរបស់គណបក្សកម្ពុជានិយម មកពីភូមិអណ្ដូងព្រៃ ដែលឈរក្នុងលេខរៀងទី៧ គឺលោក ឥត អ៊ាន បដិសេធនឹងការលើកឡើងថា ការសុំដកឈ្មោះចេញពីបញ្ជីបេក្ខភាពនេះ ព្រោះតែហេតុផលនយោបាយ។ លោកបន្តថា តាមពិតទៅ រូបលោកពុំមានអ្នកណាគេគំរាមកំហែង ឬទិញទឹកចិត្តអ្វីនោះទេ។ ប៉ុន្តែមូលហេតុដែលខ្លួនសុំដកឈ្មោះចេញពីបញ្ជីបេក្ខភាពជាមេឃុំរបស់គណបក្សកម្ពុជានិយមវិញនេះ ព្រោះតែមិនចង់ចូលរួមការប្រកួតតែប៉ុណ្ណោះ។
លោកបន្តថា៖ «អត់មានទេបង អត់មានពីណាទិញទឹកចិត្តយើងទេ។ នេះជារឿងរបស់យើង និងការសម្រេចចិត្តរបស់យើងទេ»។
ក្រៅពីបេក្ខភាពរូបនេះ មនុស្ស៥នាក់ផ្សេងទៀតដែលឈរឈ្មោះឱ្យគណបក្សកម្ពុជានិយម បានបដិសេធក្នុងការអត្ថាធិប្បាយ។
បើទោះជាបែបណា ប្រធានគណបក្សកម្ពុជានិយមប្រចាំខេត្តព្រៃវែង លោក ស៊ុំ ជុន អះអាងថា តាមពិតទៅ ការសុំលាឈប់ការឈរឈ្មោះនេះ វាទាក់ទិននឹងការយាយី និងធ្វើទុក្ខបុកម្នេញពីអាជ្ញាធររបស់គណបក្សប្រជាជនកម្ពុជា រួមទាំងនគរបាលប៉ុស្តិ៍ផង។ លោកបន្តថា ពួកគេមិនហ៊ានប្រាប់ការពិតទេ ព្រោះតែព្រួយបារម្ភពីសុវត្ថិភាព ប៉ុន្តែធ្លាប់បានបញ្ជក់ថាមានគេតាមរំខានជានិច្ច ក្រោយពីដាក់បញ្ជីឈ្មោះចូលទៅគណៈកម្មាធិការឃុំសង្កាត់ រៀបចំការបោះឆ្នោតរួចមក។
លោកបន្តថា៖ «ជាទឹកចិត្តគាត់ គាត់មិនចង់ទេ ប៉ុន្តែវាមានមូលហេតុអ្វីមួយដែលគាត់ប្រាប់យើងមិនចំ អាហ្នឹងអ៊ីចឹង។ អូ! ទី១ គាត់ថាមួយថ្ងៃៗ គេមកក្រវែលផ្ទះខ្ញុំ។ ទី២ តេរហូត រកពេលដេកពួនមិនបាន»។
យ៉ាងនេះក្ដី អធិការរងស្រុកកំពង់ត្របែក ខេត្តព្រៃវែង លោក ជន សារិទ្ធ បានបដិសេធក្នុងការផ្ដល់ការអត្ថាធិប្បាយ នៅពេលសួរនាំអំពីការចោទប្រកាន់ថាបានរួមចំណែកក្នុងអំពើគំរាមកំហែងប្រឆាំងគណបក្សក្រៅរដ្ឋាភិបាល ក្នុងចំណោមអាជ្ញាធរឃុំផ្សេងទៀត នៅថ្ងៃព្រហស្បតិ៍នេះ។
ប្រធានគណៈកម្មាធិការឃុំសង្កាត់រៀបចំការបោះឆ្នោត ប្រចាំខេត្តព្រៃវែង លោក ពុត គីម អះអាងថា លោកបានស្រង់ចម្លើយសារភាពរួចរាល់អស់ហើយពីបេក្ខភាពដែលសុំដកឈ្មោះចេញវិញនេះ។ បើតាមលោក ពុត គីម មានចម្លើយសារភាពខ្លះ តាមរយៈការសម្របសម្រួលចុងក្រោយនេះ រកឃើញថា ការសុំលាឈប់និងដកឈ្មោះចេញវិញនេះ ព្រោះតែហេតុផលនយោបាយ និងការព្រួយបារម្ភពីសុវត្ថិភាពប្រាកដមែន។
លោកបន្តថា៖ «ខ្ញុំកំពុងតែសម្របសម្រួល និងកំពុងតែណែនាំសាកសួរហ្នឹង ហើយខ្ញុំកំពុងសាកសួរអំពីរឿងផ្លូវច្បាប់ ហេតុអីបានជាមានឈ្មោះមកដាក់អីហ្នឹង ឬយើងស្ម័គ្រចិត្តជំនួសគេយ៉ាងម៉េចៗអីចឹងទៅ។ គាត់ឆ្លើយប្រាប់ខ្ញុំអស់ហើយ។ ខ្ញុំចុះក្នុងកំណត់ហេតុសាកសួររបស់ខ្ញុំអស់ហើយ។ អាហ្នឹងគេឆ្លើយថា សុទ្ធតែមានគេអូសទាញមកបក្សនេះបក្សនោះ នៅក្នុងកំណត់ហេតុខ្ញុំមានអស់ហើយ »។
ប្រធានគណៈកម្មាធិការឃុំសង្កាត់រៀបចំការបោះឆ្នោត លោក ពុត គីម ថ្លែងថា លោកបានផ្ដល់ដំណឹងនេះទៅតំណាងគណបក្សកម្ពុជានិយមរួចហើយ ដើម្បីឱ្យរកអ្នកថ្មីជំនួស ដោយសារថ្ងៃនេះគឺជាថ្ងៃចុងក្រោយនៃការផ្ដល់សុពលភាពទៅលើបញ្ជីបេក្ខភាពដែលឈរឈ្មោះសម្រាប់ការបោះឆ្នោតឃុំ-សង្កាត់។
ច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ ស្ដីពីការចុះបញ្ជីបេក្ខជននៃគណបក្សនយោបាយប្រការ ៦.៥ ត្រង់កឋាខណ្ឌទី៣ ចែងថា បេក្ខជនម្នាក់ៗត្រូវមានឈ្មោះក្នុងបញ្ជីបេក្ខជននៃគណបក្សនយោបាយតែមួយប៉ុណ្ណោះ។ បេក្ខជនម្នាក់ៗមិនត្រូវបានអនុញ្ញាតឱ្យលាឈប់ពីបេក្ខភាព មុនបញ្ជីបេក្ខជនផ្លូវការត្រូវបានសម្រេចឡើយ៕
