សមត្ថកិច្ចខេត្តពោធិ៍សាត់ បានបញ្ជូនបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់មកពីគណបក្សភ្លើងទៀនចំនួន២រូបទៅតុលាការ នៅថ្ងៃចន្ទនេះ ពាក់ព័ន្ធនឹងករណីក្លែងបន្លំស្នាមមេដៃនិងហត្ថលេខាលើឯកសារសម្រាប់ចុះឈ្មោះបេក្ខភាពឈរឈ្មោះបោះឆ្នោត។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍ថា រយៈពេលជិត១សប្ដាហ៍នេះ អាជ្ញាធរខេត្តពោធិ៍សាត់បានចាប់ខ្លួនបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់គណបក្សភ្លើងទៀន នៅឃុំអន្សាចំបក់ ស្ថិតក្នុងស្រុកក្រគរ លោក អ៊ុក សាវារិន និងបេក្ខជនឈរឈ្មោះបោះឆ្នោតក្រុមប្រឹក្សាឃុំ ឃុំស្រែស្ដុក ស្រុកកណ្ដៀង ខេត្តពោធិ៍សាត់ លោក ឈូច ឈឿន បញ្ជូនទៅស្នងការដ្ឋាននគរបាលខេត្ត ដោយចោទពីបទ «ក្លែងបន្លំឯកសារ»។
លោក ថាច់ សេដ្ឋា បញ្ជាក់ថា ក្រោយពីសមត្ថកិច្ចឃាត់ខ្លួនសួរនាំរួច ក៏បញ្ជូនអ្នកទាំង២រូបនោះទៅតុលាការនាព្រឹកថ្ងៃចន្ទនេះ។ លោកចាត់ទុកការបញ្ជូនពួកគេទាំងពីរនាក់ទៅតុលាការ ថាជាការគំរាមកំហែងផ្នែកនយោបាយ មិនមែនរឿងក្លែងបន្លំឯកសារដូចអាជ្ញាធរចោទប្រកាន់នោះទេ។
លោកមានប្រសាសន៍ថា៖ «ទៅចាប់គ្នាទៅដាក់គុក វាមិនត្រឹមត្រូវ! ហើយវាផ្ដើមចេញមកពីរឿងគំរាមកំហែង [ផ្នែកនយោបាយ] ឬការបោះឆ្នោតក្នុងឃុំសង្កាត់ ដែលពួកគាត់ឈរលំដាប់លេខមួយទាំងអស់ហ្នឹង»។
វីអូឌី មិនអាចសុំការបញ្ជាក់ពីស្នងការនគរបាលខេត្តពោធិ៍សាត់ លោក ស ថេង បានទេ នៅរសៀលថ្ងៃចន្ទនេះ។
អ្នកនាំពាក្យសាលាដំបូងខេត្តពោធិ៍សាត់ លោកស្រី ផាន់ សុគន្ធថង មានប្រសាសន៍ថា លោកស្រីទើបតែទទួលបានសំណុំរឿងចោទប្រកាន់លើបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់គណបក្សភ្លើងទៀន នៅឃុំអន្សាចំបក់ ខណៈសំណុំរឿងបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់ នៅឃុំស្រែស្ដុក លោក ឈូច ឈឿន នៅមិនទាន់ទទួលបានព័ត៌មាននៅឡើយ។
លោកស្រីបញ្ជាក់ថា សំណុំរឿងលោក អ៊ុក សាវារិន ត្រូវបានតុលាការសម្រេចចោទប្រកាន់ពីបទ «កន្លែងបន្លំឯកសារ» និងបានឃុំខ្លួនបណ្ដោះអាសន្ននៅពន្ធនាគារ។
លោកស្រីមានប្រសាសន៍ថា៖ «ចោទប្រកាន់ទៅបាត់ហើយ ឈ្មោះ អ៊ុក សាវារិន ព្រះរាជអាជ្ញាដែលកាន់សំណុំរឿងហ្នឹងសម្រេចចោទប្រកាន់ពីបទក្លែងបន្លំឯកសារសាធារណៈ»។
មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស ពន្យល់ថា តាមនីតិវិធីច្បាប់បោះឆ្នោត នៅក្នុងដំណាក់កាលនៃការចុះឈ្មោះដាក់បេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់ បើសិនជារកឃើញថាបេក្ខជនណាមួយបន្លំឯកសារឬធ្វើខុសនីតិវិធី នោះមន្ត្រី គ.ជ.ប ជាអ្នកទទួលបន្ទុកពិនិត្យនិងសម្រេចឱ្យកែតម្រូវតែប៉ុណ្ណោះ ដោយមិនមានច្បាប់ចែងដាក់ទោសផ្នែកព្រហ្មទណ្ឌនោះទេ។
លោកមានប្រសាសន៍ថា៖ «នៅក្នុងដំណាក់កាលចុះឈ្មោះបោះឆ្នោត រាល់ឯកសារទាំងឡាយដែលមិនត្រឹមត្រូវ ហើយមានការតវ៉ាផ្សេងៗ វាស្ថិតនៅក្រោមសមត្ថកិច្ចរបស់ស្ថាប័ន គ.ជ.ប ជាអ្នកដោះស្រាយ មិនស្ថិតនៅក្នុងប្រព័ន្ធតុលាការយកទៅដោះស្រាយទេ លើកលែងករណីផ្សេង ក្រៅពីដំណើរការចុះឈ្មោះ ឬឯកសារក្រៅពីដាក់មកចុះឈ្មោះបោះឆ្នោត»។
លោកបន្ថែមថា៖ «អ៊ីចឹងនៅក្នុងដំណើរការប្ដឹងតវ៉ាស្ថិតនៅក្នុងសមត្ថកិច្ចស្ថាប័ន គ.ជ.ប។ នៅក្នុងឯកសារឃុំសង្កាត់មើលឃើញថា វាមិនត្រឹមត្រូវ អ៊ីចឹងគណៈកម្មការឃុំសង្កាត់រៀបចំការបោះឆ្នោតមានតួនាទីនិងភារកិច្ចសម្រាប់ឱ្យបេក្ខជននៃគណបក្សនយោបាយក្នុងឃុំសង្កាត់ កែតម្រូវ! ហើយបើកែតម្រូវមិនពេញលេញទេ មានន័យថា គណៈកម្មការឃុំសង្កាត់រៀបចំការបោះឆ្នោត មានតួនាទីនិងភារកិច្ចក្នុងការបដិសេធមិនទទួលឱ្យមានការចុះឈ្មោះរបស់បេក្ខជនហ្នឹងទេ មិនមាននីតិវិធីណាបង្ហាញថាមិនត្រឹមត្រូវ ឱ្យសមត្ថកិច្ចប្ដឹងពីបទក្លែងបន្លំឯកសារ មិនមានទេ»។
យោងតាមប្រតិទិនដែលចេញដោយ គ.ជ.ប បញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នេះ នឹងធ្វើឡើងនៅថ្ងៃអាទិត្យ ទី៥ ខែមិថុនា ឆ្នាំ២០២២៕
