គណៈកម្មាធិការជាតិរៀបចំការបោះឆ្នោត (គ.ជ.ប) សម្រេចឱ្យអគ្គលេខាធិការដ្ឋានរបស់ស្ថាប័នមួយនេះ អនុវត្តលើឯកសារផ្លូវច្បាប់មួយចំនួន សម្រាប់ប្រើប្រាស់ផ្សព្វផ្សាយដែលបម្រើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់ នីតិកាលទី៥ នាងពេលខាងមុខនេះ។
សេចក្ដីប្រកាសព័ត៌មានរបស់ គ.ជ.ប ចុះថ្ងៃទី២៣ ខែមីនា បានលើកឡើងថា គ.ជ.ប សម្រេចឱ្យអគ្គលេខាធិការដ្ឋាន គ.ជ.ប ដែលជាអង្គភាពជំនាញ កែសម្រួលខ្លឹមសារមួយចំនួនឡើងវិញ ដោយផ្អែកលើស្មារតីនៃកិច្ចប្រជុំកន្លងទៅ ហើយដាក់ឱ្យអនុវត្តនិងផ្សព្វផ្សាយរាល់ឯកសារនិងខ្លឹមសារទាំងនោះ សម្រាប់ដំណើរការបោះឆ្នោតឃុំសង្កាត់ខាងមុខនេះ។
ប្រភពដដែលបន្តថា ឯកសារដែល គ.ជ.ប យល់ព្រមដាក់ឱ្យប្រើប្រាស់ក្នុងដំណើរការបោះឆ្នោតសម្រាប់អាណត្តិទី៥នេះ មានដូចជា ខិត្តបណ្ណផ្សព្វផ្សាយដែលជាព្រះរាជសាររបស់ព្រះករុណា ព្រះបាទសម្តេច ព្រះនរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសេចក្ដីអំពាវនាវនានារបស់ គ.ជ.ប។
ក្រៅពីនេះ នៅមានឯកសារផ្សព្វផ្សាយអប់រំផ្សេងទៀត រួមមាន ខ្លឹមសារ Poster ដែលជាគំរូឯកសារផ្លូវការប្រើប្រាស់សម្រាប់ការបោះឆ្នោត, ខ្លឹមសារ Poster ដែលជាគំរូសន្លឹកឆ្នោតមិនបានការ, ខ្លឹមសារខិត្តប័ណ្ណស្ដីពីការបោះឆ្នោតដោយសម្ងាត់ សេរី យុត្តិធម៌ និងតម្លាភាព, ខ្លឹមសារស្ប៉តអប់រំសម្រាប់ការផ្សព្វផ្សាយតាមវិទ្យុ ស្ប៉តវីដេអូ និងចម្រៀងកាយវិការសម្រាប់ផ្សាយតាមទូរទស្សន៍។
បើតាមសេចក្ដីប្រកាសព័ត៌មានដដែលនេះ ស្ថាប័នជាតិរៀបចំការបោះឆ្នោត ក៏សម្រេចយល់ព្រមទៅលើគោលការណ៍ស្ដីពីការបង្កើតគណៈកម្មការសម្របសម្រួលកម្មវិធីផ្សព្វផ្សាយអប់រំអ្នកបោះឆ្នោត ផ្សព្វផ្សាយអំពីគោលនយោបាយ និងកម្មវិធីនយោបាយរបស់គណបក្សនយោបាយ។ បន្ថែមពីលើនេះទៀត គ.ជ.ប ក៏បានសម្រេចទៅលើគោលការណ៍កំណត់កាលបរិច្ឆេទនៃការចេញឯកសារបញ្ជាក់អត្តសញ្ញាណបម្រើឱ្យការបោះឆ្នោត និងឯកភាពទៅលើប្រតិទិន ព្រមទាំងផែនការមេនៃការពិនិត្យបញ្ជីឈ្មោះនិងការចុះឈ្មោះបោះឆ្នោត ឆ្នាំ២០២២៕
