ក្រសួងបរិស្ថាន មូលនិធិសកលដើម្បីអភិរក្សធនធានធម្មជាតិ (WWF) និងអង្គការដៃគូ គ្រោងធ្វើយុទ្ធនាការអន្ទាក់សូន្យក្នុងតំបន់ការពារធម្មជាតិ នៅតាមបណ្តាខេត្តភាគខាងកើតទន្លេមេគង្គ នាសប្តាហ៍ក្រោយ។
យោងតាមហ្វេសប៊ុករបស់ក្រសួងបរិស្ថាន នៅថ្ងៃពុធនេះ បានឱ្យដឹងថា យុទ្ធនាការអន្ទាក់សូន្យ ដែលគ្រោងធ្វើនៅខេត្តស្ទឹងត្រែង នឹងប្រព្រឹត្តទៅនៅថ្ងៃទី ៧ ខែមេសា ឆ្នាំ២០២២ ក្នុងក្របខណ្ឌនៃយុទ្ធនាការអន្ទាក់សូន្យក្នុងតំបន់ការពារធម្មជាតិរយៈពេល៦ខែ។
តែយ៉ាងណា ក្រសួងថា ការចាប់ផ្តើមជាផ្លូវការ នឹងធ្វើនៅថ្ងៃទី៣ ខែមីនា ឆ្នាំ២០២២ នៅតាមបណ្តាខេត្តនានា នាភាគខាងកើតទន្លេមេគង្គ រួមមានខេត្តស្ទឹងត្រែង ក្រចេះ មណ្ឌលគិរី រតនគិរី ព្រះវិហារ និងកំពង់ធំ។
ក្រសួងបានគូសបញ្ជាក់ថា៖ «អន្ទាក់មានច្រើនប្រភេទដែលបង្កមហន្តរាយចំពោះជីវិតសត្វព្រៃ និងធ្វើឱ្យមានគ្រោះថ្នាក់ដល់មនុស្ស»។
ក្នុងសន្និសីទសារព័ត៌មានឆ្ពោះទៅបើកយុទ្ធនាការ «អន្ទាក់សូន្យនៅក្នុងតំបន់ការពារធម្មជាតិកម្ពុជា» នាថ្ងៃទី០២ ខែមីនា កន្លងនេះ រដ្ឋលេខាធិការក្រសួងបរិស្ថាន និងជាអ្នកនាំពាក្យ លោក នេត្រ ភក្ត្រា បានថ្លែងថា ការបើកយុទ្ធនាការអន្ទាក់សូន្យ នៅថ្ងៃទី៣ ខែមីនា ធ្វើឡើងស្របពេលដែលពិភពលោកប្រារព្ធទិវាសត្វព្រៃពិភពលោក។
លោកបន្តថា គោលបំណងសំខាន់នៃការធ្វើយុទ្ធនាការនោះ រួមមាន ការផ្សព្វផ្សាយអប់រំ អំពី ផលប៉ះពាល់ដោយសារអន្ទាក់ទៅលើជីវិតសត្វ និងជីវិតមនុស្ស ពង្រឹងការអនុវត្តច្បាប់ ការផ្លាស់ប្តូរឥរិយាបថពលរដ្ឋឱ្យបង្កើនការប្រតិបត្តិមេត្រីបរិស្ថាន ស្រឡាញ់សត្វព្រៃជីវៈចម្រុះ លុបបំបាត់ការបរបាញ់សត្វ ការដាក់អន្ទាក់ខុសច្បាប់ និងការលុបបំបាត់ការជួញដូរសាច់សត្វព្រៃ ក៏ដូចជាបង្កើនសុវត្ថិភាពដល់សត្វព្រៃគ្រប់ប្រភេទ។
បើតាមលោក នេត្រ ភក្ត្រា បរិមាណអន្ទាក់ដែលបានដោះពីតំបន់ការពារធម្មជាតិនៅឆ្នាំ២០២១ មានចំនួន ៦១ ៦១៤អន្ទាក់ កើនឡើងប្រមាណ២០% បើធៀបនឹង២០២០ដែលដោះបាន ៤៣ ២៧០អន្ទាក់ ខណៈប្រភេទអន្ទាក់ទាំងនោះ បានគម្រាមកំហែងសត្វព្រៃតូចធំជាច្រើនប្រភេទ៕
