គណបក្សនយោបាយមួយចំនួន ដែលបានចុះឈ្មោះក្នុងការចូលរួមប្រកួតប្រជែងសម្រាប់ការបោះឆ្នោត ជ្រើសរើសក្រុមប្រឹក្សាឃុំសង្កាត់ បានដាក់ចេញនូវផែនការយុទ្ធសាស្រ្ត និងកម្មវិធីនយោបាយរបស់ខ្លួនរួចរាល់ហើយ ដើម្បីត្រៀមយកអាសនៈឃុំសង្កាត់ នាពេលខាងមុខនេះ។
គណៈកម្មាធិការជាតិរៀបចំការបោះឆ្នោត បង្ហាញថា គណបក្សនយោបាយ ដែលបានចុះបញ្ជី និងទទួលស្គាល់ផ្លូវការដោយ គ.ជ.ប សម្រាប់ការប្រកួតប្រជែងក្នុងការបោះឆ្នោតឃុំសង្កាត់ អាណត្តិទី៥នេះ មាន១៧គណបក្ស។
អ្នកនាំពាក្យគណបក្សហ្វ៊ុនស៊ិនប៉ិច លោក ញឿន រ៉ាដែន អះអាងថា សម្រាប់គណបក្សរាជានិយមមួយនេះ បានត្រៀមលក្ខណៈសម្បត្តិរួចរាល់ហើយ សម្រាប់ចូលប្រកួតក្នុងការបោះឆ្នោតនេះ។ លោកបន្តថា កម្មវិធីនយោបាយដែលគណបក្សចាស់វស្សាមួយនេះ យល់ឃើញថា ជាកម្មវិធីស្នូលនោះ គឺសេវាសាធារណៈ និងផ្តល់ប័ណ្ណក្រីក្រសម្រាប់ពលរដ្ឋទូទៅ ក្នុងចំណោមកម្មវិធីនយោបាយ អាទិភាពផ្សេងទៀត។
លោកបន្តថា៖ «យើងនឹងព្យាយាមដោះស្រាយជូនប្រជារាស្រ្តជាពិសេសផ្តល់សេវាសាធារណៈ និងការផ្តល់នូវប័ណ្ណក្រក្រី ដោយមិនប្រកាន់និន្នាការនយោបាយ។ ជាងនេះទៀតគឺយើងផ្តោតទៅលើបញ្ហាអនាម័យនៅក្នុងមូលដ្ឋាន និងដោះស្រាយក្តីកង្វល់របស់ប្រជារាស្រ្ត រួមទាំងប្រាក់បំណុល និងប្រាក់ដើមទុនជាដើម»។
ដោយឡែក សម្រាប់គណបក្សកម្ពុជានិយម គឺមានកម្មវិធីនយោបាយចំនួន ៦ចំណុច ដើម្បីត្រៀមជ្រើសរើសយកទៅប្រកួតប្រជែងសម្រាប់ការបោះឆ្នោត ឃុំសង្កាត់ខាងមុខនេះ។
លោក យ៉ែម បុញ្ញឬទ្ធិ ប្រធានគណបក្សដែលទើបតែកកើតថ្មីនេះ ឱ្យដឹងថា ថ្វីត្បិតគណបក្សរបស់លោក ទើបតែប្រសូត្រក្នុងរយៈពេលដ៏ខ្លីមែន តែគណបក្សនេះមានកម្មវិធីនយោបាយដ៏មុតស្រួច ធ្វើយ៉ាងណាត្រូវឆ្លើយតបទៅនឹងតម្រូវការជាក់ស្តែងរបស់ពលរដ្ឋនៅក្នុងមូលដ្ឋាន។
បើតាមលោក យ៉ែម បុញ្ញឬទ្ធិ កម្មវិធីនយោបាយ ដែលគណបក្សថ្មីថ្មោងមួយនេះ នៅតែមើលឃើញដែរនោះគឺបញ្ហាសេវាសាធារណៈ អំពើពុករលួយ និងបញ្ហាដីធ្លីជាដើម។
លោកបន្តថា៖ «គោលនយោបាយដែលសំខាន់ដែលជាអាទិភាពខ្ពស់ជាងគេ គឺពាក់ព័ន្ធជាមួយនិងសេវាសាធារណៈនេះតែម្តង ពីព្រោះរឿងនេះជារឿងដដែលហើយជាច្រើនឆ្នាំណាស់មកហើយ ដែលប្រជាពលរដ្ឋនៅតែជួបប្រទះ ដែលយើងឱ្យឈ្មោះថាភាពអសកម្ម និងភាពយឺតយ៉ាវ នេះជាចំណុចទី១។ ចំណុចទី២ គឺភាពរើសអើង ហើយចំណុចទី៣ មិនស្អាតស្អំ មានការគុបគិតប្រព្រឹត្តអំពើពុករលួយជាដើម មុននឹងទទួលបានឯកសារអ្វីមួយ»។
ស្ថាប័នជាតិរៀបចំការបោះឆ្នោត(គ.ជ.ប) បង្ហាញថា មានគណបក្សនយោបាយចំនួន៤ ដូចជាគណបក្សប្រជាជនកម្ពុជា គណបក្សភ្លើងទៀន គណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ដែលបានដាក់ពង្រាយបេក្ខជន បានគ្រប់២៥រាជធានីខេត្ត សម្រាប់ការប្រកួតប្រជែង នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់។ ប៉ុន្តែគណបក្សដែលមានលទ្ធភាព និងធនធានមនុស្ស ព្រមទាំងធនធានហិរញ្ញវត្ថុ ហើយដាក់បេក្ខជនបានគ្រប់ឃុំសង្កាត់ គឺមានតែ២គណបក្សប៉ុណ្ណោះ គឺគណបក្សប្រជាជនកម្ពុជា និងគណបក្សភ្លើងទៀន។
វិអូឌី មិនអាចស្នើសុំការបញ្ជាក់បន្ថែមពីលោក សុខ ឥសាន អ្នកនាំពាក្យគណបក្សប្រជាជនកម្ពុជា បានទេនៅថ្ងៃពុធនេះ។ ប៉ុន្តែ អ្នកនាំពាក្យរូបនេះធ្លាប់ប្រាប់វីអូឌីកន្លងទៅថា កម្មវិធីនយោបាយរបស់គណបក្សកាន់អំណាច គឺកំពុងតែដាក់ឱ្យអនុវត្តដូចដែលមានសព្វថ្ងៃនេះ។ ជាងនេះទៀត ចំពោះបេក្ខជន ឈរជាមេឃុំសង្កាត់ គឺគណបក្សបានដាក់គ្រប់ចំនួន មិនឱ្យខ្វះចន្លោះទេ។
ចំពោះគណបក្សភ្លើងទៀន ដែលជាគណបក្សធ្លាប់មានប្រវត្តិចូលរួមប្រកួតប្រជែង និងទទួលបានអាសនៈកៅអីមេឃុំចៅសង្កាត់ មិនចាញ់គណបក្សប្រជាជនកម្ពុជាដែរនោះ មានជំនឿថា ការបោះឆ្នោតឃុំសង្កាត់លើកនេះ ខ្លួនអាចនឹងទទួលបានអាសនៈលើសពីការរំពឹងទុក។
អនុប្រធានគណបក្សនេះ គឺលោក ថាច់ សេដ្ឋា ឱ្យដឹងថា កម្មវិធីនយោបាយ ដែលបានដាក់ចេញរួចទៅហើយនោះ មិនខុសពីកម្មវិធីនយោបាយ ដូចទៅនឹងគណបក្សសង្រ្គោះជាតិ ដែលត្រូវបានតុលាការរំលាយនោះទេ។ លោកថា គណបក្សភ្លើងទៀន បានដាក់ចេញនូវកម្មវិធីនយោបាយ និងផែនការជាយុទ្ធសាស្រ្តចំនួន ៧ចំណុច ហើយចំណុចដែលជាអាទិភាពគឺបញ្ហាវិវាទដីធ្លី។
លោកបន្តថា បើសិនគណបក្សនេះឈ្នះការបោះឆ្នោតឃុំសង្កាត់ នោះនឹងដោះស្រាយជូនពលរដ្ឋ ដោយតម្លាភាព និងយុត្តិធម៌។
លោកបន្តថា៖ «យើងក៏បានរៀបចំគោលនយោបាយក៏មិនខុសគ្នាប៉ុន្មានដែរ ដែលយើងដាក់ចេញនូវគោលនយោបាយមូលដ្ឋានយើងមាន៧ចំណុច ក្នុងនោះក៏យើងនិយាយពីសេវាសាធារណៈ និយាយពីសិទ្ធិអំណាចប្រជាពលរដ្ឋ និយាយពីការពង្រឹងសន្តិសុខ និយាយពីការអភិវឌ្ឍន៍មូលដ្ឋាន និយាយពីការអប់រំនៅតាមមូលដ្ឋាន រួមទាំងវិស័យសុខាភិបាលអីហ្នឹងជាដើម»។
ចំណែក អ្នកនាំពាក្យគណបក្សខ្មែររួបរួមជាតិ លោក រុន មេត្រា មានសុទិដ្ឋិនិយមថា គណបក្សនេះនឹងទទួលបានកៅអីជាមេឃុំចៅសង្កាត់ច្រើន សម្រាប់ការបោះឆ្នោតខាងមុខនេះ។ លោកបន្តថា សម្រាប់កម្មវិធីនយោបាយស្នូល ដែលគណបក្សបានដាក់ចេញ ដើម្បីត្រៀមប្រកួតប្រជែងនោះ មាន ៧ចំណុច ដូចទៅនឹងគណបក្សភ្លើងទៀនដែរ ក្នុងនោះកម្មវិធីនយោបាយជាអាទិភាព គឺត្រូវរៀបចំធ្វើយ៉ាងណា ធានាថាភូមិឃុំមានសុវត្ថិភាព បំបាត់អំពើចោរកម្ម ហិង្សាក្នុងគ្រួសារ អំពើអសីលធម៌សង្គម ឆក់ប្លន់ និងគ្រឿងញៀនជាដើម។
លោកបន្តថា៖ «ហើយទី២យើងបង្កើតទៅជាភូមិឃុំស្អាតស្អំ។ ភូមិឃុំស្អាតស្អំនេះ មានន័យថា គ្មានការរើសអើង គ្មានបក្សពួកនិយម គ្រួសារនិយម និងគ្មានអំពើពុករលួយ ព្រមទាំងគ្មានការយកកម្រៃក្រៅផ្លូវការលើសេវាសាធារណៈគ្រប់ប្រភេទ។ ហើយចំណុចទី៣ នៃគោលនយោបាយមូលដ្ឋានរបស់យើងខ្ញុំគឺភូមិឃុំរុងរឿង បង្កើនសេដ្ឋកិច្ចគ្រួសារឱ្យបានធូរធាតាមរយៈការបង្កើនផលិតភាពកសិកម្ម បែបទំនើប និងបច្ចេកទេសថ្មី ធានាតម្លៃកសិផលស្របតាមទីផ្សារ និងបង្កើនការងារថ្មីនៅក្នុងមូលដ្ឋាន»។
យោងតាមប្រតិទិនដែលចេញដោយ គ.ជ.ប ឱ្យដឹងថា ការបោះឆ្នោតជ្រើសរើសក្រុមប្រឹក្សាឃុំសង្កាត់ សម្រាប់អាណត្តិទី៥នេះ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២៕
