អតីតគ្រូពេទ្យ និងជាប្រធានក្រុមការងារគណបក្សភ្លើងទៀនប្រចាំខេត្តប៉ៃលិន លោក ខឹម មុនីកុសល បានដាក់ពាក្យស្នើសុំពន្យារពេលចូលខ្លួនទៅឆ្លើយបំភ្លឺនៅចំពោះមុខតុលាការខេត្តប៉ៃលិន នៅថ្ងៃពុធនេះ ទាក់ទងបណ្ដឹង «ញុះញង់ឱ្យមានការរើសអើង»។
ប្រធានក្រុមការងារគណបក្សភ្លើងទៀនប្រចាំខេត្តប៉ៃលិន លោក ខឹម មុនីកុសល បានបញ្ជាក់ពីមូលហេតុនៃការស្នើសុំពន្យារពេលនេះថា គឺដោយសារតែលោកមិនទាន់មានពេលវេលាគ្រប់គ្រាន់ ម្យ៉ាងទៀតដោយសារលោកនៅមិនទាន់បានពិភាក្សាជាមួយមេធាវីនៅឡើយ។ បើតាមការឱ្យដឹងពីលោក ខឹម មុនីកុសល ខាងតុលាការបានយល់ព្រមតាមសំណើរបស់លោករួចហើយ។
លោក ខឹម មុនីកុសល ប្រធានក្រុមការងារគណបក្សភ្លើងទៀនប្រចាំខេត្តប៉ៃលិន កំពុងជាប់បណ្ដឹងចំនួនពីរនៅឯតុលាការ។ បណ្ដឹងទីមួយទាក់ទង «បណ្ដឹងបរិហាកេរ្តិ៍» របស់លោក ចេង តូ ដោយតុលាការបានកោះហៅលោកឱ្យចូលទៅបំភ្លឺកាលពីថ្ងៃទី៨ ខែមេសា ប៉ុន្តែលោកបានដាក់ពាក្យស្នើសុំពន្យារពេលម្តងរួចមកហើយ។
ចំណែកពាក្យបណ្តឹងមួយទៀត ទាក់ទងបទ «ញុះញង់ឱ្យមានការរើសអើង» ដែលប្រព្រឹត្តនៅស្នាក់ការគណបក្សប្រជាជនកម្ពុជាខេត្តប៉ៃលិន ស្ថិតនៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ដោយតុលាការបានតម្រូវឱ្យលោកចូលខ្លួនទៅឆ្លើយបំភ្លឺនៅថ្ងៃទី២០ ខែមេសានេះ។
លោក ខឹម មុនីកុសល គឺជាអតីតមន្ត្រីរាជការនៅខេត្តប៉ៃលិន ត្រូវបានអភិបាលខេត្តប៉ៃលិន លោកស្រី បាន ស្រីមុំ បណ្ដេញចេញពីក្របខណ្ឌជាមន្ត្រីសុខាភិបាលជាន់ខ្ពស់នៃមន្ទីរសុខាភិបាលខេត្តនេះ កាលពីថ្ងៃទី១៩ ខែមីនា ឆ្នាំ២០២១ បន្ទាប់ពីលោកបានបង្ហោះសារនៅលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កក្នុងស្នាក់ការគណបក្សប្រជាជនកម្ពុជាខេត្តប៉ៃលិន៕