សាលាឧទ្ធរណ៍រាជធានីភ្នំពេញ នឹងបើកសវនាការសំណុំរឿងមន្ត្រី និងអតីតមន្ត្រីសមាគមការពារសិទ្ធិមនុស្សអាដហុកចំនួន៥នាក់ នៅចុងខែមេសានេះ ក្រោមបទចោទ «សូកប៉ាន់សាក្សី និងសមគំនិតសូកប៉ាន់សាក្សី»។
កាលពីថ្ងៃទី២៦ ខែកញ្ញា ឆ្នាំ២០១៨ សាលាដំបូងរាជធានីភ្នំពេញ បានសម្រេចផ្ដន្ទាទោសអ្នកទាំង៥រូបដាក់ពន្ធនាគារម្នាក់ៗចំនួន៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី»។
ទោស៥ឆ្នាំនេះ តុលាការសម្រេចឱ្យពួកគាត់អនុវត្តក្នុងពន្ធនាគាររយៈពេល១៤ខែ និងទោសនៅសល់ត្រូវព្យួរ។ ប៉ុន្តែដោយមិនពេញចិត្តចំពោះការសម្រេចរបស់សាលាដំបូងរាជធានីភ្នំពេញពេលនោះ កាលពីថ្ងៃទី២៣ ខែតុលា ឆ្នាំ២០១៨ ពួកគាត់ទាំង៥រូបក៏បានប្ដឹងសាទុក្ខទៅសាលាឧទ្ធរណ៍ ប៉ុន្តែចាប់តាំងពីឆ្នាំ២០១៨ ដល់ខែមេសា ឆ្នាំ២០២២ សំណុំរឿងបានអូសបន្លាយរយៈពេលប្រមាណ៥ឆ្នាំមកហើយ។
ក្នុងដីកាដាច់ដោយឡែកពីគ្នា ចុះថ្ងៃទី២៨ ខែមីនា ឆ្នាំ២០២២ ចេញដោយព្រះរាជអាជ្ញានៃមហាអយ្យការអមសាលាឧទ្ធរណ៍រាជធានីភ្នំពេញ លោក អ៊ឹម សុផាន បានកោះហៅមន្ត្រីសមាគមអាដហុក៣រូប រួមមាន លោក យី សុខសាន្ត និងលោក នី សុខា និងលោកស្រី លឹម មុនី ព្រមទាំងអតីតមន្រ្តីសមាគមអាដហុក២រូបទៀត រួមមាន លោក ណៃ វ៉ងដា និងលោក នី ចរិយា ដើម្បីចូលរួមសវនាការនៅថ្ងៃទី២៨ ខែមេសា ឆ្នាំ២០២២ខាងមុខនេះ។
ប្រធានសមាគមការពារសិទ្ធិមនុស្សអាដហុក លោក នី សុខា ប្រាប់វីអូឌីនៅថ្ងៃព្រហស្បតិ៍នេះថា រូបគាត់និងអ្នកទាំង៤រូបផ្សេងទៀត នឹងចូលរួមសវនាការតាមការកោះហៅរបស់សាលាឧទ្ធរណ៍។
ការកោះហៅអ្នកការពារសិទ្ធិមនុស្ស ៤នាក់ និងមន្ត្រីគណៈកម្មាធិការជាតិរៀបចំការបោះឆ្នោត គ.ជ.ប ម្នាក់នេះ ធ្វើឡើងបន្ទាប់ពីតុលាការបានលើកពេលសវនាការសំណុំរឿងនេះម្ដងរួចមកហើយ កាលពីថ្ងៃទី២៥ ខែមីនា ឆ្នាំ២០២២ ដោយសារមេធាវីរបស់លោក នី ចរិយា ប៉ះពាល់ផ្ទាល់ជាអ្នកជំងឺកូវីដ-១៩។
កាលពីខែមេសា ឆ្នាំ២០១៦ មន្ត្រីនិងអតីតមន្រ្តីសមាគមការពារសិទ្ធិមនុស្សអាដហុកទាំង៥រូប ត្រូវបានចាប់ខ្លួនដោយចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងផ្ដល់ប្រាក់ជាង២០០ដុល្លារទៅឱ្យស្ត្រីម្នាក់ឈ្មោះ ខុម ចាន់តារាទី ហៅ ស្រីមុំ ក្នុងនាមជនរងគ្រោះដែលរត់មករកអាដហុកឱ្យជួយពេលនោះ។
ស្ត្រីឈ្មោះ ខុម ចាន់តារាទី នៅពេលនោះ ត្រូវបានគេចោទថាជាស្រីកំណាន់របស់លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ។ ពួកគេទាំង៥នាក់ត្រូវបានបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១ ខែឧសភា ឆ្នាំ២០១៦ រហូតដល់ថ្ងៃទី២៩ ខែមិថុនា ឆ្នាំ២០១៧ ទើបត្រូវបានតុលាការសម្រេចដោះលែងឱ្យនៅក្រៅឃុំជាបណ្ដោះអាសន្នវិញ។
យ៉ាងណាក៏ដោយ កាលពីថ្ងៃទី៩ ខែមីនា ឆ្នាំ២០២២ គណៈកម្មការសិទ្ធិមនុស្សនៃអង្គការសហប្រជាជាតិ (UN) បានបង្ហាញក្ដីបារម្ភយ៉ាងខ្លាំងចំពោះកម្ពុជា ក្នុងការប្រើប្រាស់អង្គភាពប្រឆាំងអំពើពុករលួយ (ACU) ជាឧបករណ៍យាយីនិងធ្វើទុក្ខបុកម្នេញលើអ្នកការពារសិទ្ធិមនុស្ស គណបក្សប្រឆាំងនានា និងអ្នកដែលហ៊ានលើកឡើងពីអំពើពុករលួយ តាមរយៈការចោទប្រកាន់ដែលខុសពីការពិត៕
