សមត្ថកិច្ចបានកោះហៅមន្ត្រីសិទ្ធិមនុស្សចំនួន៤នាក់ ឱ្យចូលបំភ្លឺ ចាប់ពីថ្ងៃទី៩ ខែមករា រហូតដល់ថ្ងៃទី១១ ខែមករា ពាក់ព័ន្ធនឹងករណីបង្ហោះគាំទ្របទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដោយសមត្ថកិច្ចសំអាងហេតុថា បទចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
ការកោះហៅនេះ ធ្វើឡើងបន្ទាប់ពីរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ស្នើទៅអគ្គស្នងការនគរបាលជាតិ នៃក្រសួងមហាផ្ទៃ ចាត់វិធានការទប់ស្កាត់បណ្ដាញប្រព័ន្ធព័ត៌មានសង្គម ដែលបានយកបទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដែលជាបទចម្រៀងរម្លឹកពីព្រឹត្តិការណ៍បង្ក្រាបដោយហិង្សាពីសំណាក់សមត្ថកិច្ចទៅលើក្រុមបាតុករដែលធ្វើបាតុកម្មដោយអហិង្សាលើផ្លូវវេងស្រេង កាលពីដើមឆ្នាំ២០១៤ ដោយសំអាងហេតុថា បទចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
ក្នុងលិខិតកោះហៅរបស់អគ្គស្នងការដ្ឋាននគរបាលជាតិ ដែលវីអូឌីទើបទទួលបាននៅថ្ងៃចន្ទនេះ បានឱ្យដឹងថា សមត្ថកិច្ចបានកោះហៅមន្ត្រីសិទ្ធិមនុស្សចំនួន ៤នាក់ ឱ្យចូលបំភ្លឺនៅអគ្គស្នងការដ្ឋាន រួមមាន លោក អំ សំអាត នាយកកិច្ចការទូទៅអង្គការលីកាដូ ដែលបានចូលបំភ្លឺនៅថ្ងៃទី៩ ខែមករា។ បន្ថែមពីនេះ កោះហៅលោក មឿន តុលា នាយកប្រតិបត្តិ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ រួមទាំង លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលត្រូវចូលបំភ្លឺនៅថ្ងៃទី១០ ខែមករា ខណៈលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) ត្រូវចូលបំភ្លឺនៅថ្ងៃទី១១ ខែមករា។ ការកោះហៅមន្ត្រីសង្គមស៊ីវិលទាំង៤រូបនេះ ពាក់ព័ន្ធនឹងរឿងបង្ហោះគាំទ្របទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ។
លោក អំ សំអាត បានថ្លែងប្រាប់អ្នកសារព័ត៌មាន បន្ទាប់ពីសមត្ថកិច្ចសាកសួរចប់នៅរសៀលថ្ងៃចន្ទថា គោលបំណងនៃការបង្ហោះបទចម្រៀងដែលមានចំណងជើងថា «ឈាមបាតុករ» មានបីចំណុច ដែលចំណុចទី១ រម្លឹកខួប ៩ឆ្នាំ នៃព្រឹត្តិការណ៍អំពើហិង្សាលើផ្លូវវេងស្រេង និងទី២ ស្នើសុំឱ្យមានការស៊ើបអង្កេតបន្ត ដើម្បីផ្តល់យុត្តិធម៌ដល់ជនរងគ្រោះ និងសង្គមជាតិ ហើយចំណុចទី៣ រួមគ្នាទប់ស្កាត់កុំឱ្យមានអំពើហិង្សានេះកើតឡើងបន្តទៀត។
ករណីនេះ លោកច្រានចោលការចោទប្រកាន់របស់ក្រសួងវប្បធម៌មកលើរូបគាត់ និងមន្ត្រីសង្គមស៊ីវិលផ្សេងៗទៀត ដែលថា បង្ហោះចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
លោកមានប្រសាសន៍ថា៖ «ក្រៅពីគោលបំណងទាំងបីហ្នឹង យើងអត់មានគោលបំណងអ្វីផ្សេងទេ មិនមានអ្វីដូចក្រសួងលើកឡើងថាគេអាចញុះញង់ គឺយើងមិនគិតដល់ យើងមិនមានបំណងដូចអ៊ីចឹងទេ»។
ចំណែកមន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា ចាត់ទុកការកោះហៅមន្ត្រីសិទ្ធិមនុស្សឱ្យចូលបំភ្លឺជាបន្តបន្ទាប់នេះ ជាការគំរាមកំហែង និងរឹតត្បិតសិទ្ធិសេរីភាពបញ្ចេញមតិ ផ្ទុយពីគោលការណ៍ច្បាប់ជាតិ និងអន្តរជាតិ។
លោកបន្តថា រដ្ឋាភិបាលគួរតែដោះស្រាយពីទុកកង្វល់របស់ប្រជាពលរដ្ឋដែលជួបប្រទះ និងបញ្ហាប្រឈម ជាពិសេសសំណុំរឿងនៅផ្លូវវេងស្រេង ជាជាងកោះហៅមន្ត្រីសិទ្ធិមនុស្សសាកសួរ នាំឱ្យប៉ះពាល់ដល់ដំណើរការលទ្ធិប្រជាធិបតេយ្យនៅកម្ពុជា។
លោកមានប្រសាសន៍ថា៖ «បញ្ហាទាំងអស់នេះ គប្បីគួរតែមានការពិនិត្យ និងទទួលយកនូវអ្វីដែលជាការលើកឡើង ហើយរកចាត់វិធានការតាមផ្លូវច្បាប់លើ [ជនល្មើសវិញ] ដើម្បីជាការឆ្លើយតបជាមួយនឹងអ្វីដែលជាការលើកឡើង ជាជាងទៅជាការចាត់វិធានការទៅលើអ្នកដែលស្នើសុំ អ្នកដែលផលិតវីដេអូដែលកើតឡើងព្រឹត្តិការណ៍នៅផ្លូវវេងស្រេងពិតប្រាកដ។ អ៊ីចឹង វាមិនមែនជាដំណោះស្រាយទេ»។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន មានប្រសាសន៍ថា ដើមចមដែលសមត្ថកិច្ចកោះហៅមន្ត្រីសិទ្ធិមនុស្សចំនួន៤នាក់ឱ្យចូលបំភ្លឺ ដោយសារពាក់ព័ន្ធការបង្ហោះគាំទ្របទចម្រៀងរ៉េបថ្មីរបស់យុវជន គា សុគន្ធ ដែលមានចំណងជើងថា «ឈាមបាតុករ» ដែលបទចម្រៀងនេះអាចនឹងបង្កអសន្តិសុខសណ្ដាប់ធ្នាប់សង្គម។
លោកបន្តថា ការកោះហៅមន្ត្រីសិទ្ធិមនុស្សទាំងនោះមកសាកសួរ ដើម្បីអនុវត្តវិធានការរដ្ឋបាលលើពួកគេ ដើម្បីកុំឱ្យបន្តគាំទ្រចម្រៀងបែបនេះទៀត ដែលអាចបង្កអសន្តិសុខសណ្ដាប់ធ្នាប់សង្គម។
លោកមានប្រសាសន៍ថា៖ «នេះយើងអនុវត្តវិធានការរដ្ឋបាល ដើម្បីអប់រំ ធ្វើកិច្ចសន្យាឈប់បង្ហោះអ៊ីចឹងទៅ ព្រោះខ្លឹមសារ វាមានឥទ្ធិពលជះទៅលើបរិយាកាសសន្តិសុខសង្គម តែបើសិនជាអនុវត្តវិធានការរដ្ឋបាលនៅតែគ្មានប្រសិទ្ធភាព អាហ្នឹងយើងនឹងពិចារណារៀបចំនីតិវិធីតាមផ្លូវច្បាប់ អនុវត្តវិធានការច្បាប់វិញ»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព លើកឡើងប្រហាក់ប្រហែលលោក ករុណា ដែរ ប៉ុន្តែលោកស្រីថា បើរដ្ឋាភិបាលនៅតែប្រើរូបភាពគំរាមកំហែងមន្ត្រីសិទ្ធិមនុស្ស និងសកម្មជននយោបាយបែបនេះ នឹងធ្វើឱ្យកម្ពុជាទទួលរងនូវការរិះគន់ពីមជ្ឈដ្ឋានជាតិ និងអន្តរជាតិ ព្រមទាំងធ្វើឱ្យខាតបង់នូវផលប្រយោជន៍ថែមមួយកម្រិតទៀតពីសហគមន៍អឺរ៉ុបផងដែរ ។
លោកស្រីមានប្រសាសន៍ថា៖ «ការរឹតបន្តឹង ឬការគំរាមកំហែងទៅដល់គោលការណ៍សិទ្ធិមនុស្ស វានឹងមានផលជះទៅលើទំនាក់ទំនងទាំងអស់ហ្នឹង។ យើងឃើញកន្លងមក កើតឡើងរួចមកហើយ សម្រាប់សហភាពអឺរ៉ុប ដែលបានដកចេញនូវការផ្តល់អនុគ្រោះពន្ធផ្នែកខ្លះ ជិត ២០% ដល់កម្ពុជាយើង។ អ៊ីចឹងយើងបានខាតបង់នូវឱកាសការទទួលបានផលចំណេញពីទំនាក់ទំនងពាណិជ្ជកម្មហ្នឹង។ ហើយក៏មានការលើកឡើងកន្លងមកដែរថា ការបន្តធ្លាក់ចុះនេះ វាអាចឈានឱ្យមានធ្លាក់ចុះបន្ថែមទៀត»។
សម្រាប់នាយកប្រតិបត្តិ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា វិញ អះអាងថា លោកនឹងចូលទៅបំភ្លឺតាមការកោះហៅ នៅព្រឹកថ្ងៃទី១០ ខែមករា។
យុវជន គា សុគន្ធ ជាតារាចម្រៀងរ៉េប មានស្រុកកំណើតនៅខេត្តសៀមរាប ត្រូវបានសមត្ថកិច្ចចាប់ខ្លួនកាលពីខែកញ្ញា ឆ្នាំ២០២០ ពាក់ព័ន្ធនឹងទំនុកច្រៀងរិះគន់បញ្ហាអយុត្តិធម៌សង្គម និងបញ្ហាព្រំដែន ជាដើម។
ប៉ុន្តែយុវជនវ័យ២៤ឆ្នាំរូបនេះ ត្រូវបានដោះលែងវិញកាលពីខែកញ្ញា ឆ្នាំ២០២១ ក្រោយពីបានអនុវត្តទោសជាប់ពន្ធនាគារអស់រយៈពេល១ឆ្នាំ ក្នុងចំណោមទោស ១ឆ្នាំ ៨ខែ ដែលតុលាការខេត្តសៀមរាបបានកាត់ទោសយុវជនរូបនេះពីបទ «ញុះញង់»។
ដោយឡែក ព្រឹត្តិការណ៍បង្ក្រាបកម្មករតវ៉ានៅតាមបណ្តោយផ្លូវវេងស្រេង ដោយប្រើកាំភ្លើងពិត បានបណ្ដាលឱ្យកម្មករ ៤នាក់ស្លាប់ ហើយម្នាក់បាត់ខ្លួនរហូតមកទល់ពេលបច្ចុប្បន្ន និងជិត៤០នាក់រងរបួស ខណៈមនុស្ស២៣នាក់ត្រូវចាប់ខ្លួន ហើយតុលាការចោទប្រកាន់ពួកគេពីបទ «បង្កហិង្សា និងបំផ្លិចបំផ្លាញទ្រព្យសម្បត្តិដោយចេតនា» ប៉ុន្តែមកដល់ពេលនេះ រដ្ឋាភិបាលនៅមិនទាន់ផ្តល់យុត្តិធម៌ដល់ជនរងគ្រោះក្នុងព្រឹត្តិការណ៍នោះនៅឡើយទេ៕