ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនស្ថាបនិកគណបក្សបេះដូងជាតិ លោក សៀម ភ្លុក នៅពន្ធនាគារព្រៃស បន្ទាប់ពីបានឃាត់ខ្លួនកាលពីថ្ងៃម្សិលមិញ ក្រោមបទចោទប្រកាន់ «ក្លែងបន្លំ និងប្រើប្រាស់លិខិតក្លែង»។
ក្នុងដីកាបង្គាប់ឱ្យឃុំខ្លួនចុះថ្ងៃទី២៧ ខែមេសា ឆ្នាំ២០២២ ចេញដោយចៅក្រមស៊ើបសួរសាលាដំបូងរាជធានីភ្នំពេញ លោក លិ សុខា បានបង្គាប់ឱ្យសមត្ថកិច្ចនាំខ្លួនស្ថាបនិកគណបក្សបេះដូងជាតិ លោក សៀម ភ្លុក ទៅឃុំខ្លួននៅពន្ធនាគារព្រៃស ពាក់ព័ន្ធនឹងករណីក្លែងបន្លំ និងប្រើប្រាស់លិខិតក្លែង។ ដីកាដដែលថា ប្រធានមណ្ឌលអប់រំកែប្រែទី១ (១) ទទួល និងឃុំខ្លួនជននេះ រហូតដល់មានបទបញ្ជាថ្មីសម្រេចផ្សេងពីនេះ។
លោក លិ សុខា បញ្ជាក់ក្នុងដីកាបង្គាប់ឱ្យឃុំខ្លួននោះ ដោយឱ្យគ្រប់ភ្នាក់ងារនៃកងកម្លាំងសាធារណៈទាំងអស់សហការអនុវត្តឱ្យបានល្អនៅពេលដីកានេះត្រូវបានបង្ហាញក្នុងករណីចាំបាច់។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានបញ្ជាក់នៅថ្ងៃទី២៨ ខែមេសានេះថា លោក សៀម ភ្លុក ត្រូវបានចាប់ខ្លួនកាលពីព្រឹកថ្ងៃពុធម្សិលមិញ នៅរាជធានីភ្នំពេញ ហើយការចាប់ខ្លួននេះធ្វើឡើងតាមដីកានាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។ លោកបន្តថា ក្រោយការចាប់ខ្លួន សមត្ថកិច្ចបានបញ្ជូនលោក សៀម ភ្លុក ទៅតុលាការភ្លាមៗផងដែរ។
នៅពេលសួរថា តើអាជ្ញាធរកំពុងស្វែងរកអ្នកពាក់ព័ន្ធផ្សេងទៀតឬយ៉ាងណានោះ លោក សាន សុខសីហា បានមានប្រសាសន៍ថា៖ «រហូតមកដល់ពេលនេះមានតែគាត់ [លោក សៀម ភ្លុក] ម្នាក់គត់ ដែលយើងអនុវត្តដីការបស់តុលាការ។ ក្នុងនាមនគរបាលយុត្តិធម៌ និងសមត្ថកិច្ច យើងអនុវត្តតាមនីតិវិធីច្បាប់។ នៅពេលដែលមានដីកាណាមួយពាក់ព័ន្ធនឹងបទល្មើសផ្សេងៗ យើងនឹងអនុវត្តតាមនីតិវិធីច្បាប់។ ប្រសិនបើគ្មានទេ យើងនឹងមិនចាប់ខ្លួនឡើយ»។
លោក ជូង ជូងី មេធាវីការពារក្ដីឱ្យលោក សៀម ភ្លុក មានប្រសាសន៍ថា៖ «ខ្ញុំអត់ដឹងថាតើសមត្ថកិច្ចដែលទៅឃាត់ខ្លួនបញ្ជូនមកតុលាការនោះ សម្អាងទៅលើអ្វី។ កន្លងមក ចៅក្រមស៊ើបសួរចេញដីកាបង្គាប់ឱ្យនាំខ្លួនឱ្យបានមុនថ្ងៃទី២៥ អ៊ីចឹងត្រឹមថ្ងៃទី២៥ ដីកានោះអស់សុពលភាពហើយ។ ហើយម្សិលមិញ ថ្ងៃទី២៧ អ៊ីចឹងថាតើចៅក្រមស៊ើបសួរមានចេញដីកាថ្មីអត់? បើចៅក្រមស៊ើបសួរមិនមានចេញដីកាថ្មីទេ បែរជានគរបាលគាត់យកដីកាចាស់ដែលអស់សុពលភាព នៅថ្ងៃទី២៥ យកទៅអនុវត្ត អាហ្នឹងខ្ញុំយល់ឃើញថា ជាការអនុវត្តដែលខុសនីតិវិធី ដែលអត់មានអ្វីសម្អាង ពីព្រោះដីកាបង្គាប់ឱ្យនាំខ្លួនហ្នឹង នាំឱ្យបានមុនថ្ងៃទី២៥ អ៊ីចឹងត្រឹមថ្ងៃទី២៥ហ្នឹង អស់សុពលភាពហើយ ជាស្មារតីច្បាប់នោះ។ អ៊ីចឹងបើនាំខ្លួនបាន ទាល់តែចៅក្រមស៊ើបសួរចេញដីកាថ្មីទៀត នោះទើបយកទៅអនុវត្តទៅត្រឹមត្រូវ»។
លោក ជូង ជូងី បញ្ជាក់ថា មកដល់ពេលនេះ លោកនៅមិនទាន់ទទួលដីកាថ្មី ឬការសម្រេចថ្មីណាមួយពីតុលាការទេ ហើយបែរជាមានការឃុំខ្លួនកូនក្តីរបស់លោកទៅវិញ។ លោកបន្តថា លោកនឹងជួបជាមួយកូនក្ដីរបស់លោកនៅថ្ងៃស្អែក ដើម្បីពិភាក្សានីតិវិធីបន្តក្នុងការតតាំងក្ដីក្នុងសំណុំរឿងនេះ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា បើសិនជាតុលាការមិនបញ្ជូនដីកាឱ្យដល់ដៃជនដែលត្រូវបានចោទទេ តុលាការមិនអាចចោទប្រកាន់ថាបុគ្គលរូបនោះគេចវេះក្នុងការចូលបំភ្លឺបានឡើយ។ ប៉ុន្តែក្នុងករណីបើជនត្រូវបានចោទ បានទទួលដីកាដោយផ្ទាល់ដៃហើយ តែមិនចូលខ្លួនបំភ្លឺនោះ លោកថា តុលាការអាចអនុវត្តនីតិវិធីបន្តទៀត។
តែយ៉ាងណា លោក អំ សំអាត យល់ថា ករណីនេះអាចជាប់ពាក់ព័ន្ធរឿងនយោបាយ ដោយសារកន្លងមក លោក សៀម ភ្លុក មានបញ្ហាចម្រូងចម្រាសតាំងពីនៅក្រសួងមហាផ្ទៃ ពាក់ព័ន្ធរឿងចុះបញ្ជីគណបក្ស ដោយមានការប្ដឹងទៅតុលាការជាដើម។
លោកថា៖ «ការបង្កើតគណបក្សបេះដូងជាតិនេះ មានការចម្រូងចម្រាសរហូតដល់មានមតិខ្លះ ដែលមានមន្ត្រីជាន់ខ្ពស់មួយចំនួនក៏លើកឡើងថា មានការពាក់ព័ន្ធជាមួយនឹងអតីតមេដឹកនាំគណបក្សសង្គ្រោះជាតិ ជាដើម។ ទិដ្ឋភាពទាំងអស់ហ្នឹង ដែលគេមើលឃើញថា ជាស្ថានភាពនយោបាយ ហើយជាលើកទី១ហើយដែលគណបក្សដែលចុះបញ្ជី ត្រូវក្រសួងមហាផ្ទៃបដិសេធ និងលុបឈ្មោះចេញពីបញ្ជី ហើយប្ដឹងទៅតុលាការមានការចោទប្រកាន់»។
លោក អំ សំអាត បន្តថា បើសិនជាការចាប់ខ្លួន និងការគំរាមកំហែងសកម្មជននយោបាយបក្សប្រឆាំងកន្លងមក ត្រូវបានគេមើលឃើញថាជារឿងនយោបាយច្រើនជាងការអនុវត្តច្បាប់ ហើយករណីនេះ គំរាមកំហែងនិងចាប់ខ្លួននៅតែបន្តកើតឡើង នោះកម្ពុជានឹងរងការរិះគន់ពីសហគមន៍ជាតិ និងអន្តរជាតិ ដែលធ្វើឱ្យប៉ះពាល់ដល់ដំណើរការបោះឆ្នោតនាពេលខាងមុខ។
កាលពីថ្ងៃទី២៦ ខែមេសា ឆ្នាំ២០២២ មន្ត្រីជាន់ខ្ពស់ក្រសួងមហាផ្ទៃ លោក ខៀវ សុភ័គ បានព្រមានស្ថាបនិកគណបក្សបេះដូងជាតិ លោក សៀម ភ្លុក ថានឹងមិនអាចគេចចេញពីសំណាញ់ច្បាប់កម្ពុជាបានឡើយ បើទោះជាលោកបានព្យាយាមដល់ទៅ២លើក មិនចូលទៅបំភ្លឺនៅតុលាការតាមបណ្ដឹងរបស់ក្រសួងក៏ដោយ។
លោក សៀម ភ្លុក ត្រូវបានសាលាដំបូងរាជធានីភ្នំពេញ ចេញដីកាកោះហៅឱ្យចូលខ្លួនទៅឆ្លើយបំភ្លឺម្ដងរួចមកហើយ កាលពីថ្ងៃទី២២ ខែមីនា ឆ្នាំ២០២២ ពាក់ព័ន្ធនឹងរឿងក្លែងបន្លំស្នាមមេដៃសមាជិកដើម្បីបង្កើតគណបក្សនយោបាយ។ ប៉ុន្តែនៅថ្ងៃទី២២ ខែមីនានោះ លោកមិនបានចូលទៅបំភ្លឺទេ ដោយថាមិនបានទទួលដីកាពីតុលាការ។
ក្រោយពីលោក សៀម ភ្លុក មិនបានចូលបំភ្លឺនោះ ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី៤ ខែមេសា ឆ្នាំ២០២២ ក៏បានចេញដីកាបង្គាប់ឱ្យសមត្ថកិច្ចនាំខ្លួនលោក សៀម ភ្លុក ទៅបំភ្លឺនៅតុលាការឱ្យបានមុនថ្ងៃទី២៥ ខែមេសា ឆ្នាំ២០២២ ដើម្បីធានាដល់ការស៊ើបសួរឱ្យបានពេញលេញនៅចំពោះមុខចៅក្រមស៊ើបសួរ ប៉ុន្តែលោក សៀម ភ្លុក នៅតែពុំបានចូលខ្លួនទៅតាមដីកា ខណៈលោកអះអាងថា មិនទទួលបានដីកា៕